Tuu Atu Valaaulia ma Toe Tulitatao
Faataitai i auala faigofie nei e 11 e faasoa atu ai le talalelei i talanoaga o aso uma.
Afai e te manao e faasoa atu le talalelei ae e te popole pe e te le o mautinoa foi le auala e fai ai, o le tusiga lenei e mo oe. O le faasoaina atu o le talalelei e sili atu nai lo na o le valaaulia o uo e feiloai ma faifeautalai. O se manatu manaia tele lena, ae e tele isi mea e mafai ona e faia e “valaaulia ai isi e o mai ia Keriso” (Tala’i La’u Talalelei: O Se Taiala mo le Galuega Faafaifeautalai [2004], 1). Ma e faigofie atu nai lo le mea o loo e mafaufau i ai. Atonu o le a fesoasoani se tala faatatau i le lakapi faaAmerika.
O tagata taaalo lelei e iloa le auala ma le taimi e pasi ai le polo i tagata o le latou au ia latou maua ai se avanoa e o ai i luma. O le valaaulia o isi e aoao e uiga i le talalelei e pei lava o le pasiina o le polo, ae nai lo le tuuina atu ia i latou o se avanoa e sikoa ai, ua e tuuina atu ia i latou se avanoa e o mai ai ia Keriso.
O nai faataitaiga nei e te amata ai: Tatalo mo musumusuga ma ia fatufatuai a’o e fetuunaia nei manatu ia fetaui ma manaoga a au uo po o tulaga. Ona faamalosiau atu lea ia i latou!
Valaaulia se uo i le Mutuale
E i ai sau uo e matuai fiafia i taaloga. A e faalogo loa o le vaiaso lenei o le gaoioiga a le Mutuale o se po o taaloga, ona e iloa lea o le avanoa lelei tele lea e valaaulia ai o ia.
Fai atu i se uo e fesoasoani ia te oe e galulue i se galuega faatino o le Alualu i Luma o le Tagata Lava ia po o le Tiute i le Atua.
A o e fuafuaina lau galuega faatino tele, e te iloa ai o le a e manaomia le fesoasoani, o lea ia e filifili e talosaga atu i nisi o au uo le lolotu e fesoasoani atu. O lenei mea e mafai ona e maua ai le avanoa e faamatala atu ai le pogai e te auauna atu ai, ma e mafai foi ona e maua le fiafia i le auauna atu faatasi.
Valaaulia se uo e lua te o i se siva a le Ekalesia
Ua valaaulia oe e lau uo lelei e te lua tafafao i le Aso Faraile nei, ae e i ai se siva a le Ekalesia i le po lena. Nai lo o le teena o lana valaaulia, tago e valaaulia o ia i le siva!
Ta’u atu i se tagata e uiga i le Tusi a Mamona
O loo i ai se sini a le tou uarota e faitau le Tusi a Mamona i le faaiuga o le tausaga, ia alu ma ave au tusitusiga paia i le aoga. Ua iloa atu e se tasi o au uo lau tusi ma fesili atu pe o le a le mea e faatatau i ai, ona e faamatala atu loa lea po o le a le Tusi a Mamona ma faasoa atu lau molimau e uiga i ai.
Faitau le tala a Kenifi o loo mulimuli mai i le tusiga lenei e iloa ai le mea na tupu ina ua vaaia se tagata o le Ekalesia i le aoga ma se Tusi a Mamona.
Valaaulia se uo i le lotu
Na talosagaina oe e te aoaoina atu se vaega o le lesona i le Aso Sa. A fesili atu sau uo po o a au mea e fai i le faaiuga o le vaiaso, nai lo o le faamisi o au fuafuaga o le Aso Sa, ia e faamatala i ai o le a e aoaoina atu se vaega o le lesona i le lotu. Ua fiailoa lau uo, o lea ia e valaaulia o ia lua te o mai faatasi ina ia faalogo o e aoao atu.
Faaali atu i lou uo le Mormon.org
E tele ni fesili a au uo e uiga i o tatou talitonuga, o lea ia e faaali atu ia i latou le Mormon.org e fesoasoani e tali ai a latou fesili.
Faasoa atu se tusiga mai le Liahona
O se tasi o tusiga mai se lomiga lata mai nei o le Liahona ua faamanatu atu ai ia te oe se talanoaga sa oulua faia ma se tasi o au uo. Ia e faasoa atu ia te ia lau kopi o le mekasini (po o se sootaga i luga o le initoneti) ma valaaulia o ia e faitau i le tusiga.
Faasoa atu se mau i se tesi
I le taimi o lau suesuega o tusitusiga paia i le taeao, ua e tau ai i se fuaiupu o le a sili ona aoga i se uo sa oo i ni taimi faigata talu ai nei. Ua e auina atu ia te ia se tesi e faailoa atu ai o loo e mafaufau atu ia te ia ma na e tau i se mau atonu o le a fiafia i ai.
Valaaulia se tagata i le taumafataga o le afiafi
E fai e Tama lana supokeli lauiloa i le vaiaso lenei! Ua e matauina se tamaitiiti fou i lau aoga e foliga mai e tau leai ni ana uo, o lea na e filifili ai e valaaulia o ia i le taumafataga a le tou aiga. Afai o le po o se Aso Gafua, atonu e te talosagaina e nofo pe a uma mo le afiafi faaleaiga.
Valaaulia se uo e lua te matamata i le konafesi aoao
O loo e faalogologo i se lauga mai le konafesi aoao i luga o lau MP3 a’o e savali atu i le aoga. Ua fesili atu se uo po o le a le mea o loo e faalogologo i ai. E te tau atu ia te ia le mea sa’o—o loo e faalogologo i saunoaga a se perofeta soifua a le Atua. “O le a le uiga o lena mea?” ua fesili atu ai lau uo. E te faamalamala atu e uiga i perofeta ma aposetolo i aso nei, ona e fesili atu lea i lau uo pe fia auai atu faatasi ma oe ia Aperila e faalogologo i mea o loo saunoa mai ai na taitai.
Tuu atu i se uo le Mo le Malosi o le Autalavou
Afai e fesili atu se uo ia te oe pe aisea e te ola ai i tulaga faatonuina faapitoa, tuu atu ia te ia se kopi o le Mo le Malosi o le Autalavou ma talanoa i le ala e fesoasoani ai le ola i tulaga faatulagaina e te lagona ai le fiafia sili atu.
Faitau le tala a Hana o loo i le tusiga lenei e iloa ai le auala na ia faasoa atu ai le tamaitusi lenei i se uo.
Aua nei galo e tulitatao i ai
A uma ona valaaulia, o le isi laasaga e sosoo ai o le toe tulitatao. I le lapaki faaAmerika, o tagata taaalo lelei latou te iloa e le’i uma le latou galuega i le taimi latou te pasiina ai le polo—e tatau lava ona latou minoi pea ma ia avanoa [mai tagata o le isi au].
O le tulitatao e mafai ona faigofie e pei lava o le fesili atu i tagata o lau vasega po o a ni o latou manatu e uiga i le mau sa e faasoaina atu po o a foi ni lagona o lau uo ina ua uma ona lua o i le lotu.
Mo se faataitaiga o le auala na suia ai e le toe tulitatao le olaga o se alii talavou, siaki le tala a Kenifi.
Pe a e toe tulitatao i le maea ai o le valaauliaina o isi e aoao e uiga i ou talitonuga, ua e faaali atu ai e te popole mo lo latou fiafia. O le a latou lagonaina lou manao faamaoni e fesoasoani ma o le a latou lagona le lagona lelei e fesili atu ia te oe nisi fesili i le lumanai.