Ko Hono ʻAi e Konifelenisí ke Hoko ko e Konga ʻEtau Moʻuí

Ko hono vahevahe ʻe ʻEletā David A. Bednar ʻo e Kōlomu ʻo e Kau ʻAposetolo ʻe Toko Hongofulu Mā Uá ha talanoa ʻo ʻene ongoʻi ilifia hili ʻene fahiʻi ha matapā sioʻata ʻo ha falekoloa ofi ange ki honau ʻapí (peesi 46). Naʻá ne akoʻi mai leva ko e taimi ʻoku tau tafoki ai kia Sīsū Kalaisi pea muimui ʻiate Iá, ʻe lava ke tau ongoʻi ha nonga kae ʻikai ko e ilifia. Ko e hā te ke lava ʻo fai he ʻaho takitaha ke tokoniʻi ai hoʻo fānaú ke nau tafoki ki he Fakamoʻuí? Te ke akoʻi fēfē kinautolu ke nau vilitaki atu ki muʻa ʻia Kalaisi, neongo e ngaahi taimi faingataʻá?

Ko e fakamatala ʻa Sisitā Linda K. Burton, ko e palesiteni lahi ʻo e Fineʻofá, kau ki ha fāmili ne nau hiki mai ki ha fale foʻou ka naʻe teʻeki ai ke ʻaaʻi honau loto ʻataʻataá (peesi 29). Naʻe fakaʻilongaʻi ʻe he tamaí ʻa honau ʻapí ʻaki ha afo peá ne fakahā ki he fānaú te nau malu pē ʻo kapau te nau nofo maʻu ʻi he loto ʻaá. Naʻe talangofua e fānaú, ʻo aʻu pē ki he taimi naʻe teka ai e foʻi pulú ki tuʻa mei he loto ʻaá. Ko e hā ha founga ʻe tokoni ai e ngaahi mātuʻá ke malu ʻa e fānaú? Ko e hā ha ngaahi tāpuaki ʻoku maʻu mei he fakafanongo ki heʻetau mātuʻá? Ko e hā e ngaahi fakangatangata ʻoku ʻomi ʻe he Tamai Hēvaní kiate kitautolu?

Naʻe fai ʻe Pīsope Gérald Caussé, ko e Tokoni ʻUluaki ʻi he Kau Pīsopeliki Pulé, ha talanoa kau ki ha kau tangata ʻe toko tolu ʻi ʻAfilika ne nau lue lalo ʻi ha uike ʻe ua ʻi ha fanga kiʻi hala pelepela ke kau atu ki ha konifelenisi fakavahefonua (peesi 98)! Ne nau nofo ai ʻi ha uike ʻe taha ke nau lava ʻo maʻu e sākalamēnití kimuʻa pea nau toki foki ki ʻapi. Ne nau fua leva ha ʻū puha fonu he ʻū Tohi ʻa Molomoná ʻo hilifaki honau ʻulú ke ʻave ki he kakai honau koló. ʻOkú ke fakakaukau ko ha meʻa lelei e ongoongoleleí? Ko e hā ha ngaahi feilaulau ʻokú ke loto fiemālie ke fai ke moʻui ʻaki e ongoongoleleí?

Naʻe lahi ha ngaahi lea he konifelenisí ni naʻa nau fakamahuʻingaʻi ʻa e fāmilí mo e ʻapí. Hangē ko ʻení, naʻe kole ʻe Sisitā Bonnie L. Oscarson, Palesiteni Lahi ʻo e Kau Finemuí, ki he kāingalotu ʻo e Siasí ke nau “maluʻi mo taukapoʻi ʻa e ʻapí ko e feituʻu hoko hake ia ki he temipalé ʻi he māʻoniʻoní” (peesi 14). Ko e hā te ke lava ʻo fakahoko ke maluʻi ai e ʻapí? Te ke tokoni fēfē ke ngaohi homou ʻapí ko ha potu toputapu?

