Veivuke na Koronivuli ni Vakavakarau ki na Kaulotu ena Vakatotolotaki ni Cakacaka ni Veivakabulai

E vuravura raraba, e 15 na koronivuli ni vakavakarau ki na kaulotu era vakarautaka na veituberi vei ira e sivia na 85,000 na daukaulotu mai na 143 na matanitu. Na kena isoqoni taucoko era vulica na daukaulotu e 55 na vosa mai vei ira e 1,600 na dauveivakavulici, ka ra qai laki veiqaravi ena rua na yabaki ena 405 na tabana ni kaulotu ena sivia na 150 na matanitu.

Ena tubu ni iwiliwili ni daukaulotu me tekivu mai na gauna sa veisautaki kina na yabaki ena Okotova ni 2012, era sa qaravi tiko ena vei KVK na iwiliwili levu cake ni daukaulotu mai na veigauna kecega. Ni dua se sivia na KVK ena veiwase ni vuravura yadua, e sega ni dua na siga me sega kina ni vakayacori na veituberi.

Era yaco mai na daukaulotu ena KVK ka ra sa vakayavutaki mai ena kila ka vakalotu era rawata ena nodra dusimaki mai na nodra veivale kei na Lotu. E vakarautaki ena veikoronivuli na ikuri ni veituberi ka okati kina na ivakarau ni veivakavulici e veivakavulici kina o Jisu Karisito kei na ivakarau me ra sureti kina na tamata me ra muri Koya. Era dau vakatovotovotaka na daukaulotu na veivakavulici, vakavulici ena vosa kevaka e gadrevi, vakarorogo ki na lotu vakamacawa era vosa kina na iliuliu ni Lotu kei na vakailesilesi ni KVK, ka vakaitavi ena veimadigi ni veiqaravi.

Na KVK levu duadua e tiko mai Provo, Utah e Amerika. E vakayacori kina na veituberi vei ira e udolu na daukaulotu ena 55 na vosa. Na ikarua ni KVK levu duadua e tiko mai Mexico City, Mexico. Ena June 2013 a tokitaki kina mai na dua na vale lailai ki na dua na koronivuli 90 na eka ka dau tu kina e dua na koronivuli torocake taukena na Lotu, na Benemerito de las Americas. Na vanua a tiko kina e liu e rawa ni tawana e 125 na daukaulotu ena dua na gauna; na ka vou e rawa ni tawana e 1,000.

Eso tale na KVK era tiko mai Buenos Aires, Argentina; São Paulo, Brazil; Santiago, Chile; Bogotá, Colombia; Santo Domingo, Dominican Republic; Preston, England; Accra, Ghana; Guatemala City, Guatemala; Auckland, New Zealand; Lima, Peru; Manila, Philippines; Johannesburg, South Africa; kei Madrid, Spain.