O Le Fouvale o Satani
E alala le tusitala i Iuta, ISA.
O le a le aano tonu o le manatu na faaalia e Satani i le fono i le muai olaga?
Ata na tusia e le sirup/iStock/Thinkstock
A’o o’u talavou, sa amata ona ou matauina ai se matele o le fiailoa sa i ai i nisi o tagata o le Ekalesia. Pe a latou vaaia se tulaga na faaaogaina ai tulafono na malilie i ai ma taunuuga mo le le usiusitai (mo se faataitaiga, i aoaiga faale-Ekalesia, aoaiga faalematua, po o le faamalosia o tulafono o le misiona po o tulaga faatonuina o amioga i a’oga a le Ekalesia), e masani ona latou faapea mai, “Ae pe le o le auala ea lena a Satani? Pe latou te le o faamalosia ea tagata ia amiotonu?
O lenei tali sa faateia ai a’u i le taimi muamua—e mafai faapefea e se tagata ona mafaufau e faapea, o auala ua faamaoniaina mai e le Alii ma Lana Ekalesia e mafai ona avea ma se vaega o le “fuafuaga a Satani?” Talu mai lena mea ua ou iloa ai o malamalamaaga sese faapenei e uiga i le fouvale o Satani ma le Taua i le Lagi o le mea moni ua fai si taatele, e pei foi o le nanati o tuuaiga o le mea e foliga mai i lena fuafuaga i aso nei. O le mea e faanoanoa ai, o nei malamalamaaga sese i aoaoga faavae e mafai ona taitai atu ai i taunuuga faataumaoia.
Mo se faataitaiga, o nei malamalamaaga sese e mafai ona taitai atu ai nisi o matua e manatu e le mafai ona latou uunaia a latou fanau e auai i le lotu. E mafai ona taitai atu ai tagata o le Ekalesia ia lagolago le faamaonia o agasala matuia o le ola mama. Ma o nei lava malamalamaaga sese e mafai foi ona taitai atu ai nisi tagata o le Ekalesia e mafaufau faapea, o le osia ma le tausia o feagaiga ma tautinoga o le usiusitai e fai si feteenai ma le fuafuaga a le Atua, ae, o le mea e ese ai, o le usiusitai faapena i feagaiga e totonugalemu i le ata moni o le faaolataga a le Atua.
O Mea ua Ta’u Mai e Tusitusiga Paia
O nisi o manatu e uiga i le mea na folasia mai e Satani i le muai olaga e foliga mai e tele ina sau mai faiga anamua nai lo faaaliga moni e uiga i le mataupu. O le taunuuga, e aoga le toe foi i tusitusiga paia lava ia e saili mai ai mea na faaali moni mai e le Alii e uiga i lenei mataupu taua. I tusitusiga paia, o le vaega autu e uiga i le mea na folasia mai e Satani o loo i fuaiupu muamua o le mataupu e fa o Mose:
“Ma o Aʼu, o le Alii le Atua, na fai atu ia Mose, ua faapea atu: O Satani lena, o lē na e faatonu i le suafa o laʼu Toatasi na Fanaua, o ia lava lea sa i ai mai le amataga, ma sa sau o ia i oʼu luma, ma fai mai—Faauta, o aʼu lenei, auina atu aʼu, o le a avea aʼu mo ou atalii, ma o le a ou laveaiina tagata uma, ina ia leai se agaga e toatasi e se ese, ma e moni lava o le a ou faia lena mea; o le mea lea, ia tuu mai ia te aʼu lou mamalu.
“Ae, faauta, o loʼu Atalii Pele, o lē o laʼu Pele ma laʼu Filifilia mai le amataga, na fai mai ia te aʼu—Le Tamā e, ia faia lou finagalo, ma e a oe pea le mamalu e faavavau.
“O le mea lea, ona sa fouvale Satani ia te au, ma saili e faaumatia le faitalia a le tagata, lea na tuu atu e Au, o le Alii le Atua ia te ia, ma le tasi foi, ia Ou avatu ia te ia lou lava mana; i le mana o lau Toatasi na Fanaua, na Ou faia ai ia lafoina o ia i lalo;
“Ma sa avea o ia ma Satani, ioe, o le tiapolo lava lea, o le tamā o pepelo uma lava, e faasese ma faatauaso tagata, ma ta’ita’i faatagataotaua i lona loto, le toatele lava lea o i latou o e e le faalogo i lo’u leo” (Mose 4:1–4).
