“I Kainnanoiko ni Katoa Aoa”

Te bong are imwiina ti roko ni mweengan te ateinimwaane, n tauraoi n angareirei. Ti bon miimi ni kunea bwa Pak Mi-Jung e tangiria naba bwa ti na reireina natina te aine, Kong Su-Jin. Ao ngkai bon ianena ngaira inanon mweengara, Pak Mi-Jung e tangiria ni mataku n te reirei. E koaua ti bon kukurei n anga reirei nakoia aika bati ake a tangiria n ongora.

Imwiin are a tia n anganiira tabeua amwarake aika uarereke, ti bane n tekateka ao ni moanna n taetaenikawai. Nakon are ti a bon waaki naba nakon te reirei, Pak Mi-Jung e tangiria ni kan ataira riki ao n tuangiira taekaia ana utu. E tuangiira ibukin kakatai ao rawawata ake a tia n rinanona, n ikotaki ma aorakin natina temwaane ae te kaentia. E a tia n tokainkai n rinanon te bwainaoraki ae te radiation, ao te kaentia e a moanna n tamaaroa, ma taokita a kauringnga bwa e kona ni manga oki. Aio are e a bon kaangaanga iaon te utu. Bon te utu ae e aki bati aia mwane, ao te tama e riai ni mwakuri korakora n tii ni karekea kamanoaia ao te amwarake iaon te taibora.

I bon tiaoki ao n nanokaawaki man kakatai inanon maiuia. E aki beebete te maiu ibukiia, ma kaaniakia inanon aia utu e bon rangi ni mataata riki nakon are I a tia n nooria inanon utu ake tabeua ake I a tia ni kaitibo ma ngaia i Korea, are e bon bati n aroia utu i Korea. Ti kitaana mweengaia n te tairiki anne ao n ata te utu ae e onoti aio riki ao ni karekea te tai ae angaraoi n tibwaua rongorongon te euangkerio ma ngaia.

Ngai ma toau ti okiriia n taai riki aika bati n te wiiki anne, ni katoa te tai ti rinanon te akoi ae tamaroa n aron are ti rinanona n ara moan kakaawari. Ngke taekina taekan te bwabetito, ataei a bon rangi n ingainga ni kani kaaina te Ekaretia. E ngae n anne, tinaia e aki tibwa kukureia. E ngae ngke e kan ongora n ara reirei ao e kantaningaia bwa e koaua, e aki namakinna bwa e na kona ni kawakina te aekaki ni kabaeaki are e kainnanoaki ni kaainakin te Ekaretia. E aki naba namakinna bwa e riai ibukina bwa e na bwabetitoaki n akea buuna, are ti tuai ni kaitibo ma ngaia. E ngae n anne, e bon rangi n tauraoi n reitanako kaitiboora ma ngaia ao n tangiria naba n iriia natina ni kaea te taromauri.

Nakon tokin te kauoua ni wiiki anne, ngke ti waaki nako n reirei inanon mweengana, ti kaitibo ma buuna, Kong Kuk-Won—te mwaane ae nanorinanon akoi, ao n tituaraoi. E reitaki ma ngaira n ara kabanea ni marooro ake tabeua ao ni waekoa ni kakoauai bwaai ni kabane ake ti anga reirei iai, n ikotaki ma reirei ake tabeman n taainako a kunea bwa e matoatoa n aron te kabwianibwai ao Tuan te Mauri. N aki tabeakina aroia ae akea aia mwane, a moanna ni kabwaka aia kabwianibwai. Tii ana kaangaanga te tama bon mwakurina n te Taab ti. E mwakuri n ana Marae ni Wanikiba Seoul ibukin te Botanaomata ni katoa Taabati, ai ngaia are e bon aki kona n iira te taromauri ma kaain ana utu ni kabane. N aki ongea ana tai ni mwakuri, ngaia ao buuna a baireia bwa a na ira aia bwabetito natiia n te Taabati are imwiina.

Rimwiian aia bwabetito natiia, ti reitinako ni bobootaki n taainako inanon mweengan te utu. Ti karaoi bootakin te utu n te tairiki, tibwauai taneiai ni booki aika tabu ao aika tabekirakeira, ao ni kairiia nakoia membwa n te uoote. E ngae n anne, n aki ongea te taneiai n te euangkerio ae reitinako, te karo a bon aki roko n te kaan riki nakon bwabetitoakiia.

