Devin G. Durrant

Ina ua valaauina Devin G. Durrant e avea ma fesoasoani lua i le au peresitene aoao o le Aoga Sa, e mafai e le toatele o tagata o le Ekalesia ona toe tepa i tua i aso o lona mamalu i se ofutaalo pasiketipolo a le Iunivesite a Polika Iaga.

O taaloga, ioe, na avea ma se matafaioi taua i le olaga o Peresitene Durrant. Na oo lava ina ia faaaluina se vaitau e tauva ai i le NBA e faasaga i tagata taaalo iloga i le Iunaite Setete. Ae ua sili atu o ia nai lo se tagata taalo afeleti tautaua: o se faifeautalai i Madrid, Sepania, o se toalua, o se tama, o se tama matua, o se tusitala, o se alii faipisinisi, o se tagata faamaoni, ma o le peresitene o le Misiona a Texas Dallas mo le lua ma le afa tausaga ua mavae.

Fai mai ai Peresitene Durrant, lea na fanau i le aso 20 o Oketopa, 1960, i Brigham City, Iuta, na taua le matafaioi na faia e lona olaga faatamaitiiti i le sauniaina o ia mo nei matafaioi taitasi o le olaga. O ona matua, o George ma Marilyn Durrant, o ni faiaoga talenia.

“E moni, sa la aoao atu e ala ia la upu—ae e moni lava, o aoaoga maoae sa ou mauaina i totonu o le aiga o le matauina lea o i laua i le ala sa la ola ai.”

Ua silafia lelei e Peresitene Durrant ma lona faletua, o Julie Mink Durrant, le taua o faiaoga malolosi i le sauniaina o faifeautalai i le lumanai.

“O [faifeautalai i le lumanai] ua aoaoina lelei e o latou matua i le aiga, ma o latou faiaoga i le lotu ma i polokalama maoae o le seminare ma inisitituti.”

O le polokalama o le Aoga Sa, sa ia faaopoopo mai, ua mafai ai e faiaoga ma tamaiti aoga o vaitausaga uma “ona aoao atu i le ala a le Faaola.”

Na faaipoipo Peresitene ma Sister Durrant i le Malumalu o Sate Leki i le aso 23 o Aperila, 1983, ma o ni matua o fanau e toaono ma fanau a fanau e toaono.

Ao lei valaauina i lona valaauga o se peresitene o le misiona, sa ia auauna atu o se epikopo, fesoasoani i le au peresitene o le siteki, sui o le au peresitene o le Aoga Sa a le siteki, ma le faiaoga inisitituti.

Sa ia maua se faailoga o le tagata malaga i Suesuega FaaAmerika mai le Iunivesite o Polika Iaga ma se MBA mai le Iunivesite o Iuta. O ia o le pule o le kamupani faatau fanua.