O le Tama o Pepelo Uma
Mai nei fuaiupu o loo manino ai sa le’i talosaga mai lo tatou Tama Faalelagi mo ni volenitia e fatufatuai ma faailoa mai ni fuafuaga eseese ma faatautava o le faaolataga, e pei ona manatu ai nisi. Ae, o le fuafuaga a lo tatou Tama Faalelagi, ma na Ia faailoa mai i Ana fanau agaga o e sa faapotopoto i le Fono Tele i le Lagi. O Iesu Keriso, o le sa “filifilia mai le amataga” e avea ma Faaola i lena fuafuaga, na tuuina mai ma le lotomaualalo ina ia lagolagoina le fuafuaga a le Tama Faalelagi, i lana fetalaiga “Le Tama e, ia faia lou finagalo [o lona uiga, o le fuafuaga].” O le tulaga lea na faia ai e Satani se fautuaga sa le taliaina ma manatu faapito ina ia sui le fuafuaga a le Tama Faalelagi ia tuuina mai le faaolataga atoa mo tagata uma (tagai i le Mose 4:1). Ae tatou te le’i talanoaina le auala sa ia tautino mai e ausia ai lenei mea, e taua le iloa o Satani o loo ta’ua i nei fuaiupu “o le tama o pepelo uma” (Mose 4:4). I se isi taimi o loo ta’ua o ia “o se pepelo mai le amataga” (MF&F 93:25). O le a tatou matuai valea pe a [tatou] manatu na ta’u mai e Satani le mea sa’o ina ua ia faia lenei tautinoga soonafai e uiga i le faaolaina o le lalolagi uma.
Afai tatou te malamalama i le ituaiga tagata ma le talaaga o Satani, o le a sili atu le talafeagai o le vaai atu ia te ia o le uluai tagata taufaavalea o loo taumafai e faatau mai ia i tatou se oloa na ia iloaina e le taitai mafai ona ia tuuina mai. Sa ia manatu e mafai ona ia tuuina mai ia i tatou uma le faaolataga pe afai o le a tatou mulimuli atu ia te ia nai lo o le fuafuaga na foafoaina e lo tatou Tama Faalelagi mo lo tatou faaolataga, ma sa lagolagoina e lo tatou Faaola o Iesu Keriso.
O le mea na folasia mai e Satani o se pepelo. E le mafai ona faatinoina. Sa le o se sui aoga i le fuafuaga ua atoatoa a le Tama Faalelagi, ae nai lo o lena, sa o se mailei na tatao e maileia ma faaseseina ai tagata ia mulimuli atu ia Satani. I le faaiuga, sa o se fuafuaga o le faasalaga, ae le o se fuafuaga o le faaolataga.
Faatamaiaina o le Faitalia
O le mea taua, o nei fuaitau o mau e le o ta’ua manino mai ai pe na faapefea ona fuafua Satani e faataunuu lenei pepelo. Na pau lava le mea o loo ta’ua i tusitusiga paia o le, o le a “faaumatia le faitalia a le tagata” (Mose 4:3). Na fautuaina mai e Peresitene J. Reuben Clark (1871–1961), Fesoasoani Muamua i le Au Peresitene Sili, ni auala taua se lua mo le mea na faailoa mai e Satani e fai, ma faamanatu mai ia i tatou e leai se tasi o ia mea e lua na ono aoga. Sa ia faamalamalama mai: “A’o o’u faitau i tusitusiga paia, sa manaomia i le fuafuaga a Satani se tasi o ni mea se lua: A le o le faamalosia o le … tagata, po o o le faasaoina o tagata i le agasala. Ou te fesiligia pe mata e mafai ona faamalosia le atamai o le tagata. E mautinoa lava e le mafai ona faasaoina tagata i le agasala” (i le Conference Report, Oct. 1949, 193; siiina mai i le Doctrines of the Gospel Student Manual [2010], 15).
