Elder Vern P. Stanfill

Te ti‘aturi nei Elder Vern Perry Stanfill e, aita hoê ohipa e tupu ta‘ue noa mai ma te mana‘o-ore-hia. Te ti‘aturi nei oia e, te vai nei te tu‘ati‘atiraa i roto i teie oraraa i rotopu i te taata no te hoê opuaraa, e e nehenehe te Fatu e faauru i Ta’na mau tamarii ia riro ei haamaitairaa no vetahi ê.

E mea oaoa na Elder Stanfill ia utuutu ia vetahi ê i roto i te evanelia, i te raveraa hoê hoê i piha‘i iho i te taata.

Ua fanauhia o Elder Stanfill i te 8 no atete 1957 na Jed e o Peggy Stanfill, e ua paari i roto i te hoê fare faaamuraa animara i piha‘i iho ia Townsend, Montana. Ua haapii oia i te faufaa o te ohipa puai e ua aupuru maite i te hoê iteraa papû no ni‘a i te Faaora o Iesu Mesia. Te toru o na tamarii e maha, e piti a Elder Stanfill tuaana e hoê teina tuahine tei tavini ma te haapa‘o maitai i roto i te Ekalesia.

« Ua vai te rima o te Fatu i roto i to matou oraraa noa’tu to matou mau paruparu », ta’na îa parau. « E ere ta’u vahine e o vau nei i te mau taata maitai hope roa. E ere to maua utuafare i te utuafare maitai hope roa. E mau taata matou mai te mau huru taata atoa, tei tamata i te ora i to matou oraraa i tera mahana e tera mahana e ua vaiiho matou i te Fatu ia riro ei tuhaa no te reira ».

I muri i te taviniraa i te hoê misioni i Toulouse , Farani, e te haereraa i te haapiiraa i te pae no faaapu no roto mai i te fare haapiiraa tuatoru no Brigham Young, ua farerei e ua faaipoipo oia ia Alicia Cox. Ua faaipoipohia raua i te 17 no titema 1980 i roto i te Hiero no Roto Miti.

I muri a‘e i te haafeti‘a-raa-hia, ua ho‘i te utuafare Stanfill i Montana ia ti‘a ia’na ia faatere i te fare faaapu a te utuafare, te haapa‘oraa i te mau nana animala, te maa, e te huero. Ua hoo oia i te reira imiraa faufaa i te matahiti 1998; e ua hamata i te faatere i te hoê ohipa hooraa fenua e te mau mauhaa no te pae moni, e tae noa’tu i te mau ohipa no ni‘a i te tautururaa e te fenua.

Ua rave atoa Elder Stanfill i te ohipa i roto i te parau no te manureva, i te pae imiraa faufaa e te faaarearearaa, e ua haamau i te ohipa tamauraa pererau e te matini.

Taa ê atu te faaamuraa i ta’na na tamahine e maha e ta’na vahine, ua tavini atoa o Elder Stanfill i roto i te Ekalesia ei peresideni no te pŭpŭ peresibutero, ei episekopo, ei melo apooraa teitei, ei peresideni tĭtĭ, e ei Hitu Ahuru area. Te tavini ra oia ei melo no te ono o te pŭpŭ Hitu Ahuru i te taime a piihia ai oia i roto i te Pŭpŭ Matamua.