Douglas D. Holmes

“ʻOku lahi ange ivi talangofua ʻo e toʻu tangata ʻo e toʻu tupu ko ʻení, ʻo mahulu hake ia ʻi ha toʻu tangata kimuʻa. ʻOku ou tui ko e konga pē ia e fokotuʻutuʻu ʻa e ʻEikí mo e teuteu ki he kuonga ʻoku tau moʻui aí,” ko e lau ia ʻa Misa Takilesi D. Holomesi naʻe hikinimaʻi ʻi he ʻaho 4 ʻo ʻEpeleli 2015, ko e tokoni ʻuluaki ʻi he kau palesitenisī lahi ʻo e Kau Talavoú.

Naʻe fāʻeleʻi ʻa Misa Holomesi ʻi he ʻaho 27 ʻo Fēpueli 1961, ʻi Sōleki Siti, ʻIutā, kia Tī W. mo Melepā Haueli Holomesi pea naʻe tupu hake pē ʻi he feituʻu Kōtoniutí, ʻIutā.

Hili ʻene ngāue ʻi he Misiona Sikotilani Kalasikoú mei he 1980 ki he 1982, naʻe maʻu e mataʻitohi BA ʻo Misa Holomesi he sainisi ʻo e fāmilí mei he ʻUnivēsiti Pilikihami ʻIongí ʻi he 1986 peá ne hoko atu ʻo maʻu hono mataʻitohi MA he fakalele pisinisí mei he Marriot School of Management.

Hili ʻene ʻosi mei he akó, naʻá ne hoko ko ha tokotaha fai faleʻi ki he kau pulé ʻi ha taʻu ʻe tolu peá ne ngāue ʻi he tafaʻaki fetuʻutakí, ʻo ne hoko ko ha tokoni talēkita pule ʻi he tafaʻaki ki he palani ngāué mo e fakalakalaka ʻa e potungāué maʻá e kautaha Media One. Talu mei he 2000 ʻo aʻu mai ki hono uiuiʻi ko e palesiteni fakamisiona ʻi he 2010, pea mo e 2013, kuó ne fakalele ʻiate ia pē ʻene kautaha ʻinivesi mo e fakatau kelekelé pe fakatau ʻapí.

Kuó ne tukutaha ʻa e konga lahi ʻo hono taimí mo e ngaahi talēnití ke tokoni ki he ngaahi kautaha ʻoku ʻikai fakatupu paʻangá, ngāue ʻi he ngaahi poate ʻa e United Way ʻo e Vahefonua Teivisí, ʻIutā; Parents for Choice in Education; Hūfangaʻanga ʻo e Kakai Fefiné ʻi Safe Harbor ʻi he Vahefonua Teivisí pea mo e Academy ki he Creating Enterprise.

Kuó ne hoko ko ha taki faifekau fakauooti, palesiteni ʻo e Kau Talavoú ʻi he uōtí, pīsope pea kimuí ni ko ha tokoni ʻi he kau palesitenisī fakasiteikí. Naʻá ne tokangaʻi e Misiona Misikeni Tītuloití mei he 2010 ki he 2013.

Naʻá ne mali mo ʻEleni Sū Tuuni ʻi he ʻaho 22 ʻo Sune 1985, ʻi he Temipale Sōlekí. ʻOku ʻi ai ʻena fānau ʻe toko ono.

Naʻe pehē ʻe Misa Holomesi, “Kuo mau mātā e mālohi ʻo e folofolá heʻemau moʻuí, ʻo tatau pē ʻi he lea ʻa e kau palōfitá pe ko e ngaahi tohi folofolá pe ko e fanafana ʻa e Laumālie Māʻoniʻoní.”