John S. Tanner

Mai na nona gauna ni gone, sa dau kunea o John Sears Tanner na marau ena vuli.

Na marau oqori sa tara yani nona bula vakavuli, cakacaka, kei na nona madigi e vuqa me vakavuvulitaka na kosipeli: taumada vakadaukaulotu ena Tabana ni Kaulotu na Brazil South oti qai bisopi, peresitedi ni iteki, lewe ni matabose e cake, qasenivuli ena Uto ni Kosipeli, peresitedi ni Tabana ni Kaulotu na Brazil São Paulo South (ka sa na mai cava ena vulaikatakata oqo), ia oqo sa imatai ni daunivakasala ena mataveiliutaki raraba ni Wilivola ni Sigatabu.

“Ni caka vakadodonu na [veivakavulici], ena tiko kina na Yalo Tabu ko na vakila na marautaki ni vuli; o na vakila ni vaka o tu ena vanua tabu,” e kaya o Peresitedi Tanner.

A sucu mai Salt Lake City e Utah, ena ika 27 Julai, 1950, vei rau o William Coats Tanner Jr. kei Athelia Sears Tanner, a tubu cake o Peresitedi Tanner mai South Pasadena, California e Amerika, ka ikalima vei iratou e 13 na gone. Erau tauyavutaka nona itubutubu e dua na draki vutuniyau vakavuli ena loma ni vuvale, oka kina e dua na yavu qaqa vakosipeli. “Au sega ni nanuma rawa e dua na ka au vulica mai valenilotu au se bera ni vulica oti mai vale,” e kaya o koya A tara cake talega nona taleitaka na ivola ka tekivu ena nona segata e dua na diqiri ni Vosa Vakavalagi ena Briigham Young University kei na dua na doketa ni vosa Vakavalagi ena Univesiti kei California, Berkeley.

A sotavi Susan Winder ni tiko voli mai BYU. Erau a tara cake e dua na veitokani kaukauwa ka laki basika kina na veidomoni. Erau a vakamau ena Valetabu e Salt Lake ena 1974. Erau susuga cake vata e lima na gone.

A tekivutaka o Peresitedi Tanner na nona cakacaka vakavuli vakaivukevuke ni parofesa ena Florida State University. A yaco me qasenivuli ena BYU ena 1982; sa cakacaka tiko mai kea me tekivu mai na gauna oya vakaivukevuke, itokani, qai parofesa ni vosa Vakavalagi, ka qai jeameni ni tabacakacaka ka ivukevuke ni peresitedi ni vuli.

Na tiki bibi duadua ni veivakavulici ena kosipeli, e kaya o koya, e yaco mai na dua na ka a vulica ni se qai tekivu cakacaka: me kakua ni yaco na veivakavulici ena dela ni rere se sasaga ia ena dela ni loloma —ena loloma cecere, na loloma savasava i Karisito.