O Le Avea o le Konafesi ma Vaega o o Tatou Olaga

Na aoao mai Peresitene Dieter F. Uchtdorf, Fesoasoani Lua i le Au Peresitene Sili, e mafai ona tatou filifili ina ia loto faafetai e tusa lava po o a ni mea faigata na tutupu i o tatou olaga (itulau 70). O le lotofaafetai o le a fesoasoani ia i tatou ia sili atu ona fiafia ma agalelei atu ma ia faatuatua ma faalagolago i le Atua. O le a sou lagona pe a e lotofaafetai? O le a se mea e mafai ona e faia e lagona ai le lotofaafetai i aso taitasi?

Na faamatalaina e Bonnie L. Oscarson, peresitene aoao o Tamaitai Talavou, ia Sara, o se teine talavou sa o ma lona tina ina ia fesoasoani ia Brenda, o se tamaitai e afaina lona tuasivi ma lona faiai. Na palasiina e Sara le lauulu o Brenda, tuu le kulimi i ona lima, fofo ona tamatamailima ma ogalima, ma fesoasoani ia te ia e falo (itulau 119). Mafaufau e uiga i auala e mafai ona e auauna atu ai. E tusa lava pe e te talavou, e tele mea e mafai ona e faia.

Na aoao mai Elder L Tom Perry o le Korama a Aposetolo e Toasefululua e uiga i le ala na faaaoga ai e se tagata o loo faatautaia ia faagutu e taitaiina lemu atu ai se vaega o solofanua (itulau 100). E sili le atamai o le tagata o loo faatautaia, ma e mulimuli le solofanua i le taitaiga a le tagata o loo faatautaia, e pei lava ona silafia e le Alii le mea e sili ona lelei mo i tatou, ma e mafai ona tatou fiafia pe a tatou mulimuli ia te Ia. O le faagutu e pei lava o uunaiga a le Agaga Paia.O anafea na e lagonaina ai le taialaina o oe e le Agaga Paia? Na faapei sona lagona?

O Jean A. Stevens, fesoasoani muamua i le au peresitene aoao o le Peraimeri, na faamatalaina se tala e uiga i se tamaitiiti na misi le pasi mulimuli o le aso ma sa savali i le fale (itulau e 81). I le tele o maila o totoe e alu ai, sa fefe o ia ma tootuli e tatalo. I se taimi mulimuli ane, na uunaia Sister Stevens e le Agaga e tu ma fesoasoani ia te ia. E mafai ona e mafaufau i ni taimi na tali mai ai le Tama Faalelagi i au tatalo? Na faapefea ona e fesoasoani e tali se tatalo a se isi tagata?

Na aoao mai Peresitene Thomas S. Monson e tatau ona tatou “lototele e fai atu ai leai pe a tatau ai, le lototele e fai atu ai ioe pe a talafeagai ai, le lototele e faia ai le mea sao ona e sao.” A o e suesue i lana saunoaga (itulau e 66), mafaufau e uiga i luitau o loo e feagai ai. O le a se fuafuaga e mafai ona e faia e atiina ae ai lenei ituaiga o le lototele?

Na faamanatu mai ia i tatou e Elder Jeffrey R. Holland o le Korama a Aposetolo e Toasefululua faapea afai tatou te alolofa i le Faaola, o le a tatou tausia Ana poloaiga ma alolofa atu i isi e pei ona Ia faia (itulau e 6). E pei lava ona tatou faia lena mea, e tatau ona tatou tutu e sauni e puipui o tatou talitonuga “i le amio solia ma le agaalofa.” E te silafia se tasi e tetee i soo se tasi o ou talitonuga? E faapefea ona faaaloalogia oe ao e talanoaina ma puipuia na talitonuga?

O le tele o failauga na talanoa tuusa’o atu i le autalavou. Mo se faataitaiga, na tuuina mai e Elder Neil L. Andersen o le Korama a Aposetolo e Toasefululua ni nai fautuaga i le autalavou i le auala e manumalo ai i “asiosio faaleagaga,” e pei o le mauaina o le filemu i le malumalu (itulau e 18). A o e faitauina lana lauga ma isi lauga o le konafesi aoao, mafaufau e tusi i lalo ni manatu i le ala e tumau malosi ai.

O se tasi o mea leaga sili i lenei vaitaimi o ponokalafi. Na saunoa Linda S. Reeves, fesoasoani lua i le au peresitene aoao o le Aualofa, o faamama sili e tetee atu ai i lea ituaiga mea leaga o se molimau loloto ma faamaoni lea i le talalelei a Iesu Keriso (itulau e 15). O le a le malosi o lou faamama faaletagata lava ia?O le a se mea e mafai ona e faia e faamalosia ai?

Na aoao mai Peresitene Thomas S. Monson, a tatou malamalama i le “meaalofa lemafaatusaliaina” o le Togiola, ua faatumulia i tatou i le alofa mo le Tama Faalelagi, le Faaola, ma fanau uma a le Atua (itulau e 91). E mafai faapefea e lenei malamalama ona faaleleia au suesuega i le soifuaga o le Faaola ma le Togiola i le taimi o suesuega faaletagata lava ia ma faaleaiga o tusitusiga paia ma pe a i ai i le vasega i le lotu?

Na saunoa mai Peresitene Henry B. Eyring, Fesoasoani Muamua i le Au Peresitene Sili, o le tele o lona fiafia o loo ia nofo aitalafu ai i le tama o lona tama matua lea sa auai i le Ekalesia, auauna atu ma le faamaoni, ma tumau mausali e oo i le iuga, ma tuua ai mo lona aiga se talatuu o le faamoemoe (itulau e 22). Mafaufau e faia se lisi o tagata uma i lou aiga ma tusi i lalo po o a feagaiga ma sauniga e manaomia ona latou faaauau ai pea i le ala o le feagaiga. Fai se fuafuaga e fesoasoani ai i tagata o lou aiga ia mauaina isi o latou feagaiga. E mafai ona e suesueina auala mo au feagaiga ia sili atu ona taua lana matafaioi i lou olaga ina ia mafai ona e tuuina atu i lou aiga se talatuu o le faamoemoe.

Na tautino mai e Elder David A. Bednar o le Korama a Aposetolo e Toasefululua o mafatiaga e mafai ona taitai atu ai i tatou e faalagolago i “le amiotonu, alofa mutimutivale, ma le alofa tunoa o le Mesia Paia,” o le “o le a fesoasoani ia i tatou e tauave ma le faigofie a tatou avega” (itulau e 87). A o e faitauina lana saunoaga ma saunoaga amata i le itulau e 9, 18, 70, 81, ma le 106, vaavaai mo ni auala e mafai ai ona fesoasoani le Faaola ma Lana talalelei ia te oe e feagai ma luitau o le olaga.

O le mataupu aoaoina a le autalavou ia Me o loo taulai atu i perofeta ma faaaliga. I le avea ma se vaega o lau talanoaga faaletalalelei ma le autalavou i le fale ma i le lotu, mafaufau e suesue ia saunoaga mai ia Elder Lawrence E. Corbridge (itulau e 103) ma Marcos A. Aidukaitis (itulau e 108) o le Fitugafulu, ma vaavaai mo tali i fesili nei: Aisea na le tuua ai e tagata na tauleagaina Iosefa Samita o ia? E mafai faapefea ona tatou iloa le upumoni i se lalolagi ua faateleina ona osofaia ia aoaoga o le talalelei?