Notebook ng Kumperensya ng Oktubre 2013

“Kung ano ang sinabi ko, ang Panginoon, ay sinabi ko; … maging sa pamamagitan ng sarili kong tinig o sa tinig man ng aking mga tagapaglingkod, ito ay iisa” (D at T 1:38).

Habang nirerepaso ninyo ang pangkalahatang kumperensya ng Oktubre 2013, magagamit ninyo ang mga pahinang ito (at ang mga Notebook ng Kumperensya sa susunod na mga isyu) para matulungan kayong pag-aralan at ipamuhay ang mga itinuro kamakailan ng mga buhay na propeta at apostol at ng iba pang mga pinuno ng Simbahan.

Pangako ng Isang Propeta: Pagharap sa mga Pagsubok

“Alam din ng ating Ama sa Langit, na nagbibigay sa napakaraming tinatamasa natin, na natututo tayo at lumalago at tumatatag kapag hinaharap natin at nalalagpasan ang mga pagsubok na kailangan nating pagdaanan. Alam natin na may mga pagkakataon na daranas tayo ng sama ng loob, dalamhati, at susubukan tayo kung hanggang saan ang ating pananampalataya. Gayunman, ang gayong mga paghihirap ang nagtutulot para tayo’y magpakabuti, ayusin ang ating buhay sa paraang itinuro sa atin ng ating Ama sa Langit, at maging kaiba kaysa dati—mas mabuti kaysa dati, mas maunawain kaysa dati, mas mahabagin kaysa dati, mas malakas ang patotoo kaysa dati.

“Ito dapat ang ating layunin—hindi lamang ang magtiyaga at magtiis, kundi maging mas dalisay rin sa espirituwal habang nabubuhay tayo sa masaya at malungkot na panahon. Kung hindi dahil sa hamon na dadaigin at mga problemang lulutasin, mananatili sana tayong ganito, kakatiting o walang pagsulong tungo sa ating minimithing buhay na walang hanggan.”

Pangulong Thomas S. Monson, “Hindi Kita Iiwan ni Pababayaan,” Liahona, Nob. 2013, 87.

Mga Sagot para sa Inyo

Bawat kumperensya, nagbibigay ng inspiradong mga sagot ang mga propeta at apostol sa mga tanong ng mga miyembro ng Simbahan. Gamitin ang inyong isyu ng Nobyembre 2013 o bisitahin ang conference.lds.org para makita ang mga sagot sa mga tanong na ito:

Anong mga doktrina ang matututuhan natin sa mga Saligan ng Pananampalataya? Tingnan sa L. Tom Perry, “Ang mga Doktrina at Alituntuning Nasa mga Saligan ng Pananampalataya.”
Paano tayo maaaring makibahagi sa gawaing misyonero kung takot tayo? Tingnan sa M. Russell Ballard, “Magtiwala Kayo sa Panginoon.”
Saan ginagamit ang ikapu? Tingnan sa David A. Bednar, “Mga Dungawan sa Langit.”
Paano makakaapekto sa ating kalayaan at hahantong sa pagkaalipin ang pagkakasala at paghihimagsik? Tingnan sa Quentin L. Cook, “Mga Panaghoy ni Jeremias: Mag-ingat sa Pagkaalipin.”

Mga Salita ng Propeta sa Kababaihan at sa Priesthood

Itinanong ni Elder Neil L. Andersen ng Korum ng Labindalawang Apostol: “Bakit kalalakihan lang ang namamahala sa mga ordenansa ng priesthood? …

“Kahit tiyak natin na ‘pantay-pantay’ ang pagmamahal ng Diyos sa Kanyang mga anak, alam din natin na hindi Niya nilikha ang mga lalaki at babae na parehong-pareho. Alam natin na ang kasarian ay mahalagang katangian ng pagkakakilanlan at layunin natin sa buhay na ito at sa kawalang-hanggan. Ang mga sagradong responsibilidad ay ibinigay sa bawat kasarian.

“Alam natin na sa simula pa lamang ay itinatag na ng Panginoon kung paano pamamahalaan ang Kanyang priesthood.”

Sa endnote 12 ng mensaheng ito, tinukoy ni Elder Andersen ang iba pang mga propetang sumagot sa tanong na ito. Sabi ni Pangulong Gordon B. Hinckley (1910–2008), “Ang Panginoon ang nagtakda na kalalakihan sa Kanyang Simbahan ang dapat humawak ng priesthood.” Sabi ni Elder M. Russell Ballard ng Korum ng Labindalawang Apostol, “Hindi pa inihahayag ng Panginoon kung bakit Niya inorganisa ang Kanyang Simbahan nang gayon.”

Mula sa “Kapangyarihan sa Priesthood, Liahona, Nob. 2013, 92.

Punan ang Puwang

“Ang mga tumutupad ng tipan ay sumusunod sa ____________________!” (Linda K. Burton, “Ang Kapangyarihan, Galak, at Pagmamahal sa Pagtupad ng Tipan,” Liahona, Nob. 2013, 113).
“Hindi batid ng marami na sila ay inaakay ng Panginoon sa mga lugar na maririnig nila ang ______________________ at maisasama sila sa Kanyang ______________________” (Gérald Caussé, “Hindi na Kayo mga Taga Ibang Bayan,” Liahona, Nob. 2013, 50).
“Ang kabutihan ay mas makapangyarihan kaysa ________________________” (Boyd K. Packer, “Ang Susi sa Espirituwal na Proteksyon,” Liahona, Nob. 2013, 27).
“Sa lumalabong kaibhang ito ng babae at lalaki, nawawala sa atin ang magkakaiba ngunit magkakatugmang kaloob ng ____________________ at _____________________ na kung pagsasamahin ay lilikha ng mas magandang kabuuan” (D. Todd Christofferson, “Ang Mabuting Impluwensya ng Kababaihan,” Liahona, Nob. 2013, 31).

Kaliwa: larawang kuha ni Ashton G. Smith; Kanan, paikot mula itaas: larawang kuha ni August Miller; paglalarawan ni Carlos Israel Gutiérrez Robles; larawang kuha ni Emily Leishman Beus