Tusitusiga Paia i lalo o Fetu

A o ou laitiiti, sa matou fiafia ma o’u tuagane e momoe i fafo i le taimi o le taumafanafana. Matou te fofolaina a matou ato moe i luga o le polotito o le fale, ona su’e lea o mamanu i fetu ma faalogologo i alisi a’o matou faagalegale momoe.

O se tasi po na ma o atu ai ma lo’u tuagane matua o Lale i fafo i le polotito. Sa ma taooto ma vaavaai atu i luga i fetu. O Lale sa le masani ona tautala soo, ae o lena po na ia fai mai ai e manao e faamatala mai ni tala ia te a’u. Sa ia faamatala mai ia te a’u tala mai le Tusi a Mamona, na amata mai ia Liae ma lona auaiga na tuua Ierusalema.

Sa ou faalogo muamua i tala mai le Tusi a Mamona i le Peraimeri, ae ina ua faamatala mai e Lale ia te a’u, sa ese lava. Sa pei na sili atu ona mo’i. A’o ou tilotilo a’e i fetu ma faalogologo i lo’u tuagane, sa ou lagona le mafanafana ma le fiafia i lo’u loto. E ui ina sa ou le iloaina i lena taimi, sa ou lagonaina le Agaga Paia o ta’u mai ia te a’u e moni le Tusi a Mamona.

O ni nai masina mulimuli ane, sa ou tau ai i lo matou fale i se tusi ata o tala mai le Tusi a Mamona. Ina ua amata ona ou faitauina, sa ou maua foi lea lava lagona mafanafana ma le faagaeetia lea na ou mauaina i le taimi na faamatala mai ai e Lale ia te a’u ia lava tala.

O ni tausaga mulimuli ane, a’o ou taumafai e filifili pe na i ai sa’u molimau, sa fai si o’u le fiafia ona ou te le’i mauaina se tali maoae pe malosi. Pe o le uiga ea o lenei mea sa le’i i ai sa’u molimau? Ona ou manatuaina lea o o’u lagona ina ua faamatala mai e lo’u tuagane ia te a’u ia tala mai le Tusi a Mamona, ma sa ou iloaina na ou iloa e moni le Ekalesia.

O se molimau e le o taimi uma e oo mai ai i se taimi maoae e tasi. E masani lava ona oo mai i ni taimi filemu se tele lea e musumusu mai ai le Agaga Paia ia i tatou e faapea, o nei mea ua moni.