E toru hiero apî tei faaitehia
I roto i te tuhaa pureraa no te po‘ipo‘i sabati o te amuiraa rahi, ua faaara te peresideni Thomas S. Monson e, ua faanahohia te mau hiero no Port-au-Prince, i te fenua Haiti; no Abidjan i te fenua Côte d’Ivoire; e no Bangkok, i te fenua Tairane. Te hiero matamua teie e patuhia i roto i teie mau fenua. E faaarahia te mau vahi ti‘araa o te reira mau hiero i te tahi atu taime.
Ua parau te peresideni Monson e, « auê ïa haamaitairaa faahiahia e faahereherehia ra no teie mau melo haapaʻo maitai i teie mau vahi, e tae noa’tu i te mau vahi atoa na te ao nei e hiero to reira ».
Te hiero no Port-au Prince, i te fenua Haiti
Hau atu i te 20 000 Feia Mo‘a i te mau Mahana Hopea nei e noho nei i Haiti, i ni‘a i te rahiraa e 10 mirioni huiraatira. Ua haamanahia te haamataraa te ohipa misionare i te matahiti 1980. Te hiero fatata roa a‘e o te hiero ïa no Santo Domingo, i te Repupirita Dominiko. Noa’tu e, tei ni‘a iho teie hiero i te hoê â motu, fatata hoê mahana no te haere i reira.
Te hiero no Abidjan, i te fenua Côte d’Ivoire
Hau atu i te 27 000 Feia Mo‘a i te mau Mahana Hopea nei e noho nei i Côte d’Ivoire, i ni‘a i te rahiraa e 20 mirioni huiraatira. Ua haamanahia te haamataraa te ohipa misionare i te matahiti 1988. Te hiero fatata roa a‘e o te hiero ïa no Accra Ghana, e 550 km i te atea.
Te hiero no Bangkok, i te tenua Tairane
Hau atu i te 19 000 feia mo‘a i te mau mahana hopea nei e noho nei i te fenua Tairane i ni‘a i te rahiraa e 67 mirioni huiraatira. Ua haamanahia te faati‘araa o te Ekalesia i i reira i te matahiti 1966. E tavini te hiero no Bangkok—Fenua Tairane i te feia mo‘a i te mau mahana hopea nei i te fenua Tairane, e tae noa’tu i te taatoaraa o te tooa-hitia o te râ no Asia. I teie taime, te hiero fatata roa a‘e ia Tairane o te hiero ïa no Hong Kong i Taina, hau atu i te 1 610 km te atea.
Te tahi atu mau parau apî no te hiero
Ua faaarahia te mau tai‘o mahana opani iriti, aru‘i faaoaoaraa e te iritiraa no na hiero e pae no te matahiti 2015 i Córdoba, i te fenua Ra-Parata; i Payson, Utah, HAM; i Trujillo, i te fenua Peru; i Indianapolis, Indiana, HAM; e i Tijuana, i te fenua Mexico. E haamo‘a-faahou-hia te hiero no Mexico City i Mexico, i te matahiti 2015.
No na matahiti e piti i ma‘iri a‘e nei, ua faatumu te Ekalesia i te tautooraa i ni‘a i te faaotiraa i te mau hiero tei faaarahia i mua ra. Taa ê atu na hiero apî e 3 144 hiero e ohipa nei, e 5 o te tata‘ihia nei, 13 o te patuhia nei, e 13 tei faaara-ê-hia na, tei roto ïa i te faaineineraa hou a haamata ai te paturaa.