Tataro ao Umwantabu
E maeka te tia korokaraki i Utah, USA.
“Ba au reirei ngkami n aei, ngkana kam i tangitangiri.” (Ioane 13:35).
E tararake Dani ma e tii kona n noora taubukin te umwantabu ae tikauarerei. Aomata ake a kaina te aro ae kaokoro a roko ikai. E aki oota Dani bwa bukin tera ngkai a roroko n te aro aei ana utu, ma e taku Tamau bwa a na nako n te bwai ae aranaki bwa te Bowi n Nebonebo i Engiran.
“Tera te baenne?” e titiraki Dani.
“Bon te bowi ike a anene iai aomata, a wareware ni booki aika tabu, ao ni bootaki n tataro,” e taku Tamau. “Kanga te utu ae bubura n tokin te bong anne.”
E tangira aron teina anne Dani. Neienne ma ana utu a bon kawara Engiran. N te Tabati ae nako a nakon te uoote n te kawa ae York. N te Buraimwari ni kabane ataei a atai aekaki ni booki aika tabu ao anene n aron ae e ataia Dani. E ataia bwa te uoote are e kawaria bon mwakoron ana Ekaretia Iesu ae koaua, n aron ana uoote ni mweengana.
Ma te umwantabu aei e bon rang ni kaokoro man are e tataneiai iai. E noora te taibora ae uarereke ni kaonaki ma taian kentoro. Dani e matakuakina te ataeinimwaane ni kaura te kentoro.
“Bukin tera ngkai ko kaurai taian kentoro?” e titirakinna Dani.
E moangare te ataeinimwaane. “I kaura te kentoro ngkana I tataro ibukin bwaai aika a kakawaki. Bwa ngkai e ura te wiiki, au kantaninga bwa te tataro e na reitinako n ongora iai te Atua.”
A taraa n ae bon tein raoi taian kaentoro iroun Dani. E aki oota teutana, ma e tangiria ni kan ataa te riai. E wingare nakon te ataeinimwaane.
A tekateka iaontano Dani ma ana utu, ao n te tai ae waekoa e moanaki te bowi n nebonebo. E noora te ataeinimwaane naba arei tabeua te rinan raroana. Ngkanne e a ataia bwa akea naba teuana te kuna ae ataia are a aneneia aomata. Ngke a tataro, a wareware man te boki ae uarereke. A taraa ni kaokoro bwaai ni kabane nakon are e tataneiai iai ni karaoi.
Ma e rang nakoraoi te anene, e ngae ngke akea ae e ataia. Ngkanne e a teirake te mwaane ni wareware ni booki aika tabu. E kunnikainna n te ninira, n oneamwiin te kooti ao te neketai n aron ana bitiobi Dani. Ma ngke e tabe ni wareware, e a kunea Dani bwa e ataa te karaki! E wareka karakinan Iesu ngke e kamaiuia 10 reebera.
“Tamau,” e wirikiriki Dani, “I tangira te karaki aei.”
E wingare Tamau. “Ngai naba.”
Ngkanne te aomata are e kunnikainna n te ninira e karaoa te tataro. E butia te Atua bwa e na kakabwaiaianaake a aoraki ao a rang ni kainnano. N aron naba are e karaoia Dani! E bubuti naba te kakabwaia ae onoti iaoia taan kairiiri n ana aro. E uringnga Dani aron ana utu ni bubutia te Tama are i Karawa n taainako bwa e na kakabwaia Beretitenti Thomas S. Monson ao ana kauntira.
E roko te iango ae rau inanon Dani. E ataia bwa te Tama are i Karawa e tuangnga bwa E tangiriia ni kabane natina ao n ongo ni kabane aia tataro, e ngae ngke a nakon te aro ae e kakaokoro ao n aki karekea bwaninin te euangkerio.
Ngke a teirake bwa a nang nako, e a tuoa ana tareboon Tamau. E taraa n nanokawaki ngke e a wareki ana rongorongo. “E a mate Titita Monson,” e taku.
“O tiaki!” E waekoa ni karaoa ana tataro Dani ae tawe inanona bwa E na NAKORAOI Beretitenti Monson.
“Ko nako raoi?” e titiraki temanna. Bon te ataeinimwaane are mai i mwaaina. E ongo iroun Dani, ao e taraa n raraoma.
“E a mate Titita Monson,” e taku Dani. “Bon buun ara burabeti, Beretitenti Monson.”
“I kabwara au bure,” e taetae n nanoanga. “N na kaura te kentoro ibukina.”
E moangare Dani ao e karabwa. E taku neiei bwa e raoiroi iroun te ataeinimwaane ni karaoa te tataro ae onoti ibukin Beretitenti Monson. E ataia neiei bwa te Tama are i Karawa e na ongo ana tataro ao ana tataro naba te ataeinimwaane.