Elder Von G. Keetch

Hoê taime faufaa roa o te oraraa o Elder Von G. Keetch, o te taime ïa a faahope ai oia i ta’na tau haapiipiiraa i piha‘i iho i te raatira haavâ o Warren E. Burger e te haavâ Antonin Scalia no te tiripuna teitei o te mau Hau Amui no Marite e a faaineine ai oia e tomo i roto i te ohipa auvaha ture rave tamau.

E nehenehe ta’na e rave i roto i te mau huru oire atoa o te mau Hau Amui no Marite no te mau piha auvaha ture rarahi e rave rahi. Tera râ, ua pure oia e ta’na vahine o Bernice Pymm Keetch, no te ani i te faaururaa ia ite e, eaha te ti‘a ia raua ia rave. I muri a‘e i te hoê tau ma‘imiimiraa, ua ho‘i faahou raua i Roto Miti, Utah, e ua haere oia e rave i te ohipa i roto i te piha auvaha ture na Kirton McConkie.

I taua taime ra, ua feruri o Elder Keetch e, e riro oia i te faatusia i to’na ti‘araa ia rave i te ohipa i ni‘a i te mau ohipa fifi, ia ti‘a ia’na ia parahi i piha‘i iho i to’na utuafare. Tera râ, i roto i to’na ti‘araa ei faaa‘o rahi no te Ekalesia i te pae no te ture, ua tuatapapa te taea‘e Keetch i te mau parau no ni‘a i te ti‘amâraa i te pae faaroo. Fatata na’na i ti‘a no te mau faaroo atoa o te fenua. « Ua au roa vau i te mea e, ua ti‘a ia’u ia rave i te ohipa no teie mau hoani rarahi, e ia ti‘a ia rave i teie mau ohipa rarahi », ta’na ïa parau.

Fanauhia i te 17 no mati 1960, i Provo, Utah, na Gary e o Deanne Keetch, o Elder Keetch te matahiapo o na tamarii e maha. Ua ora to’na utuafare i Orem, Utah, hou a haere atu ai i Pleasant Grove, Utah—i reira oia e ta’na vahine a muri a‘e e tavini ai i roto i te tomite haapiiraa evanelia no te fare haapiiraa tuarua.

Ua tavini Elder Keetch i roto i te misioni no Dusseldorf i te fenua Helemani, e ua here oia i te taata Helemani. Ia ho‘i mai oia na te misioni, ua faaipoipo oia ia Bernice Pymm i roto i te hiero no Roto Miti i te 21 no novema 1981; e ono a raua tamarii. Ua noaa ia Elder Keetch te parau tu‘ite no te ohipa poritita i te fare haapiiraa teitei no Brigham Young i te matahiti 1984 e ua farii i te parau tu‘ite no te pae o te ture i te fare haapiiraa teitei i te matahiti 1987.

Hou to’na piiraahia i te 4 no eperera 2015 ei melo no te pŭpŭ matamua no te Hitu Ahuru, ua tavini oia i roto i te mau episekoporaa, ei melo apooraa teitei, ei peresideni tĭtĭ, e ei Hitu Ahuru Area.