Antai Am Boto?
E maeka te tia korokaraki i Washington, USA.
E ataia Ellie bwa antai ana boto, ma e bon rang maaku n taekinna.
“Stand by your conscience, your honor, your faith; stand like a hero” (Children’s Songbook, 158).
E tenaa ukin waebuana ma te nako n nano. Nei Fitz e katoai ni kawari taian teetike ao n titirakiniia ataein te reirei n tatabemaniia te titiraki, temanna i mwiin temanna.
“Antai am boto?” E titirakina Jeremy Nei Fitz.
E kaeka Jeremy n te tai ae waekoa. “Au karo!” e taetae ni kakatonga.
E matangare Nei Fitz. “Ao ngkoe, Sarah?”
E waekoakoa ma ana kaeka. “Abraham Lincoln.”
E bukibuki mwanawan Ellie ngkai e reitinako Nei Fitz n nakonako irarikia ataein te reirei. A tabe ni kakaraki n taekan aia boto ni kabanea aia bong, ao ngkai ataei ni kabane a kantaningaia n taekinna bwa antai aia boto―imatain te kiraati ae bwanin!
A taku Amber ao Justin bwa tinaia bon aia boto. E taku Walter bwa ana boto bon tibuna te mwaane. A taku ataein te reirei ake tabeman bwa aia boto bon te kiing ke te beretitenti.
Bon tii tabeman ataein te reirei aika tuai ni kawaraki iroun Nei Fitz i mwaain rokona iroun Ellie. E na bae n iangoa ana boto—ao ni karaoia n te tai ae waekoa.
E baraaki Ellie n tarai ana kau, e maama. Ni uotarake taekan ana boto bon tiaki te kangaanga. E a kaman ataia bwa antai ana boto. Bon Iesu Kristo. E a tia ni kamarurunga te aoraki, ni kateirakea te mate, ao ni kabooa mwiin aia bure aomata ni kabane. Boni ngaia te boto ae te kabanea ni kakannato are e a tia ni maiu. E bon maaku n taekinna.
E a manga tenaa riki ukin waebuana Ellie n te iango are e na tuangia kain te kiraati ae bwanin bwa Iesu Kristo bon ana boto. Tera ngkana e ngareakinna Jeremy? Tera ngkana a wirikirikina taekana Sarah ao Amber n tain te uritieeti?
E koaua e ataa Iesu Kristo bwa ana boto. Ma tiaki nanona anne ma aomata ni kabane a na ataia naba.
E tei Nei Fitz imoan raoi ana teetike Ellie ao ni matangare. “Ao antai am boto, Ellie?”
E taratara Ellie n aia rinan ataein te reirei ake irarikina nakon Nei Fitz. “Abraham Lincoln,” e wirikiriki.
E moangare Nei Fitz. “E raoiroi!” e taetae ngkai e nakonako nakon te ataei are i mwiina.
N te tai are e waekoa n nako iai, a bwakarikaaki angana ma te rauaki. E rarabwa te akoi bwa e a toki. Te kabane ni bwai are e kainnanoia bon kain te kiraati bwa a na ataia bwa ana boto bon—
“Iesu Kriso,” e taku te bwanaa.
A warebwe matan Ellie ngkai e tabe ni karaurau n taratara nako. There—tii mai imoa teutana—e tekateka te ataeinimwaane ae uarereke ma irana ae uakaka. E bakitaia ao ni mamaama, ao e aki toki n tekateka mai buki n te kiraatiruum. E aki ataa arana Ellie. E aki uringnga ngkana e a tia n taetae teutana—ni karokoa ngkai.
Tabeman ataein te reirei a rairaki n taraa te ataeinimwaane, ma e aki nooria. E tii tabe n tararake n taraa Nei Fitz ao ni manga taetae riki. “Au boto bon Iesu Kristo.”
E tokatoka moangaren Nei Fitz ao n reitanako kawaina. Ma Ellie e taraa te ataeinimwaane ma te tounako. E a kaman maaku n tuangia aomata ni kabane taekan ana boto, ma ngaia e aki maaku. E aki te roko n roroko n ana aro! Ma e ataia bwa e kakawaki te tei bwa te katoto n aron Iesu Kristo, e ngae ngkana e bon matoatoa.
E moangare Ellie nakon te ataeinimwaane. E na bon aki manga oki ni maaku n atongnga bwa antai ana boto. I mwiin anne ni kabane, a reke uoman irouna.