ʻEletā Kimi B. Clark

Ko e akó ʻi he kotoa ʻo e moʻuí—ʻi heʻete hoko ko ha tokotaha ako pe faiakó—ʻe ʻaonga ia kia ʻEletā Kimi Palasi Kalake ʻi hono fatongia foʻou ʻi he Kōlomu ʻUluaki ʻo e Kau Fitungofulú. Naʻe hikinimaʻi ʻa ʻEletā Kalake ʻi he ʻaho 4 ʻo ʻEpeleli 2015, pea ʻe kamata ngāue leva ʻi ha ngaahi uike siʻi pē hili ʻene mavahe mei hono fatongia ko e palesiteni ʻo e ʻUnivēsiti Pilikihami ʻIongi-ʻAitahoó.

Naʻe pehē ʻe he Fitungofulu ne uiuiʻi foʻou ko ʻení, “Talu ʻeku fakakaunga-tāmaki he akó mei hoku taʻu nimá.” “ʻOku ou manako ke ako mo faiako.”

Naʻe fāʻeleʻi ia ʻi Sōleki Siti, ʻIutā, ʻi he ʻaho 20 ʻo Māʻasi 1949, kia Māloni mo Hēleni Mā Kalake, pea ko e lahi tahá ia ʻi he fānau ʻe toko tolu. Naʻá ne tupu hake pē ʻi Sōleki Siti ʻo nau nofo ai ʻo aʻu ki hono taʻu 11, pea nau toki hiki he maʻu e ngāue ʻene tamaí ʻi Sipoukeni, Uāsingatoni.

Neongo naʻá ne palani ke ako he ʻUnivēsiti Pilikihami ʻIongi ʻi Polovó, ʻIutā, he toe ha taʻu ʻe ua peá ne ʻosí, ka naʻá ne ongoʻi naʻe fie maʻu ke ne toe vakavakaiʻi ha ngaahi tafaʻaki kehe, ko ia naʻá ne pehē ke ne kole hū ki he ʻUnivēsiti Hāvatí ʻi Mesasūseti—ko ha feituʻu ʻe hoko ko hano ʻapi he taʻu ʻe tolungofulu tupu.

Hili e ʻuluaki taʻu ʻo e ako ʻa ʻEletā Kalake ʻi Hāvatí, naʻá ne ngāue ʻi he Misiona Siamane Sauté mei he 1968 ki he 1970. Naʻá ne foki mai ʻo ako ʻi BYU, ʻo ne fetaulaki ai mo Sū Loleini Hani ʻi hono uōtí. Naʻá na mali ʻi ha ngaahi māhina siʻi mei ai ʻi he ʻaho 14 ʻo Sune 1971. ʻOku ʻi ai ʻena fānau ʻe toko fitu.

Hili pē ʻena malí, naʻe hiki e ongomātuʻá ki he feituʻu Positoni, Mesasūsetí, ʻo toe hū ai ʻa ʻEletā Kalake ʻo ako ʻi Hāvati. Naʻe maʻu ai hono mataʻitohi BA, mataʻitohi MA mo e mataʻitohi PhD—ʻi he ʻekonōmiká kotoa. Naʻe hoko ʻa ʻEletā Kalake ko ha mēmipa ʻo e kau faiako ʻi he ʻApiako Pisinisi Hāvatí ʻi he 1978 pea naʻe ui ia ko e Tiini ʻa e akó ʻi he 1995. Naʻe ui ia he 2005 ko e palesiteni ʻo BYU–ʻAitahoó, ʻo ne ngāue ai ʻi ha meimei taʻu ʻe hongofulu.

Kuo hoko ʻa ʻEletā Kalake ko ha palesiteni kōlomu kaumātuʻa, sekelitali pule ʻa e uōtí, tokoni pīsope, pīsope, aleaʻanga māʻolunga, tokoni palesiteni fakamisiona mo ha Fitungofulu Fakaʻēlia.