Mahangturong Nakasumpay sa Akong Pamilya

Sa dihang gisagop ko sa edad nga tres anyos, ang akong inahan nga naghimugso kanako mitugot nga ang hingpit nga pagsagop makompleto kon mosugot akong mga ginikanan kinsa misagop nako nga ang mga ordinansa sa Simbahan ipahigayon human ko mag-12 anyos. Siya naghunahuna nga kinahanglang sakto ko sa edad aron paghimo niining pagpili para sa akong kaugalingon, apan sa tinuod lisud ang magpaabut.

Oo, lisud nga makita nga ang akong mga higala nabunyagan sa dihang sila nag-otso anyos, apan mas lisud sa pagkasayud nga dili ko mabugkos ngadto sa mga ginikanan kinsa misagop nako ug sa lima ka magulang nga igsoon hangtud mag-12 anyos ko. Nahadlok ko nga adunay mahitabo nako ug dili ko mabugkos ngadto kanila.

Sa nagkaduol na akong ika-12 nga adlawng natawhan, nagsugod mi sa pagplano sa akong bunyag ug pagbugkos ngadto sa akong pamilya. Gipapili ko sa akong ginikanan asa nga templo nga gusto nakong mabugkos kami. Kanunay ko nga naghunahuna nga ang San Diego California Temple maoy pinakanindot, busa ang tibuok pamilya miuyon nga mobiyahe sa California para sa pagbugkos.

Dili ko kapaabut nga mahimong mahangturong pamilya uban sa akong mga ginikanan ug mga igsoon. Panahon sa pagbugkos, nabati gyud nako ang Espiritu nga lisud kini ipamulong. Karon, nga sa katapusan nabugkos ko ngadto sa akong pamilya, ang akong kabalaka napulihan og kahupay ug kalinaw, nasayud nga ako mahangturong nasumpay kanila.