Na Veivakavulici ena Lotu e Dodonu me Muria na iVakaraitaki nei Karisito

“Eda sa tovolea tiko me vakamurimuria na we ni yavana na iVakabula ena veivakavulici,” e kaya na peresitedi raraba ni Wilivola ni Sigatabu, o Tad R. Callister, ni oti na koniferedi raraba.

Kena ibalebale oya na tarogi ni taro veivakauqeti ka na vukea na tamata me ra saumaki mai, e kaya o koya. Na takete sai koya “me ra vukei me ra ciqoma ka vakila na Yalo ni kosipeli ena nodra bula.”

E kaya o koya ni vakauqeti koya na Ia Mo Lako Mai, Mo Muri Au, na nodra lewenivuli ena initaneti na itabagone ka okati kina na vosa eso mai na iotioti ni koniferedi ka vakakina na tabana vakaitukutuku ni Lotu. E kaya o koya, sa vakaisosomitaki na veivakavulici ena vosa ki na nodra vakaitavi, “e matata ni da sa toso mai na kena vakavulici ga na lesoni ki na kena tovolei me vakaduavatataki ena nodra gagadre na gonevuli ena kalasi.”

E vakuria ni Ia Mo Lako Mai, Mo Muri Au e vukea na kena yaco na saumaki mai ka sega ni soli itukutuku walega “Au vakabauta ni da na susuga cake e dua na itabatamata itabagone ka ra na qasenivuli uasivi duadua e vuravura,” e kaya o koya, “Baleta ni ra sa sotava tiko ena gauna ni nodra itabagone na veika oqo ka sega ni waraka tiko me ra sa qase … me ra qai vakila na ivakarau e rawa kina na veivakavulici mana kei na veiciqomi.”

O Jisu Karisito na Qasenivuli Levu, e kaya o Baraca Callister, kei na noda veivakavulici ena lotu e dodonu me kauti ira na tamata vei Karisito. Ena nona vakabibitaka na gagadre me vakavuvulitaki vakamatata ka vakadodonu na ivunau, e kaya kina o koya ni “veigauna kece eda tovolea kina me da vakatotomuria na iVakabula, eda sa toka kina ena vanua vinaka.”