E ui e leai se tasi o nei auala e aoga, ae ua tatou vaaia elemene o taumafaiga ma auala taitasi a Satani i aso nei. Mo se faataitaiga, ua faaaogaina le faifaamalosi ma le fosi i aso nei e tagata saua e sailia le pule i malo, ma o tagata faiupufai tetee o e ua saili ia faatapulaaina le saolotoga o mea tau tapuaiga ma faamalosia tagata e talia amioga leaga. Ua matuai tausalaina e le Alii le faaaogaina o le “pule po o le puleaga po o le faamalosi i luga o agaga o le fanauga a tagata, i soo se tikeri o le amioletonu” (MF&F 121:37).
Ae peitai, ua faamalamalama mai foi e le Alii e faapea, o le mana ma le aafiaga e mafai ona faaaogaina e faamalosiauina ai le amiotonu e ala i le faatauanau ma le alofa, aoaiga amiotonu, ma taunuuga talafeagai (tagai i le MF&F 121:41–43). O lenei faamaninoga taua ua faaalia ai o le faataunuuina o aoaiga e tatau ai faale-Ekalesia ma faalematua, faamalosia o tulafono ma tulaga faatonuina i misiona ma aoga a le Ekalesia, ma le faavaeina o tulafono amiotonu i faalapotopotoga, o faiga uma ia ua faamaoniaina e le Alii ma e le o se vaega o le “fuafuaga a Satani.” O le faamamaluina o le faitalia e le o lona uiga o le taliaina o le leai o ni tulafono.
O le auala lona lua o le faiga na faailoa mai e Satani e faasaoina ai tagata uma o loo faamatalaina i le Lomifefiloi o le Tusi Paia: “Sa mananao Lusifelo ma e na mulimuli ia te ia ia otometi le oo mai o le faaolataga ia i latou uma o e o mai i le olaga nei, e aunoa ma le manatu i le mea e manao i ai le tagata lava ia, faitalia, po o le tuuto e ofofuaina mai” (“Taua i le Lagi”). I se isi faaupuga, o le isi faaliliuga, na faailoa mai e Satani ia faasaoina i tatou uma, e le afaina po o a mea na tatou faia. O lenei mea o le a faatamaia ai le faitalia e ala i le faia o se mea e leai se aoga. Ana faapea e aveeseina uma ia taunuuga o a tatou filifiliga ma maua e tagata uma le taui tutusa, o lona uiga o a tatou filifiliga o le a leai se aoga ma faatamaiaina ai lo tatou faitalia.
O lenei faaliliuga o le auala na fuafua Satani e faasaoina ai i tatou, ua faapea foi ona vaaia i le tele o ana taumafaiga ma auala ua tatou masani ai i aso nei. E le o aunoa ona folafola mai e Satani i tagata e mafai ona latou ola i se olaga o le agasala ae o le a faasaoina lava, po o le, e mafai ona latou maua le fiafia i le amioleaga. O lenei savali faatosina o le faigofie ona faaolaina ma o se olaga i le agasala ua matuai taatele i aso nei, e pei ona sa i ai le folasaga a Satani i le Taua i le Lagi lea “e toatele na mulimuli atu ia te ia” (Aperaamo 3:28).
Ua mafai ona tatou iloa e ala i nei faataitaiga, o le folasaga a Satani e le’i tele lava sona suiga talu mai lava le muai olaga. O loo faaauau pea ona pepelo Satani i tagata e ala i le folafola atu ia i latou, afai latou te mulimuli atu ia te ia, o le a faaolaina i latou, po o le a fiafia, po o a lava isi mea latou te fia faalogo i ai. O loo faaauau foi ona ia faaaogaina le fai faamalosi e taumafai ai e fosi ona manatu ma faiga amioletonu i luga o isi. O le mea lea, “o loo faaauau pea le taua i le olaga nei … o loo tau pea lava ia faafitauli, ma o loo lamatia pea lea lava faaolataga” (Lomifefiloi o le Tusi Paia, “Taua i le Lagi”).
