ʻEletā Hugo Montoya

Naʻe mahino e ongoʻi lomekina ʻa ʻEletā Hiuko Monitoiā he taimi naʻe ui ai ia ki he Kōlomu ʻUluaki ʻo e Kau Fitungofulú. Naʻá ne maʻu ha fakafiemālie ʻi he ngaahi lea ongo vaivai ʻa Palesiteni Tōmasi S. Monisoni lolotonga ha fakataha ako ki he Kau Taki Māʻolunga foʻoú: “ʻOkú ke ʻi hení koeʻuhí ko hoʻo ʻofa ʻi he Fakamoʻuí.” Naʻe ongoʻi fiefia ʻa ʻEletā Monitoiā ʻi heʻene ʻiloʻi kuo fokotuʻu ia ʻe hono uiuiʻi foʻoú ke ne fai e fekau ʻa e ʻEikí.

Naʻá ne pehē, “ʻOku ou ʻofa ʻi he Fakamoʻuí, pea te u ʻalu ki ha faʻahinga feituʻu pē te ne kole mai ke u ʻalu ki ai.” “Te u fai ha meʻa pē ʻoku kole mai ke u faí. Te u leaʻaki ha meʻa pē ʻoku kole mai ke u lea ʻaki.” Naʻe hikinimaʻi ʻa ʻEletā Monitoiā lolotonga e fakataha hoʻatā Tokonaki ʻo e Konifelenisi Lahi Fakataʻu Hono 185 ʻo e Siasí.

ʻOku maʻu foki ʻe ʻEletā Monitoiā ha mālohinga ʻi he tukufakaholo ʻo e tui ʻa hono fāmilí. Ko ʻene kui uá ko Lafaele Monilou, ko ha taha ʻiloa he hisitōlia ʻo e Siasí ʻi Mekisikoú. ʻI he 1915, naʻe fakahū pilīsone ai ʻa Misa Monilou mo hano kaungā-mēmipa ko Veniseni Molālesi, ʻe ha kau fakafepaki lolotonga e Tau Fakalotofonua ʻa Mekisikoú. Naʻe talaange ki he ongo talavoú ʻe tukuange kinaua, kapau te na fakaʻikaiʻi ʻena tui fakalotú, mo ha ngaahi fie maʻu kehe pē.

Naʻá na fakafisi ke fai pehē pea naʻe fanaʻi kinaua ʻe ha kau tangata fana.

Naʻe pehē ʻe ʻEletā Monitoiā kuo hoko maʻu pē sīpinga ʻo ʻene kui uá ko ha ivi takiekina mālohi ʻi heʻene moʻuí. “Kuó u ako ʻoku lava ke ikunaʻi e ongoʻi manavahē ʻe he ongoʻi tuí mo e fakamoʻoní, he taimi ʻokú ke ʻilo ai ʻokú ke fai e meʻa ʻoku totonú.”

Naʻe fāʻeleʻi ʻa ʻEletā Monitoiā ʻi he ʻaho 2 ʻo ʻEpeleli 1960, ʻi Felesinou, Kalefōnia, kia ʻĒpeli mo Mekilōvia Monilou. Kuó ne nofo he konga lahi ʻo ʻene moʻuí ʻi Mekisikou.

Naʻá ne mali mo Malia Teli Kāmani Palasitulō ʻi Hemasilo; ne na sila ʻi he Temipale Mesa ʻAlesoná ʻi he ʻaho 6 ʻo ʻEpeleli 1983. ʻOku ʻi ai ʻena fānau ʻe toko nima.

Hili ʻene ngāue fakafaifekau taimi kakato ʻi he Misiona Mekisikou Siti Noaté mei he 1979 ki he 1981, naʻá ne hoko ai ko e palesiteni ʻo e Kau Talavoú he uōtí, aleaʻanga māʻolunga, pīsope, palesiteni fakasiteiki, tokotaha ʻaotita fakaʻēlia, mo ha Fitungofulu Fakaʻēlia.

Naʻá ne ʻosi mei he ʻUnivēsiti ʻo e Siteiti Sonolá ʻi he 1986 mo hano mataʻitohi fakaʻenisinia he ngoué pea kuó ne ngāue ʻi he ngaahi lakanga pule kehekehe ʻi he kautaha Xerox pea naʻá ne hoko ko ha faiako ʻinisititiuti ʻa e Siasí.