ʻOku ʻIkai ha Meʻa ʻe Faingataʻa ki he ʻOtuá

ʻI he taʻu nai ʻe 12 kuo hilí, naʻá ku hiki ai mo hoku uaifí pea mo ʻema fānau tangata ʻe toko faá mei he Lepupelika ʻo Kōleá ki Nuʻu Sila. Naʻá ku fetaulaki ʻi he lolotonga ʻo ʻeku ngāue ko ha tokoni puleako ʻi ha ʻapiako Kōlea ʻi Nuʻu Sila, mo ha kakai Kōlea naʻe faingataʻaʻia ʻi he feinga ke anga ki he anga fakafonua foʻoú pea mo e ngaahi tuʻutuʻuni mo e ngaahi founga ngāue foʻoú. Naʻá ku fie tokoni kiate kinautolu pea mo tokoni foki ki Nuʻu Sila, ko ia ne u fakakaukau ai ʻe hoko haʻaku hoko ko ha loeá ko ha founga ia ʻe taha ke fakafehokotaki ʻa e ongo kakaí ni mo e ongo fonuá. ʻI heʻene peheé, hili haʻaku lotua ke fakapapauʻi ʻeku filí, naʻá ku pehē leva ʻi hoku taʻu 53 ke u hū ki he ʻapiako laó.

Naʻá ku ʻilo ʻe faingataʻa. Ka ʻi he taimi ne u maʻu ai ʻa e ngaahi tohi ʻo e kalasí, naʻá ku fakatokangaʻi ʻe toe faingataʻa ange ia ʻi he meʻa ne u ʻamanaki ki aí. Naʻe hā ngali fuʻu matolu ʻa e tohi lēsoní takitaha, pea hangē ne mahulu atu e kanotohí ia ʻi he meʻa ʻe ala mahino kiate aú. Neongo naʻá ku ʻosi faʻa tokoni ʻi he fakatonuleá mei he lea faka-Pilitāniá ki he lea faka-Kōleá ʻi he konifelenisi lahí ʻi ha meimei taʻu ʻe 10 pea ʻosi maʻu mo haku mataʻitohi MA ʻi he leá ʻi Nuʻu Sila, ka naʻe hangē e ngaahi foʻi lea fakalaó ia ha faʻahinga lea faka-Pilitānia kehe ʻaupitó.

Ko e taimi naʻá ku foki ai ki ʻapi mei he akó ʻi he ʻuluaki ʻahó, naʻe pau ke u fakakaukauʻi fakamātoato pe ʻoku totonu ke u kei hoko atu pe taʻofi kimuʻa peá u kamatá. ʻI he lolotonga ʻo e taimi taʻe-pau ko ʻení, ne hā mahino ha foʻi fakakaukau ʻe taha: te u lava ʻo ikuna kapau te u falala kakato ki he ʻEikí.

Naʻá ku kole tokoni ki he ʻOtuá, koeʻuhí he ʻoku ou ʻilo ʻoku moʻui mo Ne tali ʻetau ngaahi lotú. Naʻá ku manatuʻi ha potufolofola ʻe taha ʻi he Tohi Tapú naʻá ne ʻomi ha fakafiemālie lahi kiate au: “He ʻoku ʻikai ha meʻa ʻe faingataʻa ki he ʻOtuá” (Luke 1:37). Naʻe ʻomi ʻe he potufolofolá kiate au ha ivi ke hoko atu.

Ko e taimi pē ne u fehangahangai ai mo e ngaahi faingataʻá ʻi heʻeku akó, naʻe teuteu maʻu pē ʻe he ʻOtuá ha founga pe fekauʻi mai ha kau ʻāngelo—ha kakai tokoni lahi—ke tataki au.

Naʻá ku fāifeinga ʻi ha ʻaho ʻe taha ke fakaʻosi haʻaku ngāue fakaako. Naʻe fai hoku lelei tahá, ka naʻe ʻikai ke u lava ʻo ʻilo pe ko e hā naʻe fie maʻu ʻe he faiakó ke mau faí. ʻI heʻene aʻu ki he Sāpaté, naʻá ku tuku leva ʻeku ako kotoa pē ka u tokanga taha ki heʻeku ngaahi ngāue faka-Siasí. Naʻá ku ʻaʻahi ʻi heʻeku hoko ko e aleaʻanga māʻolunga fakasiteikí ki ha uooti ne vahe mai ke fai ha malanga ʻi he houalotu sākalamēnití. ʻI he ʻosi ʻa e houalotú, ne haʻu ha tangata kiate au ʻo ne talamai naʻá ne fakatokangaʻi au ʻi he lokiakó. Naʻe ʻikai ke u ʻilo ʻe au ko ha taha ako lao mo ia. Naʻá ku talaange moʻoni ki ai ʻi he taimi naʻá ne ʻeke mai ai pe ʻoku fēfē ʻa e ngāue fakaako ne vahe maí, naʻá ku faingataʻaʻia. Naʻá ne talamai leva ʻe fie haʻu ki hoku ʻapí ʻo tokoni mai. Kapau naʻe ʻikai ke u ʻalu ki he uōtí ke fetaulaki ai mo ia, naʻe ʻikai ke u mei lava ʻo fakahū taimi totonu ʻa e ngāue fakaakó. Ko ha ʻāngelo ia ne fekau mai ʻe he ʻOtuá ke tali ʻeku lotú.

