Aron karekean Te Wanawana

Ngkana e a kona n reke rongorongo aika koro mwaitiia iroura, ti na bon rang kainnanoa—te wanawana ni bairei n rinanon ao ni kinai n aron karaoan bwaai ake ti a tia n reiakin.

Aikai ti na uringi:

1. Ti riai ni ukoukora te rabakau.

2. A mwaiti aekakin te rabakau, ao e kona ni karaoaki n aro aika mwaiti aika kakaokoro.

3. (Te aomata) e karekea te rabakau n rorona ni kairake.

4. Te rabakau n atun te rongorongo teuana e aki kona ni karaoaki nakon atun rongorongo ake tabeua.

5. Te rabakau n te aonaaba, ngkai ni bwaai aika ririki aika mwaiti a rang kakawaki, e na rang kakawaki ngkana e kairaki n ana rabakau te Atua.

A kabwarabwarai booki aika tabu uoua aekakin te wanawana: ana wanawana te aonaaba ao ana wanawana te Atua. Ni kabwarabwaraan ana wanawana te aonaaba uoua kanoana aika raraoi ao aika buakaka. Kabwarabwaraana ae aki raoiroi, e kona ni kabwarabwaraaki bwa te koaua ae aki bwanin, ae renganaki ma te wanawana ao te kamangao, ni karekea nanona ae babakanikawai ke ae buakaka.

Iai teuana aekakin ana wanawana te aonaaba ae e aki rang ni buakaka. Ma te koaua e bon rang n ibuobuoki. Te wanawana aei e kainnanoaki rinanon te kamatebwai, iango, te taratara ni kamwatau, ao te mwakuri korakora. Bon te bwai ae e rangi ni kakaawaki ao n ibuobuoki ni bwaai ake ti karaoi. Karaoan ae raoiroi ao aomata aika raoiroi, e roko man are ti rinanona n rabwatara ae mamate.

Ae kakawaki riki, te wanawana are e uota te tokanikai n te aonaaba e riai n tauraoi n ibuobuoki nakon wanawanan te Atua ao n aki iangoia bwa e nakoraoi riki nakon wanawanan te Atua.

Akea te wanawana ae e kakaawaki riki nakon wanawana tabeua. Ti riai n reiakinna bwa ngkana iai te nakobuaka imarenan ana wanawana te aonaaba ao ana wanawana te Atua, ti riai n oki nakon ana wanawana te Atua.

N na tuang ngkami bwa kam na anai tabeua kanganga ake kam rinanona. Korea te rain i nuukan te beebwa. Karinani wanawanan te aonaaba iaon te maing ao wanawanan te Atua n te angatai. Korea te kanganga are e kaokoro ni kaineti ma aekakin wanawana aika uoua aikai.

Tera taian rinerine aika ko karaoi?

N tiekition 45 n te Doctrine ao Covenants, are e taekin bwaai ni kaineti ma Kauaokin te Tia Kamaiu, e a manga taekina riki karakinaia kibono ake tebwina te Uea ao ni katikuira ma taeka aikai: “Ma ibukiia ake a rabakau, ao n tia ni karekea te koaua, ao n tia n anaa te Tamnei ae Raoiroi bwa aia tia kairi, ao n tuai ni mwamwanaaki—e koaua ae I tuangko, a na aki koreaki ao ni karenakoaki n te ai, ma a na tei imwain ana bong” (tara D&C 45:57).

Ti na ukeuke bwa ti na karekea wanawanan te Atua. A mwaiti bwaai aika ti kona n reiakinna n te ai aei n te wanawana. I berita nakoim bwa ana kakabwaia te Uea e na buokiko ngkai ko ukoukora te rabakau, are wanawanan te Atua. E rang ingainga ni kan anganiira wanawana. Ao ngkana ti ongotaeka ao n tataro mwaaka n ukoukoria, e na bon roko.