Mary R. Durham

A faaau maite ai oia i te mau titauraa o te oraraa utuafare, te mau piiraa o te Ekalesia, te toro‘a ohipa e te tahi atu mau hopoi‘a i roto i to’na oraraa faaipoipo, ua ite a‘era o Mary Durham e, ia tuu ana‘e oia e ta’na tane i te Fatu i mua roa, e vai te mau mea atoa i to ratou vairaa. « E ohipa marû ïa. Mai te mea e, e ti‘aturi outou, e haamaitai te Faru ia outou », te na reira ra oia.

Ua ite oia i te reira tumu parau i te tupuraa e rave taime. Ua piihia oia ei peresideni no te feia apî tamahine no te paroisa, area ta’na tane ra te tavini ra ïa i roto i te peresideniraa tĭtĭ. I muri a‘e ua tavini amui raua i te taime a faatere ai ta’na tane i te Misioni no Tapone mai te matahiti 2000 e tae atu i te matahiti 2003. I teie nei e tavini oia ei tauturu piti i roto i te peresideniraa rahi no te paraimere a haamata ai ta’na tane i ta’na taviniraa ei Hitu Ahuru Area.

Te parau ra oia e, « Ia taamu ana‘e tatou te tahi e te tahi e i te Fatu, e tere ohie noa te mau mea atoa ».

Ua fanauhia o Mary Lucile Richards i te 15 no mati 1954, i Portsmouth, Virginie, na L. Stephen Richards Jr. e o Annette Richards. A haere ai to’na metua tane i ta’na haapiiraa toro‘a utuutu ma‘i, ua reva’tu te utuafare i Mniieapolis, Minnesota, hou a haapapû roa ai i Roto Miti, Utah.

Ma te faaamuhia i te faaroo e te here o to’na na metua e o te hoê utuafare rahi, ua ite a‘era oia e, e parau mau te evanelia. « Ua riro te oraraa i te evanelia ei ohipa oaoa. E ere i te mea etaeta. E mea arearea », te parau ïa a te tuahine Durham.

I to’na taure‘are‘araa, ua putapû oia i te faufaa o te imiraa i te hoê tamaiti ti‘amâ no te faaipoipo e ia faariro i te reira ei tumu no te pureraa i te mau mahana atoa e no te hapaeraa i te maa i te mau hepetoma atoa. I muri a‘e i te haapiiraa tuarua ua haere oia i te hoê aru‘i oriraa na te fare haapiiraa tuatoru no Brigham Young e ua farerei oia ia Mark Durham, te haere ra i te fare haapiiraa teitei no Utah. Te parau ra oia e, « Ua ite ‘oi‘oi au i to’na maitai ».

Ua faaipoipohia raua i te ava‘e tiunu 1974 i roto i te hiero no Roto Miti. E hitu ta raua na tamarii.

Ua tavini te tuahine Durham ei peresideni no te sotaiete tauturu tĭtĭ, ei tauturu i roto i te peresideniraa sotaiete tauturu no te paroisa, ei orometua haapii no te feia paari, ei peresideni no te feia apî tamahine no te paroisa, e, aita i maoro a‘e nei, ei melo no te tomite faatere rahi o te paraimere.