Elder Hugo E. Martinez
Karua ni Kuoramu ni Vitusagavulu
Ena 1982, erau a tiko ruarua o Elder Hugo E. Martinez kei na watina o Sisita Nuria Alvarez de Martinez, ena nodrau vuli vuniwai tiko mai Mississippi e Amerika, ena gauna e rogo mai kina ena nodrau matanikatuba e dua na tukituki sega ni namaki.
Erau duri tu yani e rua na daukaulotu ni Momani.
“Keirau dolava vei rau na neitou vuvale, ia keirau sega tu ni bau kila e dua na ka me baleta na Lotu i Jisu Karisito ni Yalododonu Edaidai. Keirau sega mada ga ni bau kila e dua na ka me baleta na Mormon Tabernacle Choir,” e kaya ena matadredredre o Elder Martinez.
Ia, sa tekivu me voqa ena gauna vata ga vei rau na veiwatini gone na lesoni erau vakavuvulitaka na daukaulotu. Erau mani vakadonuya na nodrau veisureti ni papitaiso na daukaulotu.
“Keirau sega tale ni bau raivuki me tekivu mai na gauna oya.”
Ena ika 5 ni Epereli, 2014, sa kacivi o Elder Martinez ki na iKarua ni Kuoramu ni Vitusagavulu, sa yaco kina me imatai ni Vakaitutu Raraba mai na Caribbean. Ena ciqomi ni “vakadrukai” ena nona ilesilesi vou.
“Ia e dua na vakasama kamica ni vakacegu e ubi au ka laiva meu kila ni sa vakataulewa tiko na Turaga,” e kaya o koya.
Ni oti e dua veimama na yabaki mai na nodrau papitaiso, erau sa vauci ena Valetabu mai Salt Lake o Hugo kei Nuria Martinez ena ika 3 ni Okotova, 1983. Erau nodratou itubutubu e lima na gone ka lima na makubudrau yalewa.
A sucu o Elder Martinez ena ika 10 ni Janueri, 1957, mai Mayagüez, Puerto Rico, vei rau o Hugo E. Martinez-Sandin kei Daly Morales-Alamo de Martinez. Ni se cauravou, a digitaka me muria na cakacaka nei tamana me vuniwai. A rawata nona diqiri ni vuniwai mai na Univesiti mai Puerto Rico (1981) ka laki vakacavara nona vuli ena Univesiti kei Mississippi (1984). A vuniwai voli me yacova nona mai vakacegu ena 2004.
Ni oti vakalailai nona papitaiso, a kacivi me qasenivuli ni Wilivola ni Sigatabu vei ira na itabagone. A qai veiqaravi e muri vakabisopi, daunivakasala ena mataveiliutaki ni iteki, peresitedi ni tikina, ka daunivakasala ena mataveiliutaki ni Tabana ni Kaulotu na Puerto Rico San Juan. A vakatulewa talega o koya ena Tabana ni Kaulotu na Guatemala Guatemala City Central ka veiqaravi voli vaka-Vitusagavulu ni iWasewase ena gauna a kacivi kina me Vakaitutu Raraba.