Elder Jörg Klebingat
Matai ni Kuoramu ni Vitusagavulu
Dau bulataka o Elder Jörg Klebingat na bula gugumatua. E vakabauta o koya na talairawarawa, rokova na ivakaro, ka muria na veivakauqeti ni Yalo.
A sucu ena ika 19 ni Tiseba, vei rau o Klaus-Peter kei Doris Elke Klebingat, a tubu cake o Elder Klebingat mai Zweibrücken e Jamani, ka sega kina na veivakauqeti ni kosipeli. Ni yabaki tinivakacaca, a sota kina kei na dua na lewe ni Lotu ena dua na vakatasuasua, ka yaco me rau veitokani.
“Niu gade vei noqu itokani vou, e tarai au nona matavuvale,” e nanuma lesu o koya. “Au vakila e nodratou vale na Yalotabu kau vinakata meu lako ki lotu.”
Ena imatai ni lotu oya a rogoca kina me baleta na iVola i Momani. A solia vua nona itokani e dua na ilavelave kei na nona ivakadinadina ni dina, e biubiu mai na soqoni oya o Elder Klebingat ni sa lomana voli me raica vakataki koya na dina.
“Au sa yaco tu ena dua na vanua ena 1 Nifai ena gauna au rawata kina na noqu ivakadinadina ni dina na ivola,” e kaya o Elder Klebingat. “Noqu rawata talega e dua na ivakadinadina me baleta na Parofita o Josefa Simici e dua na gauna talei vei au. Ena noqu gauna ni kaulotu, au dau kerea tu ga vei ira noqu itokani ke rawa niu talanoataka na tiki ni italanoa oya.”
Ni bera nona mai kaulotu tudei ena Tabana ni Kaulotu na Colorado Denver, a veiqaravi mada o Elder Klebingat ena mataivalu ni Jamani ena 18 na vula. A vauci vei Julia Poltorak ena Valetabu e Salt Lake ena 21 ni Tiseba, 1992. E tolu na luvedrau.
A rawata o Elder Klebingat e dua na diqiri ni vosa vaka-Rusia mai Ricks College qai muria e dua na diqiri na masters ena organizational behavior mai na Brigham Young University. A cakacaka vakadauvakasala ena cicivaki bisinisi vei Price Waterhouse kei Arthur Andersen kei na vica vata na itutu ena Lotu.
Ni bera ni kacivi oqo, sa veiqaravi oti o Elder Klebingat vakamata ni itabagone qase cake ni iteki, peresitedi ni kuoramu ni italatala qase, peresitedi ni Cauravou, lewe ni matabose e cake, peresitedi ni tabana, ka bisopi. Ena qai oti nona veiqaravi vakaperesitedi ni Tabana ni kaulotu na Ukraine Kyiv ena June ni 2014. A tokoni me lewe ni iMatai ni Kuoramu ni Vitusagavulu ena ika 5 ni Epereli, 2014.