Reirein te Euangkerio
E a tia n Uti
David O. McKay e bungiaki n Tebetembwa 8, 1873. E katabuaki bwa te Abotoro n Eberi 9, 1906, ngke 32 ana ririki, ao n Eberi 9, 1951, e rineaki bwa te karuaman ni Beretitenti n te Ekaretia. Aikai ana taeka ake e anga n te maungatabu ni kabuta n Eberi 1966. Ngkana ko kani wareka bwaninin ana taetae, taraa te Ribooti n te Maungatabu, Eberi 1966, 55–59.
Te onimaki ae matoatoa iroun Kristo bon kainnanon te aonaaba ae kakawaki n te bong aei.
Ngkana e riki te kakai bwa te bwai ae kaota te mwakuri ae taraa n aki iri tuua aika bwainaki bukina aei are e aki kona n ataaki iroun te aomata ma wanawanana ae aki tau, ngkanne Mangautin Iesu Kristo bon te kakai ae moan te kamimi ae tuai man ririki. Kakawakin te Atua ao aki mamaten te Atua a kaotaki rinanon Mangautin Iesu Kristo.
Te Mangauti bon te kakai, ma, ti n te kantaninga are e riaon ana kona ao ana atatai te aomata. Nakoia ni kabane naake a butimwaia bwa te koaua, boni ngaia kamatoakin te tua n te maiu ae teimatoa. …
Ngkana ko iangoia bwa te koaua ae … ngkanne iai rekena iroum nakon te kabanea ni kakawaki n titiraki ni kabane te tai: “Ngkana e a mate te aomata, e na manga maiu ke aki?” (Iobi 14:14).
Taan Kakoaua n te Mangauti
E koaua bwa te koaua are e uti Kristo man te bwanganimatang bon te rongorongo ae koaua nakoia abotoro ake a kina. Bon akea raoi te nanououa irouia n aia iango (ae e boni mangauti Kristo). Bon bwaai ni kakoaua n te koaua; ae ataia bukina bwa a noria ni mataia, a ongo taningaia, a namakina rokona n rabwata te Tia Kabooi maiura ae mangauti.
Betero, mataniwiia Abotoro, n te tai are a tia ni boowi iai abotoro ake tengaun ma uoman n rinea temanna are e onea mwiin Iuta Itekariota, e taku, “Mangaia aei mai buakoia aomata aikai … e riai ba e na riki temanna ba raora ni kaotioti i bukini manga-utina” (Mwakuri 1:21–22). …
N te tai teuana Betero e taetae nakoia ana kairiribai, mwaane ake a bon tiringa Iesu iaon te kaibangaki: “M’aane aika Iteraera, kam na ongo taeka aikai; … E kauta Iesu aei te Atua, are taani kakoaua utina ngaira ni kabaneira” (Mwakuri 2:22, 32). …
Kakoaua riki Tabeua
Ana Ekaretia Iesu Ibukiia Aika Itiaki ni Boong Aika Kaitira a matoatoa ni kakoaua ma Betero, ma Bauro, ma Iakobo, ao ma Abotoro ake ngkoa ake a kariaia te Mangauti bwa tiaki ti te bwai ae koaua, ma a butimwaea te mangauti bwa kanga bwaninin ana mition Kristo mai ieta iaon te aba.
Teuana tengaa ao wanibubua te ririki imwiin maten Iesu iaon te kaibangaki, e katanoata te Burabeti Iotebwa Timiti bwa te Uea ae uti e kaoti nakoina, man taku: “I noria uoman Aomata, are otaia ao mimitongiia aki kona ni kabwarabwaraaki, n tei iaou n te eea. Temanna mai ibuakoia e taetae nakoiu, ni weteai n arau ao n taku, ni kotea are temanna—Aio Natiu ae Tangiraki. Ongo Irouna!” (Joseph Smith—History 1:17). …
Ngkana ana koaua Iotebwa Timiti (ni Mangautin Kristo) bon ti te kakoaua ae iai iroura, e na riki, kanga aron are e taekinna Kristo n ana koaua ngke E taetae bon Ibukina, n akea boongana; ma iai ana koaua Iesu iroun te Atua ao tenaan Abotoro. Ao iai ana taan kakoaua Iotebwa Timiti tabeman [ake] a kamatoa [ana] koaua, koauana are e kaotaki man kaotin te anera Moronaai nakoia. …
… Ana Ekaretia Iesu Kristo ibukiia Aika Itiaki ni Boong Aika Kaitira e taekina [naba] mimitongin te mi ni burabeti (iroun te Tia Kamaiu) are e karekea te Burabeti Iotebwa Timiti.
