Iloaina o le Siufofoga o le Perofeta
Miriam Ruiz, Iuta, ISA
I se po o se tasi Aso Sa pe a ma le tolu masina talu ona ou siitia mai mai lo’u atunuu moni o Mekisiko i le Iunaite Setete ou te aoga ai, sa titi solo lava la’u leitio i nisi o alaleo faasalalau i le taumafaiga e su’e ni musika lelei o le Aso Sa. A o o’u faalogologo i nisi o alaleo i le lotoifale, sa ou faalogoina se leo masani ma tuu ai loa.
Sa ou masalosalo o le leo o le siufofoga o Peresitene Gordon B. Hinckley (1910–2008), o le sa Peresitene i le Ekalesia i lena vaitau. Sa ou iloaina sa le o se mea na masani ai lo’u mafai ona iloaina o lona siufofoga. Sa masani ona ou faalogologo i konafesi aoao, faeasaite a le Ofisa o Aoga a le Ekalesia, ma isi faasalalauga a le Ekalesia e ala i le leo o faamatalaupu Sipaniolo e tautatala i luga a’e o le leo o le failauga. Ae o lea na ou iloaina le siufofoga i luga o le leitio o Peresitene Hinckley.
Sa le’i lelei tele la’u Igilisi e malamalama ai i le mea na ia saunoa mai ai, ae sa ou faalogologo pea i le leitio. O lona siufofoga sa aumaia ai se lagona o le toafilemu. Ina ua uma le lauga, sa fai mai le tagata faasalalau o le leitio, “Na faatoa o tatou faafofoga atu nei ia Peresitene Gordon B. Hinckely.”
Sa ou iloa e fetalai mai le Alii e ala i Ana auauna ma e tusa pe oo mai le savali i Lona siufofoga po o siufofoga o Ana perofeta, ua tutusa lava (tagai i le MF&F 1:38).
Sa ou mafaufau i le le masani ai ona ou iloaina le siufofoga o Peresitene Hinckley. O le faia o lea mea, na ou iloa ai sa ou manao i taimi uma ia mafai ona ou iloa le siufofoga e faaaoga e le Alii e fesootai ai ma Lana fanau—e tusa lava po o le a le auala.
Na fetalai le Faaola, “O a’u mamoe e faalogo mai i latou i lo’u leo, ua ou iloa foi i latou, ua latou mulimuli mai foi ia te au,” (Ioane 10:27).
I se lalolagi ua tumu i le tele o leo—tele o “alaleo”—e titi solo ai, e faamoemoe e mafai i taimi uma ona ou faaogatasiina ia iloa ai le siufofoga o lo’u Leoleo Mamoe ma Ana auauna ma ia naunau e mulimuli i a latou fautuaga.