O Se Fuafuaga o le Fouvale
Atonu o le auala aupito faigofie e faamatala ai le fuafuaga a Satani, e le faavae lea i faamatalaga o masalosaloga e uiga i le mea na folasia mai e Satani e fai, ae e faatatau i le mea na taitai atu ai e lana fuafuaga o ia ma e na mulimuli ia te ia e fai moni—o le, fouvale. O loo ta’u faafia mai e tusitusiga paia sa fouvale ma le iloa ia Satani i le Atua. Mo se faataitaiga, na tautino mai e le Alii e faapea “sa fouvale Satani ia te a’u” (Mose 4:3); o “se agelu a le Atua o le sa i le pule i luma o le Atua, o le sa fouvale i le Alo e Toatasi na Fanaua” (MF&F 76:25); ma le “sa fouvale o ia faasaga mai ia te a’u, fai mai, Tuu mai ia te a’u lou mamalu, o lo’u mana lea” (MF&F 29:36).
Mai nei fuaiupu ua manino ai o le folasaga a Satani sa le o se fautuaga mama ia sui ai le fuafuaga a le Atua. Sa o se fouvalega, o se teteega, o se taumafaiga tetee e faatoilalo le Atua ae ona pulea le lagi. O i latou o e na mulimuli ia Satani na alagaina le taua i le lagi ma faia i latou lava ma fili i le Atua. Sa faatamaia lo latou faitalia ona na latou mumusu e filifili le “ saolotoga ma le ola e faavavau, e ala i le Puluvaga sili,” ae na latou filifilia le “faatagataotauaina ma le oti, e tusa ma le faatagataotauaina ma le mana o le tiapolo; ona ua saili o ia ia pagatia tagata uma e pei o ia lava” (2 Nifae 2:27). O le taunuuga, “sa faaliliu ese foi e ia mai [le Atua] le tasi vaetolu o au o le lagi ona o la latou faitalia” (MF&F 29:36).
I se isi faaupuga, o le auala aupito faigofie e iloa ai le fuafuaga a Satani o le, o se fuafuaga o le fouvalega ma le le usiusitai i le Atua. O le eseesega, na aoteleina e le Atua ia Lana fuafuaga i upu nei: “Ma o le a tatou tofotofoina ai i latou, e vaai pe latou te faia mea uma o soo se mea e poloaiina ai i latou e le Alii lo latou Atua” (Aperaamo 3:25). Ma le isi, “Matou te talitonu e ala i le Togiola a Keriso, e mafai ai ona faaolaina tagata uma, e ala i le usiusitai i tulafono ma sauniga o le Talalelei” (Mataupu Faavae o le Faatuatua 1:3). O lea la, o le fuafuaga a le Atua o se fuafuaga o le usiusitai ma le amiotonu, ae o le fuafuaga a Satani o le fuafuaga o le le usiusitai ma le fouvale.
Iloaina o le Fuafuaga
O le malamalama lelei i le eseesega i le va o le fuafuaga a le Atua ma sini a Satani o le a fesoasoani tatou te atili iloatino lelei ai po o ai o loo ma o ai foi e le o mulimuli moni ia Satani. O le a fesoasoani tatou te aloese ai i le tuuaia o i latou o e uunaia le amiotonu ma faalauiloa atu le usiusitai i le mulimuli atu i le fuafuaga a Satani ae o le mea moni o loo mulimuli i le fuafuaga a le Atua. O le a faaalia ai foi i latou o loo mulimuli moni i le fuafuaga a Satani i aso nei.
O i latou o e tetee ma fouvale faasaga i le Atua ma Ana perofeta, o i latou o e saili e sui le fuafuaga a le Atua, o i latou o e poloaiina le tuu maualalo o tulaga faatonuina o le amiotonu ma saili e faamalosia isi e talia amioga le mama, ma i latou o e saili e faasese tagata i le faatalitonuina o le amioleaga o le fiafia lea, ma e mafai ona tatou maua le faaolataga i le agasala, ua latou lagolagoina uma ni elemene eseese o le fuafuaga o le fouvalega a Satani.
Talosia ia tatou mulimuli i le fuafuaga moni a le Tama Faalelagi, o se fuafuaga o le faaolataga “e ala i le Togiola a Keriso, ma e ala i le “usiusitai i tulafono ma sauniga o le Talalelei” (Mataupu Faavae o le Faatuatua 1:3).