Ko e Fononga Fakataha ʻi he Halanga ʻo e ʻAmanakí

Ko e konga kimuʻa ia ʻo e faʻahitaʻu failaú ʻi Nāvū ʻi heʻeku fuofua lue ʻi he Halanga ʻo e ʻAmanakí. Naʻe lanu koula ʻa e māmá pea māfana mo e malumalú ʻi heʻeku fononga ʻi he hala ʻotu ʻuluʻakaú. ʻI heʻeku hoko ko e taha faitaá, naʻá ku tokanga pē ki he vave e kamo ʻeku meʻa faitaá, ʻene mapuní, pea mo e maama fakaofo naʻá ne fakafonu ʻeku ngaahi foʻi sioʻatá.

Fāifai pea kamata ke fakafonu hoku lotó ʻe he fakakaukau ki heʻeku ngaahi kui ne nau fononga ʻi he halanga ko ʻení. ʻUluakí ko Sēleti mo Konēliá mo ʻena tamasiʻi tangata taʻu uá. Naʻá ku ongoʻi e momoko ʻo e ʻeá, ka he ʻikai fakatataua ʻa e momokó ki he ngaahi tuʻunga mokoʻīʻī ne foua ʻe Sēleti mo hono kiʻi fāmilí he lolotonga ʻenau hiki fonongá. Naʻe siʻi mālōlō ʻa Konēliá ʻi he vahaʻa ʻo Nāvū mo Sōlekí. Naʻá ku fakakaukau ki he tangi ʻa Sēleti ʻi heʻene fua hake hono fohá ʻo hoko atú.

Naʻe ʻikai tuku ʻeku faitaá ʻi he fakanenefuʻi ʻe hoku loʻi matá ʻeku sió, ʻi heʻeku manavasiʻi naʻa mavahe ʻa e ongo ʻo enau ʻi aí. Fāifai peá u manatuʻi ʻa Sela, ʻa ē naʻe mavahe mo ʻene faʻē ʻi he fonó ʻi he kulupu fakaʻosi ʻo e Kāingalotú mei Nāvuú. ʻI ha taimi ʻe taha, naʻe fakafonu honau nofoʻangá ʻe ha Tamai Hēvani ʻofa, ʻaki ha kueili ke fafangaʻi kinautolu. Hili ia pea nau fāifeinga atu ʻi he loto fakafetaʻi.

Naʻe kamata ke fonu hoku lotó ʻi ha ongo; naʻe hangē ia kuó u tuʻu fakataha mo Selá. Naʻá ku ʻi ai foki mo Sēleti mo Konēliá pea mo ʻena kiʻi tamasiʻí. Naʻa mau fononga fakataha ʻi he māmá mo e malumalú, ʻo tuifio ʻa e kuo hilí mo e lolotongá ʻi he halangá—ʻi he halanga ko ʻeni ʻo e ʻamanakí, ʻi he halanga ko ʻeni ʻo e loʻimatá. ʻOku ʻikai ke u lava ʻo fakamatalaʻi, naʻa nau ʻi ai mo au ʻo fakaake ʻiate au ʻa e ʻofa ʻoku mau tatau ai ki he ongoongolelei ʻo Sīsū Kalaisí. Naʻá ku fakatokangaʻi ʻoku vela māfana ʻiate au ʻeku fakamoʻoní koeʻuhí he naʻe vela pehē ʻiate kinautolu—ʻo tukuʻau mai ʻi he toʻu tangata ki he toʻu tangata—ʻo takitaha fokotuʻu ʻa e fakavaʻe ki he hoko maí. Naʻá ku tangi ʻi he loto houngaʻia.

Ne ʻikai fuoloa, kuo foki mai hoku husepānití, he naʻe faitā ia ʻi ha feituʻu kehe. Naʻá ku tuʻu ʻo ofi kiate ia ʻi heʻeku fakamatala ange e meʻa ne u aʻusiá. Ko ia, ʻa e ʻuluaki ʻi hono fāmilí, ʻo tatau mo e Kāingalotu ʻi Nāvuú, ke tui ki he ongoongoleleí. Pea ʻoku ʻikai ko ia, ʻo tatau mo kinautolu ne fononga ʻi he halanga ko ʻení he taʻu ʻe 150 kimuʻá, ʻa e tokotaha fakaʻosi ke tuí. ʻOku tanumaki ʻe heʻene fakamoʻoní mo haʻakú ʻa e ngaahi fakamoʻoni ʻoku vela māfana he taimí ni ʻi he loto ʻo ʻema fānaú, ʻo hangē ko hono tanumaki ʻe he fakamoʻoni ʻa Sēleti mo Konēliá pea mo Selá ʻa e fakamoʻoni ʻa ha lauiafe ʻo honau hakó.

Ne fakangaloki atu ʻema faitaá, ka u luelue fakataha mo hoku husepānití he toenga ʻo e Halanga ʻo e ʻAmanakí, ʻo manatu fakalongolongo pē kiate kinautolu ne pekia ki muʻá.