Naʻe akonaki ʻa Elder Russell M. Nelson ʻo e Kōlomu ʻo e Kau ʻAposetolo ʻe Toko Hongofulu Mā Uá ʻoku hoko hotau loto mo e tōʻonga he ʻaho Sāpaté ko ha fakaʻilonga ʻi hotau vā mo e Tamai Hēvaní (peesi 129). ʻI hoʻo lau e lea ʻa ʻEletā Nalesoní, te ke fakakaukau ki he Sāpate ka hokó mo ke fehuʻi loto pē, “Ko e hā ʻa e fakaʻilonga ʻoku ou fie ʻoatu ki he ʻOtuá?”

Naʻe talanoa ʻa ʻEletā Ulisses Soares ʻo e Kau Fitungofulú ʻo kau ki ha tīkoni naʻá ne muimui ki he sīpinga ʻa e ʻEikitau ko Molonaí (peesi 70). ʻI he mamata ha talavou ki he sio ponokalafi hano kaungā-ako ʻi heʻenau telefoni toʻotoʻó, naʻá ne talaange ʻoku hala ʻenau meʻa ʻoku faí pea ke taʻofi ia. Naʻe taʻofi ia ʻe ha taha ʻo hono kaungāmeʻá. Te tau maʻu fēfē ha ivi ke fili ai ki he totonú? Ko e hā e founga te tau ʻilo ʻaki e meʻa ʻoku malu ke tau fiefia aí?

ʻE lava ke mālohi fau e ivi tākiekina ʻo e fanga kiʻi device fakaʻilekitulōniká he taʻefakangatangata e fakamatala mo e mītia ʻe lava ke nau hū ki aí. Kuó ke kiʻi tuʻu hifo nai ʻo fifili pe ʻoku nau puleʻi koe? Naʻe pehē ʻe ʻEletā José A. Teixeira ʻo e Kau Fitungofulú, “Ko e meʻa fakafiemālie moʻoni hono kiʻi tuku hifo hoʻo device fakaʻilekitulōniká ki he tafaʻakí” (peesi 96). ʻAhiʻahi fakahoko ia! Fili he ʻaho vavé ni mai pē ke ʻoua naʻá ke toe ala ai ki ha device. Mahalo ʻe hangē ka ʻikai ke ke fie fai iá, ka te ke ʻohovale he lahi e taimi ke ke talanoa mo feohi fiefia ai mo ho kaungāmeʻá mo e fāmilí ke fokotuʻu ha ngaahi manatu fakafiefiá.

Ko e ʻaukaí ko e taha ia ʻo e ngaahi founga lelei taha ke maʻu ai ʻa e mālohi fakalaumālié. Naʻe fakamanatu mai ʻe Palesiteni Henry B. Eyring, Tokoni ʻUluaki ʻi he Kau Palesitenisī ʻUluakí, naʻe fakamālohia ʻa Sīsū ʻe he ʻaukaí mo e lotú ke Ne matuʻuaki e ngaahi fakatauvele ʻa Sētané, lolotonga e nofo ʻa e Fakamoʻuí ʻi he toafá (peesi 22). ʻI he Sāpate ʻaukai ka hokó, feinga ke ke muimui ki he sīpinga ʻa Sīsuú ʻo ʻai ha taumuʻa hoʻo ʻaukaí. Te ke maʻu ha tokoni mo ha maluʻi fakalangi foki.

Naʻe tokolahi ha kau lea he konifelenisí ne nau lea ʻi he mahuʻinga ʻo e malí mo e fāmilí ʻi he sosaietí pea ʻi he palani ʻo e fakamoʻuí. ʻE lava ke ke tali ʻa e ngaahi fehuʻi ʻe nima ne fai ʻe Sisitā Peatoni ʻi he peesi 31 peá ke fifili ʻi he faʻa lotu ki he founga te ke lava ʻo langaki hake mo ʻofeina ai e niʻihi ʻoku ofi taha kiate koé. Aleaʻi ʻe homou fāmilí e founga ʻe lava ke toe tokanga taha ange ai homou ʻapí kia Sīsū Kalaisí, mo e founga ʻe lava ke mou fepoupouaki lelei ange aí.

