Tad R. Callister

O le tele o tausaga ao lei valaauina i lona valaauga o i ai nei o se peresitene aoao o le Aoga Sa, na i ai se matafaioi taua o le Aoga Sa i le olaga o Tad R. Callister.

A o galue Brother Callister o se peresitene o le Aoga Sa i se uarota i le Iunivesite o Polika Iaga, na ia masani ai i lona toalua i le lumanai, o Kathryn L. Saporiti, lea sa ia faaipoipo i ai i le aso 20 o Tesema, 1968, i le Malumalu o Los Angeles.

O i laua o ni matua o ni afafine se toalua ma atalii e toafa; ma e toa 24 foi fanau a la fanau. “O le tele ia o mea lelei e tutupu pe a fai o oe o le peresitene o le Aoga Sa,” o le tala lea a Brother Callister.

Na fanau o ia i le aso 17 o Tesema, 1945, i Glendale, Kalefonia, ia Reed Eddington ma Norinne Callister, sa ia tautino mai o ia—e pei o Nifae—na fanau mai i ni “matua lelei.”

“O lo’u tama sa avea ma o’u epikopo a o ou tuputupu ae,” o le tala lea a Brother Callister. “E masani ona ia tauaveina solo ni tamai kata, ma e na te taulotoina upu ma mau ma Siekisipia.”

E pei o lona tama, na taulai atu Brother Callister i se galuega faaletulafono. Ina ua uma ona faauu i le tausitusi mai le Iunivesite o Polika Iaga, sa ia auai i le aoga faaloia i le Iunivesite o Kalefonia, Los Angeles, ma mauaina le faailoga o le matuaofaiva i le tulafono o lafoga mai le Iunivesite o Niu Ioka. Sa ia faigaluega o se loia i le ofisa loia a Callister & Callister.

I le taimi o lona valaauga, faatoa faamalolo mai lava Brother Callister mai lona valaauga i le au Peresitene o Fitugafulu ma i le Korama Lua a Fitugafulu, lea na ia galue ai talu mai le 2008.

A o lei oo i lena taimi, sa ia auauna atu o se peresitene o le Misiona a Kanata Toronto Sasae, Fitugafulu Eria, sui risone, peresitene o le siteki, epikopo, peresitene o le misiona a le siteki, peresitene o le korama a toeaina ma, o se alii talavou, o se faifeautalai i le Misiona a Setete a Atlantic Sasae.

O le tuuina mai o ni manatu faaalia e uiga i suiga o le a oo mai i mataupu aoaoina a tagata matutua o le Aoga Sa, na saunoa ai Brother Callister, “O le mataupu aoaoina, ioe, e sili ona taua, ae e le taua e pei o le auala o loo aoao atu ai tagata. O le mea aupito sili ona taua o lo tatou aoao atu i le ala a le Faaola, tatou te aoao atu e ala i le Agaga, ma tatou te aoao atu mo le liuaina.”