របៀបសម្រេចគោលដៅអស់កល្បជានិច្ច
ដោយ អែលឌើរ រ៉ូបឺត ឌី ហែល
ក្នុងកូរ៉ុមនៃពួកសាវកដប់ពីរនាក់
ដកស្រង់ចេញពីសុន្ទរកថាចាប់ផ្ដើមមួយ ដែលបានធ្វើឡើងនៅសាកលវិទ្យាល័យ ព្រិកហាំ យ៉ង់ អៃដាហូ នៅថ្ងៃទី 11 ខែ ធ្នូ ឆ្នាំ 2004 ។
ខ្ញុំសូមណែនាំនូវគោលដៅដ៏សំខាន់បំផុតមួយចំនួននៅក្នុងជីវិតដែលនឹងផ្ដល់សេចក្ដីអំណរដល់អ្នក នៅពេលអ្នកបំពេញបេសកកម្មរបស់អ្នកនៅលើផែនដីនេះ — ជាគោលដៅអស់កល្ប ដែលនឹងជួយអ្នកឲ្យត្រឡប់ទៅរកព្រះវរបិតាគង់នៅស្ថានសួគ៌របស់អ្នកវិញដោយមានកិត្តិយស ។ គោលដៅទាំងនោះរួមមាន ៖
-
រៀបការនៅក្នុងព្រះវិហារបរិសុទ្ធ ហើយពង្រឹង ទំនាក់ទំនងគ្រួសារដ៏អស់កល្បតាមរយៈ ការធ្វើឲ្យកត្ដាជាច្រើននៅក្នុងជីវិតមានតុល្យភាពប្រកបដោយការអធិស្ឋាន ដូចជា គ្រួសារ កាងារ ការបន្តការអប់រំ ចំណង់ចំណូលចិត្ត និង ការកម្សាន្ត ។
-
រស់នៅតាមសាសនារបស់អ្នកដោយស្មោះត្រង់ និង ដោយគោរពប្រតិបត្តិ ហើយ ស្មោះត្រង់ចំពោះសេចក្ដីសញ្ញានៃបុណ្យជ្រមុជទឹក និង ព្រះវិហារបរិសុទ្ធរបស់អ្នក ដោយស្វែងរករឿងល្អៗនៅក្នុងជីវិតជានិច្ច ។
-
ប្រកាន់ខ្ជាប់ទៅលើទស្សនៈដ៏អស់កល្បដោយចងចាំថា រឿងទាំងឡាយនៃនគររបស់ព្រះ គឺជារឿងអស់កល្ប ហើយរឿងនៃលោកិយគឺជារឿងខាងសាច់ឈាម ឬជារឿងបណ្ដោះអាសន្ន ។
-
ចូរចងចាំដើម្បីផ្ដល់ការបម្រើដែលមានការលះបង់ខ្ពស់នៅក្នុងជីវិតអ្នក ហើយមើលថែដល់ជនខ្វះខាតដែលអាចត្រូវការជានិច្ចនូវសេចក្ដីស្រឡាញ់ និង ការគាំទ្រផ្សេងទៀតរបស់អ្នក ។
ទាំងនេះគឺជាគោលដៅសម្រាប់ជីវិតដែលតម្រូវនូវការផ្ដោតចិត្តទុកដាក់ និង ពេលវេលាដើម្បីសម្រេចបាន ។ ការដាក់គោលដៅទាំងនេះគឺមិនគ្រប់គ្រាន់នោះទេ យើងត្រូវតែដាក់ផែនការដើម្បីអនុវត្តវា ។
នៅយប់នេះ ឬថ្ងៃស្អែកសូមសញ្ជឹងគិតពីអ្វីដែលអ្នកចង់សម្រេចនៅក្នុងជីវិតរបស់អ្នក និង អ្វីទៅដែលជាគោលដៅរបស់អ្នកនោះ ។ ចំណាយពេលសរសេរវាទុក ហើយមើលវាឡើងវិញនៅឆ្នាំក្រោយៗទៀត ។ រួចចំណាយពេលពីរបីម៉ោងសួរខ្លួនឯងពីអ្វីដែលអ្នកអាចធ្វើដើម្បីសម្រេចគោលដៅទាំងនេះនៅថ្ងៃនេះ ថ្ងៃស្អែក សប្ដាហ៍ក្រោយ និង នៅខែខាងមុខទៀត ។
តើអ្នកជ្រើស ហើយកំណត់គោលដៅអស់កល្បដ៏សំខាន់ទាំងនេះដោយរបៀបណា ? ហើយថា តើអ្នកដាក់ផែនការដើម្បីសម្រេចវាដោយរបៀបណាក៏សំខាន់ផងដែរ ? ចូរចងចាំថា ៖ ពេលវេលាគឺជាកត្តាដ៏ចាំបាច់ — ហើយក៏សំខាន់ផងដែរ — នៅក្នុងការគណនារបស់អ្នក ។ ពីកន្លែងដែលអ្នកឈរនៅពេលនេះ វាហាក់បីដូចជាអ្នកមាននូវពេលវេលាដែលគ្មានកំណត់មួយ ដើម្បីសម្រេចបានរឿងអស់កល្បទាំងឡាយ ។
ពិតណាស់ មនុស្សគ្រប់គ្នាមានពេលវេលា ។ ប៉ុន្តែដោយព្រោះពេលវេលាចេះតែកន្លងទៅ វាពុំមែនមានន័យថាយើងកំពុងតែរីកចម្រើននោះទេ ។
« ជីវិតនេះគឺជាពេលវេលាសម្រាប់ឲ្យមនុស្សប្រុងប្រៀបខ្លួនទៅជួបនឹងព្រះ មែនហើយមើលចុះពេលវេលានៃជីវិតនេះគឺជាពេលវេលាសម្រាប់ឲ្យមនុស្សប្រព្រឹត្តការងារទំាងឡាយរបស់ខ្លួន » ( អាលម៉ា 34:32 ) ។
រឿងដ៏សំខាន់នោះគឺការ ជ្រើសសកម្មភាពទាំងនោះដោយឈ្លាសវៃដែលនឹងជួយយើងឲ្យសម្រេចបាននូវគោលដៅរបស់យើងដែលបានបំផុសគំនិតមកពីព្រះ រួចមានចរិតលក្ខណៈ និង ជំនឿរឹងមាំដើម្បីបដិសេធនូវអ្វីដែលនឹងអូសទាញ ឬបង្អាក់យើងពីទិសដៅអស់កល្បរបស់យើង ។
ខ្ញុំសូមថ្លែងទីបន្ទាល់ថា ពេលវេលារបស់យើងនៅលើផែនដីនេះនឹងល្មមគ្រប់គ្រាន់ ដើម្បីសម្រេចបាននូវការរៀបចំខ្លួនរបស់អ្នក ហើយធ្វើការងារនៅក្នុងបេសកម្មរបស់អ្នកក្នុងជីវិតនេះ — ប្រសិនបើអ្នកប្រើវាដោយឈ្លាសវៃ ។ ហើយគ្មានពេលវេលាណាល្អជាងពេលនេះឡើយដើម្បីធ្វើរឿងនោះ ក្នុងយុវវ័យរបស់អ្នក ( សូមមើលអាលម៉ា 37:35 ) ។