Naʻe fakamanatu mai ʻe Palesiteni Thomas S. Monson e ngaahi tāpuaki ʻoku maʻu mei he mōihū ʻi he temipalé, kau ai ʻa e tuʻunga fakalaumālié, nongá mo e mālohi ke ikunaʻi ʻa e ngaahi ʻahiʻahí mo e ngaahi faingataʻá (peesi 91). Naʻá ne pehē, “ʻI heʻetau ʻalu ki he temipalé, te tau maʻu ha ongoʻi fakalaumālie mo e ongoʻi nonga ʻoku mahulu hake ia ʻi ha faʻahinga ongo ʻe maʻu ʻe he loto ʻo e tangatá.” Ko e hā te ke lava ʻo fai ke toe mahuʻingamālie ange ai hoʻo ʻalu ki he temipalé?

Ko e tui kia Sīsū Kalaisí ko ha tefitoʻi moʻoni ngāue ia. Naʻe pehē ʻe Eletā L. Whitney Clayton, ʻo e Kau Palesitenisī ʻo e Kau Fitungofulú, “Naʻe ʻikai tupukoso noaʻia pē ʻetau tui ki he Fakamoʻuí mo ʻEne ongoongoleleí, kae pehē ki he lotú mo e totongi vahehongofulú.” “ʻOku tau fili ʻiloʻilopau pē ke tui” (peesi 36). ʻI hoʻo lau ʻene leá mo e ngaahi lea naʻe fai ʻe ʻEletā Dallin H. Oaks ʻo e Kōlomu ʻo e Kau ʻAposetolo ʻe Toko Hongofulu Mā Uá (peesi 32); Rosemary M. Wixom, ko e palesiteni lahi ʻo e Palaimelí (peesi 93); Pīsope Gérald Caussé (peesi 98); pea mo ʻEletā Kevin W. Pearson ʻo e Kau Fitungofulú (peesi 114), fakakaukau ke ke faʻu ha lisi ʻo e ngaahi founga te ne fakamālohia hoʻo tui kia Sīsū Kalaisi mo ʻEne ongoongoleleí. Pea hiki leva ha lisi ʻo e ngaahi tāpuaki kuo talaʻofa mai ʻe maʻu ʻi hono fakatupulaki ʻo e tuí.

Ko e akonaki ʻa ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá, ko e Fakalelei mo e Toetuʻu ʻa e Fakamoʻuí, ko “hono fakafōtunga fakaʻeiʻeiki taha ia ʻo e ʻofa haohaoa ke malava ʻe ha taha ʻo fakahaaʻi ʻi he hisitōlia ʻo e māmaní” (peesi 104). Ko e hā ha founga ʻe lava ke fakafōtunga lelei ange ai ʻe hoʻo fakakaukaú, leá mo e tōʻonga moʻuí, ʻa hoʻo houngaʻia ʻi he meʻa kuo fai ʻe he Fakamoʻuí?

Ko e fakamatalaʻi ʻe Palesiteni DieterF. Uchtdorf, Tokoni Ua ʻi he Kau Palesitenisī ʻUluakí, ʻa e meʻaʻofa fakaofo ko ia ʻo e ʻaloʻofá pea mo hono mahuʻinga ʻo e talangofuá mo e fakatomalá. Naʻá ne pehē, “ʻI heʻetau feinga ko ia ke mahino kiate kitautolu e meʻafoaki ʻo e ʻaloʻofá ʻaki e kotoa hotau lotó mo e ʻatamaí, te ne ʻomi ai ha ʻuhinga lahi ange ke tau ʻofa mo talangofua ai ki heʻetau Tamai Hēvaní ʻi he angamalū mo e loto houngaʻia.” (peesi 107). Fakakaukau ke hokohoko atu hoʻo ako ki he ʻaloʻofá ʻi hoʻo lau e Loma 3:23; 6:1–4; 2 Nīfai 25: 23, 26; Mōsaia 2:21; 5:2; 27:25; ʻAlamā 34:10, 15; ʻEta 12:27; mo e Molonai 10:32.