Matauina le Tulaga Alualu i Luma o Malumalu, Lagolagoina o Taitai Fou i le Konafesi Aoao

I le aluga o le ono masina ua mavae, “na agai i luma le galuega a le Ekalesia e aunoa ma se faalavelave,” na saunoa ai Peresitene Thomas S. Monson i lana saunoaga amata i le Konafesi Aoao lona 184 Faaletausaga a le Ekalesia.

I le toe manatunatu ai e uiga i le faapaiaga o le Malumalu o Gilbert Arisona i le aso 2 o Mati, 2014, tulimatai atu i le faapaiaga o le Malumalu o Florida Fort Lauderdale o loo loma, ma i le faatalitalia o le faamaeaina ma le faapaiaga o malumalu i le tele o vaega o le lalolagi i le faagasologa o le 2014 ma le 2015, na ta’ua ai e Peresitene Monson faapea afai ae faamaeaina uma ia malumalu ia na faasilasila atu talu ai nei, o le a 170 malumalu o loo faagaoioia i le lalolagi atoa.

“E ui o loo matou taulai atu a matou taumafaiga i le faamaeaina o malumalu na faasilasila atu talu ai nei ma o le a le toe faasilasilaina nisi malumalu fou i se taimi vave i le lumanai,” na ia saunoa ai, “o le a faaauau pea le faagasologa o le fuafuaina o manaoga ma le sailia o nofoaga mo ni malumalu i le lumanai. Ona toe fai atu ai lea o ni faasilasilaga i konafesi aoao i le lumanai. O i tatou o ni tagata fau malumalu ma ni tagata e o i malumalu.”

I le taimi o le konafesi, sa lagolagoina ai se sui fou o le Au Peresitene o Fitugafulu, fa au Pulega Aoao fou, se au peresitene aoao fou o le Aoga Sa, ma Fitugafulu Eria e 42.

Sa valaauina Elder Lynn G. Robbins i le Au Peresitene o Fitugafulu.

Sa lagolagoina Elder Jörg Klebingat o Kyiv, Iukureini, ma Elder Chi Hong (Sam) Wong o Hong Kong, Saina, e auauna atu i le Korama Muamua a Fitugafulu.O Elder Larry S. Kacher o Midway, Iuta, ma Elder Hugo E. Martinez o Arecibo, Puerto Rico, sa lagolagoina e avea ma sui o le Korama Lua a Fitugafulu.

O Elder Tad R. Callister, o le sa auauna atu i le Au Peresitene o Fitugafulu ma o se tasi o le Korama Lua a Fitugafulu, ua lagolagoina e avea ma peresitene aoao o le Aoga Sa, ma John S. Tanner ma Devin G. Durrant ma fesoasoani muamua ma le lua.

Tagai i se lisi atoa o le lagolagoina ma le faamalologa i itulau e 26–27, ma maua ai le tala o soifuaga o Elder Robbins, o Fitugafulu faatoa valaauina, ma au peresitene aoao o le Aoga Sa e amata i le itulau e 141.

O le vaiaso na muamua atu i le konafesi aoao, na faia ai le uluai sauniga aoao a tamaitai—mo tamaitai uma, tamaitai talavou, ma teineiti e valu tausaga ma matutua atu—i le Maota Autu mo Konafesi. O lenei sauniga e suitalaga i sauniga aoao a le Aualofa ma sauniga aoao a Tamaitai Talavou talu ai. O savali uma mai le sauniga a tamaitai e mafai ona maua i itulau e 116–28.

A o lumanai foi le konafesi, na toe faatulagaina ai ia sui faatonu aoao o Tamaitai Talavou, faatasi ai ma tuafafine na valaau mo le taimi muamua lava mai nofoaga e le gata i le Aai o Sate Leki, e aofia ai Peru; Aferika i Saute; Iapani; Pasila; ma Brooklyn, Niu Ioka, ISA. Faitau ia tala o soifuaga ma tagai i ata i lds.org/callings/young-women.

“Na aumaia e le Faaola i lenei lalolagi se savali o le alofa ma le agalelei i alii ma tamaitai uma,” na saunoa mai ai Peresitene Monson i le faaiuga o le konafesi aoao. “E tatau lava ona tatou mulimuli i Lana faataitaiga i taimi uma.”Na ia faamautinoa atu ia tagata o le Ekalesia ma isi o faafofoga mai “o loo manatu mai lo tatou Tama Faalelagi ia i tatou. O le a Ia taialaina i tatou ma faamanuiaina i tatou pe a tatou tuu atu lo tatou faatuatua ma le faalagolago ia te Ia.”