Ia Manatua o le Latou Filifiliga Lena
O le faitalia e a tagata uma lava, e aofia ai i latou o e e te valaauliaina e aoao e uiga i le Ekalesia.
Ata na tusia e Beth M. Whittaker
A’o e valaauliaina isi e aoao e uiga i le talalelei, e taua ona iloa o loo i ai foi o latou faitalia e filifili ai pe talia pe leai lau valaaulia. O lou faamanuiaina e le fuaina i le latou tali mai; e fuaina i lau tautinoga e faasoa atu.
Afai la o le faamanuiaina e le fuaina e ala ia i latou o e fai mai ioe, po o e na papatisoina, o le a la le mea e tatau ona e taulai atu i ai a’o e fatuina ni sini mo le galuega faafaifeautalai? Taula’i atu au vaaiga i mea e mafai ona e faia nai lo o le ala e tali mai ai isi. Ia manatua, o loo ia te oe foi le faitalia. E mafai foi ona e filifili e:
Ia tuu atu soo le valaaulia, ma ia valaaulia tagata uma. Talu ai e faigata ona iloa muamua po o ai o le a fia iloaina pe le fia iloaina foi le talalelei, ia faasoa atu e le aunoa au valaaulia ma ia faasoa atu i ni tagata se toatele e te mafaia ai, ae ia gauai faapitoa atu i uunaiga a le Agaga. Tatou te manuia o ni faifeautalai pe a tatou valaauliaina tagata e aoao ma talia le upumoni.
Tumau i le agaga faauo. Afai e teena e se tagata se valaaulia e aoao atili, ia faaauau pea ona e faaaloalo ma agalelei. Ia faatumauina pea faauoga pe afai e maualuluga pea ia tulaga faatonuina. Ia faasafua atu le alofa faaKeriso i tagata uma e te mafaia ai, e tusa lava pe latou te le malamalama i mea uma e te talitonu i ai ma faia.
Ia tumau le faamaoni. Na sili ona lelei le fetalaiga a le Faaola: “Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi.” (Mataio 5:16). Ia alofa i le talalelei ma ola i le talalelei, ma o le a le umi ona e maua lea o ni tagata o e e fia iloa le mafuaaga ma o e ua saunia e talia le talalelei.
Ia finafinau pea ma le onosai. E pei ona faaalia i le tala o loo i le itu taumatau, o nisi taimi e manaomia ai ni valaaulia se tele ona faatoa oo lea i le taimi tatau. Ia faaauau pea ona tatala le faitotoa, faaauau pea ona faaauo atu, ma aua ne’i faavaivai. O loo silafia e le Alii au taumafaiga ma o le a Ia faamanuia ia te oe. (Tagai MF&F 98:2.)