Elder Jörg Klebingat
Korama Muamua a Fitugafulu
O Elder Jörg Klebingat na ola i se olaga o le naunautai. E talitonu o ia i le usiusitai, tausia o poloaiga, ma mulimuli i uunaiga a le Agaga.
Na fanau i le aso 19 o Tesema, 1967, ia Klaus-Peteru ma Doris Elke Klebingat, na ola ae Elder Klebingat i Zweibrücken, Siamani, e aunoa ma le aafiaga a le talalelei. A o talavou, sa ia feiloai i se tagata o le Ekalesia i se konaseti o musika, ma na avea le toalua ma uo.
“Pe a ou asiasi atu i la’u uo fou, sa faagaeetia au i lona aiga,” na ia toe manatua. “Sa ou lagonaina le Agaga i lona aiga ma manao ina ia auai i le lotu.”
O le taimi o lena sauniga muamua a le Ekalesia sa ia faalogo ai i le Tusi a Mamona. Na tuuina atu e lana uo ia te ia se kopi ma lana molimau e moni, ma sa tuua e Elder Klebingat le sauniga ma le naunautai ia sailiili mo ia lava.
“Sa ou oo i se mea vaimea i le 1 Nifae ae ou maua la’u molimau e moni le tusi,” o le tala lea a Elder Klebingat. “O le mauaina o se molimau e uiga i le Perofeta o Iosefa Samita sa avea foi ma se taimi taua tele mo au. I la’u misiona, ou te fesili pea i au soa pe mafai ona ou faamatalaina lena vaega o le tala.”
Ao lei malaga atu i lana misiona i le Misiona a Colorado Denver, na auauna atu Elder Klebingat auauna atu i le ami a Siamani mo le 18 masina. Sa faamauina o ia ia Julia Poltorak i le Malumalu o Sate Leki, i le aso 21 o Tesema, 1992. E toatolu le la fanau.
Sa mauaina e Elder Klebingat se faailoga i le gagana Rusia mai le Kolisi o Ricks ma mulimuli ane, maua se tikeri o le matuaofaiva i uiga faalepulega mai le Iunivesite o Polika Iaga. Sa ia galue o se faufautua o le pulega o pisinisi mo Price Waterhouse ma Arthru Andersen ma i le tele o galuega mo le Ekalesia.
Ao lei maua lana valaauga, sa auauna atu Elder Klebingat o se sui o talavou nofofua matutua a le siteki, peresitene o le korama a toeaina, peresitene o Alii Talavou, fautua maualuga, peresitene o le paranesi, ma le epikopo. O le a faamutaina lana auaunaga o se peresitene o le Misiona a Ukraine Kyiv ia Iuni 2014. Sa lagolagoina o ia o se tasi o le Korama Muamua a Fitugafulu i le aso 5 o Aperila, 2014.