Polokalama Tali Fehuʻi pea mo ʻEletā mo Sisitā Petinā

ʻOku fakaafeʻi atu e toʻu tupu he funga ʻo e māmaní ke nau kau mai ki ha polokalama tali fehuʻi Mata ki he Mata pea mo ʻEletā David A. Bednar ʻo e Kōlomu ʻo e Kau ʻAposetolo ʻe Toko Hongofulu Mā Uá pea mo hono uaifi ko Sūsaná.

Te mou lava ʻo kau mai ki he fetalanoaʻaki ko ʻení he ʻaho 12 ʻo Mē 2015, ʻi he 6:00pm Mountain Daylight Taimi, ʻi haʻo sio fakahangatonu mai he ʻInitanetí (live stream) ʻi he LDS.org, peesi Facebook ko e LDS Youth Facebook, uepisaiti ki he Ngaahi ʻEkitivitī ʻa e Toʻu tupú (lds.org/youth/activities), pe ko e peesi Mormon Channel YouTube. E liliu fakahangatonu foki e fakamafolá ʻi he lea faka-Sipeiní, faka-Potukalí, faka-ʻĪtalí, faka-Siamane, faka-Falanisē, faka-Lūsiá, faka-Kōlea, faka-Siapani, mo e faka-Siainá.

ʻOku poupouʻi atu e toʻu tupú ke nau fakahū mai e ngaahi fehuʻí ʻi he uepisaiti ʻo e Ngaahi ʻEkitivitī ʻa e Toʻu Tupú kimuʻa mo e lolotonga e polokalamá; te nau lava foki ʻo muimuiʻi e fetalanoaʻakí ni ʻi he #LDSface2face.

Naʻe pehē ʻe ʻEletā Petinā,“ʻOku mau poupouʻi atu e toʻi tupú ʻi heʻenau teuteu ki he polokalamá ni, ke nau fekumi ke maʻu e tataki ʻa e Laumālié ʻi heʻenau fakalaulauloto ki he ngaahi fehuʻi te nau faí.” “ʻI heʻemau maʻu ko ia e Laumālié, te mau ako fakataha ai.”