“ Imwiin kakoaua aika mwaiti ake a tia ni kanakoaki ibukin te Tia Kamaiu, Iotebwa Timiti e anga te koaua aei, are ti anga ibukina: Bwa e maiu! D&76:22). …
Iangoan kakoaua aika a aki kona n nanououaki ake a anga Abotoro n taai akekei—koaua ake a tauaki mwiia tabeua te ririki imwiin te Mangauti—n iangoan te taratara ae moan te kamimi ni maiun Kristo inanon n taai aikai, e tara ni kangaanga raoi atakina bwa a kanga aomata n teimatoa n aki Kakoaua ao ni kona n aki kakoaua aki mamaten te aomata.
Tera ae Ti Kainnanoia n te Bong Aei
Te onimaki ae teimatoa iroun Kristo bon kainnanon te aonaaba ae moan te kakawaki n te bong aei. Te onimaki ae teimatoa e raka riki nakon ae ti te namakin. Te onimaki ae teimatoa bon te mwaaka ae kaungaia aomata bwa ana mwakuri, ao e riai n iai ni maiun te aomata bwa te kabanea ni bebete mai ibuakon anainano aikanne. …
Ngkana ti mwaane aika “Ana karaoa nanona,” n onea mwiin are tarakin te mate n akea te bwarannano, a na kabanea nanoia nakon koaua mai ieta ao n ataia bwa e a uti Kristo! …
Ana Ekaretia Iesu Kristo ibukiia Aika Itiaki ni Boong Aika Kaitira e kanatoata nakoia kain te aonaaba bwa Kristo bon natin te Atua, te Tia Kabooi maiuia kain te aonaaba! Akea te tia iriria ni koaua ae kukurei ni butimwaia bwa te tia karaoa te bitaki ae tamaroa, te tia reirei ae kororaoi, ke te mwaane ae ti temanna ae kororaoi. Kristo ae maeka i Kariraia e—e aki kinaki raoi, ma ni koauana—Natin te Atua ae maiu. …
Ni Koauana E a Manga Bungiaki Kaua
Akea te aomata ae kona ni motikia inanoa ni koaua bwa e na maiuakinna ni katoabong ana reirei Iesu ae kaain Natareta n akean namakinan te bitaki bon irouna. Te kibu n taeka “manga bungiaki” iai kakawakina ae nano riki nakon ae a ataia aomata. … E kukurei te aomata ae namakina te nakoraoi, e bita te mwaaka are e roko man te kaan aio nakon te Tia Kamaiu, te reitaki ae kaan ma te Kristo ae maiu. I iangoia bwa I ataia bwa Kristo bon te Tia Kabooi Maiura. …
Rongorongon te Mangauti … te bwai ae te kabanea ni kamwengaraoi, te kabanea ni mimitong ae anganki te aomata, bwa ngkana e ana temanna ae tangiraki te mate mairoura, karauaki nanora aika nanokawaki man te kantaninga ao koauana mai ieta are e kabwarabwaraaki n taeka: “Akea ikai; bwa E a tia n Uti!” [taraa Mataio 28:6; Mareko 16:6].
I ataia mai kabin nanou ao ni kabane nanou bwa e tokanikai man te mate Iesu Kristo, ao ibukina bwa E maiu te tia Kabooi Maiura, ao ngaira naba.