ʻI he taha ʻo e ngaahi kalasi faingataʻa tahá, naʻe faiako taʻe-motu ai ʻa e faiakó ʻi ha houa ʻe ua ʻi he taimi kotoa pē ne fai ai ʻemau kalasí. Naʻe ʻikai ngata pē ʻi he faingataʻa ke mahino e lēsoni ʻo e kalasí ka ne toe pehē mo e tō e lea ia ʻa e faiakó, pea ʻi hano fakangofua, naʻá ku hikitepi leva e fakamatalá ke toki fakamanatu. ʻI ha ʻaho ʻe taha, naʻá ku maʻu ai ha ʻī-meili mei ha fefine naʻe ʻikai ke u ʻilo. Naʻá ne fakafeʻiloaki mai ia ko ha kaungā kalasi pea kole mai pe ʻe lava ke ne fakaʻaongaʻi ʻa e ngaahi meʻa naʻá ku hikí he naʻe taʻofi ia he taimi ʻe niʻihi ʻe heʻene taimi tēpile ngāué ʻo ʻikai haʻu ki he kalasí.

Naʻá ku fiefia ke ʻoange ha tatau ʻo e ʻū meʻa ne u hiki tepí. Naʻá ku pehē ko ʻeku tokoni ʻeni ki ai, ka ne u toki ʻilo ko ha toe ʻāngelo mo ia ne fokotuʻutuʻu ʻe he ʻOtuá ke tokoni kiate au. Naʻe pau ke mau fakahū ha ngāue fakaako ʻe ua mei ʻapi pea mo fai ha sivi houa ʻe tolu ka mau toki lava ʻi he kalasí. Naʻá ne tokoniʻi au ʻi hono fakakakato ʻo e ngaahi ngāue fakaako mei ʻapí mo teuteu ki he siví. Ka ne taʻe-ʻoua ʻene tokoní, ʻoku ʻikai ke u tui ne u mei lava.

Naʻe ʻi ai haku ngaahi fatongia kehe fakataha mo e ngaahi faingataʻa ʻo ʻeku hoko ko ha taha ako kuo motuʻá mo ʻikai lea faka-Pilitānia lelei, naʻa nau ʻai ke faingataʻa hano fakakakato ʻo e polokalamá. Naʻe toʻo ʻe heʻeku ngāué, ngaahi fatongia he koló, mo e ngaahi uiuiʻi ʻi he Siasí ha konga lahi hoku taimí, pea naʻá ku toe feinga foki ke fai hoku ngaahi fatongia mahuʻinga taha ko e husepāniti, tamai, mo e kui tangatá ʻi hono fakahoko e tauhi mo e tokanga naʻa nau fie maʻú. Naʻe pehē ʻe ha taha ʻo hoku ngaahi kaungā ngāué ʻi he taimi naʻá ne ʻilo ai ʻa e ngaahi meʻa kotoa naʻe pau ke u faí, ʻoku fakavalevale ke ako lao fakataha mo hoku ngaahi fatongia kehé kotoa. Neongo ia, naʻá ku fakapapauʻi “ko e ngaahi meʻa ʻoku ʻikai mafai ʻe he tangatá ʻoku mafai ia ʻe he ʻOtuá” (Luke 18:27).

ʻI hoku taʻu 55, naʻe tali ai au ki he kautaha laó ʻo hoko ko e talatalaaki mo e loea ʻi he Fakamaauʻanga Māʻolunga ʻi Nuʻu Silá. ʻOku ou fakamālō he ʻoku ʻikai ngata pē ʻeku hoko ko e loea neongo ʻa e palopalema ʻi he leá ka kuó u toe maʻu foki ha fakamoʻoni mālohi ange ʻoku moʻui ʻa e ʻOtuá mo tali ʻetau ngaahi lotu māʻoniʻoní. ʻOku ou ʻilo ʻoku ʻikai ha meʻa ʻe faingataʻa ʻo ka Ne tokoni mai.