Ti Taekina Taekan Kristo
Mwakan te Onimaki
E maeka te tia korokaraki i Oregon, USA.
Ngkana e na kainaomataira te Tama are i Karawa man ara kakaewenako ti ibukina bwa ti bubutiia, E na kawakinira man karekean bwaai aika riai ibukin kamaiuara.
Te ririki teuana ngke I mena n te reirei, I karaoa te ukeuke ngke e moanna ni maraki roroau. E aki nako te maraki ngke te ientaka n te ukeuke e a tia n nako. I karekea aia ibuobuoki taokita ao te terabiti ao ni katai bwain aoraki aika kakaokoro, ma e teimatoa te maraki. Inanon te ririki are imwiina, ngke I kekeiaki ma te maraki aei, I kekeiaki naba ni karikirakea au onimaki. I kabanea angin au tai n te tataro, I kamatebwai booki aika tabu, ao I bubuti ibukin kakabwaia n te nakoanibonga. I namakinna bwa ngkana iai au onimaki ae tau, ao N na kamaiuaki.
Iesu Kristo e kamarurungia aoraki, mataki, mwauku, ao taian rebera—“n ai aron [aia] onimaki” (Mataio 9:29). I ataia ae iai mwakana ni kamaiuai n aron are E a tia ni kamaiuia aomata aika mwaiti inanon maiuina n te maiu aei. Ngaia ae, I iangoia, bwa ti man aki taun au onimaki ae taua kamaiuakiu, ngaia ae I a karikirakea riki au kekeiaki (n au onimaki). Ngke I wakinako ma te bitio terabi, I tataro ao n aki mamatam ao ni kamatebwai ao ni kakoaua. E ngae n anne ao marakiu e teimatoa.
E reireiniira booki aika tabu bwa ma te onimaki ao ti kona ni karaoi kakai (taraa Mataio 17:20), ma I aki kona ni kakukureiaki man te karawawataaki aei. E nga mwaakan au onimaki? N tokina, I nanorinano ni kariaia te bwai ae riki nakoiu, I kakaai kawai aika N na kona ni kaitara iai marakiu, ao ni moanna ni kukurei ni karekea bwaninin te ota iaon te onimaki ao te kamaiuaki inanon tabeua te tai n taai aika ana roko.
Ririki ake imwiina I taetae ma raoraou are e a tia ni kaitara ma te rarai ae korakora are e a uotia iai nakon te onaoraki n riaon teuana te tai n ana moan n tai ni bikoukou. Erin e tangiria ni manga karekea riki natina, ma e rangin ni maaku bwa rimwi e na manga reke naba irouna te aeka n aoraki are e reke irouna n ana moan tai ni bikoukou. E tuangai bwa e a tia n aki mamatam ao n tataro ao ni kakoaua raoi bwa te Tama are i Karawa e aki tangiria bwa e na rangin n aoraki n ana tai ni bikoukou te kauoua n tai.
Ngke ti maroro, I uringnga n au iango te boki ae tabu, “Tei moa, ao kam na ataai ba te Atua ngai” (Taian Areru 46:10). I iangoa oin au atatai ni mena ibuakon te kangaanga ao ni kairoroa Erin bwa e na teimatoa ni karekea te onimaki ma tiaki ni karika te onimaki anne bwa e na katan iaona bwa tao ke e aki aorakina anne ni bikoukouna are imwiina.
Ngkai I teimatoa ni kamatebwaia koauan te onimaki, I wareka ana maroro Aramwa iaon te onimaki are e kangai bwa “ngkana iai am onimaki ko kantaningai bwaai aika aki nooraki, aika a koaua” (Aramwa 32:21).
Iangoan raoi te kibu aei, I kunea bwa te onimaki tiaki te bwai ae I iangoia bwa ngaia. Te onimaki, are e reireiniira iai Aramwa, bon te kantaninga inanon koaua aika koaua. Karekean te onimaki e aki nanonaki bwa ti kakoaua Tamara are i Karawa bwa e na anganiira n tainako te bwai ae ti tuanga ngkana ti bubuti ibukina. Karekean te onimaki ae Kristo e na katoka aorakin raoroau ke E na angan Erin te bikoukou n akea aorakina bon tiaki karekean raoi te onimaki ni koaua aika koaua. E ngae n anne, ti kona ni karekea te onimaki bwa iai mwakan Kristo ni katoki aoraki, bwa E tabeaianga ibukira, bwa E na kakorakoraira, ao bwa ngkana ti kekeiaki raoi, ti kona n tau ni karekea te maiu are akea tokina.
E berita te Uea, “Bwaai ni kabane ake ko bubuti ma te onimaki, ma ni kakoaua bwa e na reke iroum n aran Kristo, ao a na reke nakoim” (Enoti 1:15). I kakoaua te mwaaka are e irekereke ma te berita aei e kona ni kuneaki n te kauntira ni kakoaua “n aran Kristo.” Te bwai are e koreaki iaon te tataro n te LDS Bible Dictionary (Rikitinare n ana Baibara Aika Itiaki ni Boong Aika Kaitira) e reireinira: “Ti tataro n aran Kristo ngkana ara iango a boraoi ma ana iango Kristo, ao ara kantaninga ti tebo ma ana kantaninga Kristo—ngkana a maeka Ana taeka inanora (Ioane 15:7). Ti titiraki ngkanne ibukin bwaai aika e kona te Atua n anga. A mwaiti tataro aika teimatoa n aki kaekaki ibukina bwa aki taekinna n aran Kristo; aki tei ibukin Ana iango ma bon mwiin ana babaka ni kawai te aomata ae korakora.”
Ngkana ti bubuti n te onimaki ibukin te bwai are e kaineti ma ana kantaninga te Atua, E na anganiira nakon are ti tangiria. Tamara are i Karawa e kinaira, tangirira, ao e kainnanoi bwaai aika riai ibukin okira nako Ina. Ao n tabetai e raonaki anne ma kataaki, kabuanibwai, ao kakaewenako (taraa 1 Betero 1:7). Ngkana e kainaomataira te Tama are i Karawa man ara kakaewenako ti ibukina bwa ti bubuti, E na kawakinira man karekean bwaai aika riai ibukin kamaiuara. Ti riai n rerei n onimaki n ana babaire te Atua ibukira ao ni kanakoi ara kantaninga nako Ina. Ngkana ti katiteboa nanora ma Nanona ao ni butimwaea inaomatara ae bwanin Irouna, ti kona n tau ni karekea “mwiin [ara] onimaki, ao maiun [tamneira]” (1 Betero 1:9).