Fanongonongo ʻo ha Temipale Foʻou ʻe Tolu
ʻOku palani ke langaha ngaahi temipale Poata Pilinisí; ʻApitasani, ʻAivolī Kousi; pea mo Pengikoki, Taileni, ko e fanongonongo ia ʻe Palesiteni Tōmasi S. Monisoni lolotonga e fakataha ʻo e pongipongi Sāpaté ʻi he konifelenisi lahí. Ko e fuofua temipale foki ʻeni ke takitaha langa ʻi hono fonua. ʻE toki fakahā ʻamuiange ʻa e feituʻu totonu ʻe tuʻu ai e temipalé
Naʻe pehē ʻe Palesiteni Monisoni, “ʻOku teuaki mai ha ngaahi tāpuaki fakaofo maʻa hotau kāingalotu faivelenga ʻi he ngaahi feituʻu ko ʻení, pea mo ha feituʻu pē ʻoku tuʻu ai ha temipale ʻi he funga ʻo e māmaní.”
Temipale Poata Pilinisi Haití
Ko Haití ʻoku nofo ai ha Kāingalotu ʻe toko 20,000 tupu ʻi ha fonua ʻoku fakafuofua hono toko lahí ki he kakai ʻe toko 10 milioná. Naʻe kamata e ngāue fakafaifekaú ai ʻi he 1980. Ko e Temipale Sanitō Tomingikou Lepupelika ʻo Tominiká, ʻa e temipale ofi tahá. Neongo ʻoku tuʻu ʻi he motu tatau pē, ka ʻoku feʻunga mo ha meimei ʻaho ʻe taha e fononga ki aí.
Temipale ʻApitasani ʻAivolī Kousí
Ko ʻAivolī Kousí (Côte d’Ivoire) ʻoku nofo ai ha kāingalotu ʻo e Siasí ʻe toko 27,000 ʻi ha fonua ʻoku fakafuofua hono tokolahí ki ha kakai ʻe toko 20 miliona. Naʻe kamata e ngāue fakafaifekaú ai ʻi he 1988. Ko e temipale ofi taha ki aí ko e Temipale ʻAkalā Kaná, ʻa ia ʻoku maile ʻe 340 (550 km) hono mamaʻó.
Temipale Pengikoki Tailení
Ko Tailení, ʻoku nofo ai ha Kāingalotu ʻe toko 19,000 ʻi ha fonua ʻoku fakafuofua hono tokolahí ki ha kakai ʻe toko 67 miliona. Naʻe fokotuʻu ʻa e Siasí ʻi Taileni ʻi he 1966. ʻE ngāueʻaki ʻa e Temipale Pengikoki Tailení ʻe he Kāingalotu ʻi Tailení pea mo ʻĒsia Tongahahake kotoa. Ko e temipale ofi taha ki Taileni he taimi ní, ko e Temipale Hongo Kongo Siainá, ʻoku maile ʻe 1,000 (km ʻe 1,610) hono mamaʻó.
Ngaahi Ongoongo Kehé
Kuo fanongonongo he ngaahi ʻoupeni hausi, mo e ʻaho ke huufi ai ha ngaahi temipale ʻe nima ʻi he 2015, ʻi Kōtopa, ʻĀsenitina; Peisoni, ʻIutā, USA; Tuluhio, Pelū; ʻInitianapolisi, ʻInitiana, USA; pea mo Tiuana, Mekisikou. ʻE toe fakatapui foki ʻi he 2015 ʻa e Temipale Mekisikou Siti Mekisikoú, ʻa ia ne toe fakaleleiʻí.
ʻI he taʻu ʻe ua kuohilí, kuo fakatefito e feinga ʻa e Siasí ke fakakakato e ngaahi temipale ne fanongonongo kimuʻá. Makehe mei he temipale foʻou ʻe 3, ʻoku ʻi ai ha temipale ʻe 144 ʻoku lolotonga ngāueʻaki, 5 ʻoku fakaleleiʻi, 13 ʻoku kei langa pea 13 ne ʻosi fanongonongo ka ʻoku ʻi ha ngaahi tuʻunga kehekehe ko e teuteu atu ke langa.