Inanon te tai anne toau e a kamwaingaki, ao toau ae boou bon te mitinare are e a tibwa bane ana tai man te tienta ni kataneiai ni mitinare. E bon onrake te onimaki, te korakora, ao te kukurei, ao I bon kokoaua bwa e matoatoa au tai ma ngaia. Imwiin bootakira ma Kong Kuk-Won ao Pak Mi-Jung iaon tabeua taai aika kakawaki, e kawarai toau ao n titiraki bwa tao ti a tia ke ti tuai ngai ma toau are mai imwaaina ni karaoa au aki mamatam ma ngaiia. Ti bon tuai. N te koaua, e bon tuai n reke irou iangoakina. Ai ngaia are ti bootaki ma te utu ao n tuangiia te aki mamatam. I bon tiaoki ni kunea bwa a tia ni kaakaraoa oin aia aki mamatam n taainako, ni uoua bukina bwa ibukin marurungin natiia te mwaane ao ibukin te bitaki n tain te mwakuri are e na kariaia Kong Kuk-Won n iira te taromauri. Imwiin are ngai ma toau ti reitaki ma ngaia n te aki mamatam, ara tataro a kaekaaki ao ana tai ni mwakuri Kong Kuk-Won e a bitaki. Ma Pak Mi-Jung e bon teimatoa n aki bita ana iango ibukin bwabetitoana.

Toau ai manga iai ana iango ae e rangi n tamaroa. E buuta ana boki n anene n taromauri ae buburan te bokete ao ni butiira ngkana ti kona n anene ma ngaia. E ngae ngke ti a tia n anene ni bootaki n taai aika nako, I tuai n noora Pak Mi-Jung n anene ao n tii n iangoia bwa e aki tangira te anene ke n aki mweengaraoi ibukina bwa te anene e bon boou nakoina. Toau e tuangnga ngkana iai kunana ae tatangiria ao ni kubanakou, e a bon rootaki n te iango n te aro are e a kangaanga ae e na taetae ao e kaeka bwa ma ngke te ataeinaine ae uarereke, kunana ae mamaten nanona “I Kainnanoiko ni Katoa Aoa” (Kuuna n anene n taromauri, no. 98). Ti moanna n anenei mwakoro ake aua n te anene, ma te tama n anenea te katake, te tina n anenea te areto, toau n anenea te tena, ao ngai n anenea te beeti.

E bon korakora te Tamnei inanon te ruu. Ngke ti anenea te kateniua ni kibu, e a taonaki n te namakin ae korakora, ao bwanaana e a toki ngkai ti reitianako:

Ngke ti a kabwanina te kaaua ao ni kabanea ni kibu, e a bon tang ni korakai. Ngke buuna e kataia ni karaua nanona, e karaurau ni kona n okira arona. E tarai kanoan matau ao e taku, “I kainnanoa bwabetitoau.”

Tamnei

drawing of woman holding an Asian hymnbook

Te mwakuri ni bwabetito ibukin Kong Kuk-Won ao Pak Mi-Jung n te Taabati anne bon teuana ae rangi ni korakora iai te tamnei n au tai ni mitinare. Natiia a iiri inanon te burokuraem, ao a bati kaain te aro n te tai anne aika a iiri ni kaota aia boutoka ibukin aia utu ae te kabanea ni boou n rairaki inanon aia uoote. Ngai ma toau ti katauraoa ara anene ae e onoti: “I Kainnanoiko ni Katoa Aoa.”

N tokina e a toki au mwakuri ni mitinare ao n oki rikaaki nakon mweengau. Imwiin teuana te ririki inanon te kuura, I oki rikaaki nako Korea ibukin te tiamwa ni karaoa au kataneiai n te taokita, ao ni katoa wikente I a kabaea au tai ni kawariia raoraou ao utu aika a bati aika onoti ake I a tia ni kaitibo ma ngaia n au tai ni mitinare. Imwiin tabeua te wiiki I a karaoa kawaiu n oki rikaaki nako Balsan ao ni kaaitibo ma te utu ae onoti aio. N rokou ni mweengaia, I ataia bwa iai ae akea rabwatana—natiia te mwaane. Ma matana aika ranran, e kaota te rongorongo nakoiu Pak Mi-Jung: aorakin natiia ae te kaentia e a tia ni manga oki ao, n ana ririki ae 14, e a toki iai maiuna.

Ngke I kataia n taekina au namakin n nanokaawaki ao ni kataia ni kaitara te maraki are I namakinna, Kong Kuk-Won e tuangai bwa bwaai ni kabane a na bane n tamaroa. A tangira te euangkerio, a kakaonimaki n iriira te taromauri, ao n ingainga nakon te tai are aia utu a kabaeaki n akea tokina inanon te Seoul Korea Tembora. E ngae n te maraki are a namakinna, te utu e ataia bwa a na manga noora Kong Sung-Gyun ao ni manga bootaki riki. Pak Mi-Jung e a tungai naba bwa aneneakin kuuna n taromauri ni katoabong e buokia ni karekea te korakora ni kaitarai ao n namakina te rau ma iriana are e uotia te Tamnei.

Ngke I kitana mweengaia n te tairiki anne, I iangoi riki taekan kuuna n anene n taromauri ake e tatangirii Pak Mi-Jung. I kakaitau bwa te Tama are i Karawa e kakabwaiaa te utu ma te rau imwiin maten Kong Sung-Gyun, ao I rangi ni kakaitau riki ibukin ana mwakuri te Tamnei n rairakin Pak Mi-Jung, are e a karika te utu n tau ibukin kakabwaia aika akea tokiia man te tembora.