Fesoasoani ia Nofoaga Autu mo le Aoaoina o Faifeautalai e Faanatinati le Galuega o le Faaolataga
I le lalolagi atoa, ua saunia e nofoaga autu mo le aoaoina o faifeautalai e 15 ia le aoaoina o le silia ma le 85,000 o faifeautalai mai atunuu e 143. I se tuufaatasiga e aoaoina e faifeautalai ia gagana e 55 mai faiaoga e 1,600, ona auauna atu lea i le lua tausaga i ni misiona e 405 i le silia ma le 150 atunuu.
Faatasi ai ma le tuputupu ae i le aofai o faifeautalai talu mai le suia o tausaga manaomia ia Oketopa 2012, ua taulimaina e le NAF se aofaiga tele o faifeautalai nai lo se isi lava taimi muamua. Ma le le itiiti ifo ma le tasi le NAF i itulagi uma, e le goto lava le la i le aoaoina.
E masani lava ona taunuu faifeautalai i se NAF faatasi ai ma se faavae o le malamalama faalelotu na maua mai aoaoga i le aiga ma le Ekalesia. E tuuina atu e le nofoaga autu mo le aoaoina o faifeautalai ni aoaoga faaopoopo e aofia ai le auala e aoao atu i le ala na aoao ai Iesu Keriso ma le auala e valaaulia ai tagata ia mulimuli ia te Ia. E faataitai e faifeautalai ni tulaga faaleaoaoga, maua aoaoga o le gagana pe a talafeagai, faalogo i lauga o faigalotu faalevaiaso mai taitai o le Ekalesia ma le aufaigaluega o le NAF, ma auai i avanoa o le auaunaga.
O le NAF aupito sili ona tele o loo i ai lea i Provo, Iuta, ISA. E sauniaina aoaoga mo le faitau afe o faifeautalai i gagana e 55. O le NAF e lona lua le tele o loo maua lea i le Aai o Mekisiko, Mekisiko. Ia Iuni 2013 sa toe siitia atu mai se tamai fale i se lotoa e 90-eka lea na faofaleina se aoga maualuga maoti a le Ekalesia, o Benemerito de las Amerika. O le nofoaga sa i ai muamua na mafai ona faofaleina pe tusa ma le 125 faifeautalai i se taimi; o le nofoaga fou ua mafai ona faofaleina le silia ma le 1,000.
O loo i ai nisi NAF i Buenos Aires, Atenitina; São Paulo, Pasila; Santiago, Chile; Bogotá, Kolomupia; Santo Domingo, Dominican Republic; Preston, Egelani; Accra, Kana; Aai o Kuatemala, Kuatemala; Aukilani, Niu Sila; Lima, Peru; Manila, Filipaina; Johannesburg, Aferika i Saute; ma Madrid, Sepania.