Ang Pagluwas sa Hummingbird

Imahe

Hummingbird on a color background

Litrato pinaagi sa Kojihirano/iStock/Thinkstock

Sa Young Women camp sa kabukiran sa California, ang batang mga babaye ug ang mga lider naghulat sa panihapon sa usa ka balay paabangan. Samtang naghulat kami, ang batang mga babaye nakamatikod og butang ilawom sa lamesa. Usa ka hummingbird ang milupad diha sa paabangan, wala na makatultol sa iyang agianan, ug sa katapusan nahagsa sa salog. Mihangyo sila nako sa pagtabang.

Ang langgam hapit na mamatay, ang iyang sungo naputos sa lawa-lawa ug ang iyang mga balahibo nagkalkag. Hinay nako kining gibutang sa usa ka kopa ug gidala sa gawas. Naglaum ko nga maulian ra kini apan sa tinuod nagpaabut ko nga kini mamatay na. Hinoon, sa dihang hinay nakong gihuwad ang kopa aron ibutang ang hummingbird sa yuta, samtang midailos kini ang hummingbird migunit sa ngilit sa kopa sa iyang gagmay nga mga kuku. Akong gipatindog ang kopa, ang langgam milingkod sa ngilit, nagpiyong ang mga mata. Karon unsa man?

Usa ka lider, nga nakakita sa langgam, nagkutaw og solusyon sa asukar ug tubig ug gidala ngari nako. Una hinay nakong gitangtang ang mga lawa-lawa gikan sa hait nga sungo. Ang langgam wala maglihok. Dayon akong gituslob ang usa ka tudlo sa tubig nga sinagulan og asukar ug gipatulo sa tumoy sa sungo. Nawala ang tinulo, bisan og ang langgam wala maglihok. Tingali ang likido mituhop ngadto sa sungo? Gituslob nako pag-usab ang akong tudlo ug gipatungod sa sungo sa langgam. Niining higayuna ang gamay nga dila, nipis pa kaysa buhok, mitilap sa tumoy sa akong tudlo.

Sulod sa 10 o 15 minutos, ang hummingbird miinom sa tagsa-tagsa ka tulo. Nianang higayuna, ang ubang mga lider nagpundok libut nako, ug mitanyag ko nila sa pagsulay sa pagpakaon niini.

Sa kalit mibuka ang mga mata sa langgam, ug ang nagkalkag nga mga balahibo nahipos. Human makainom og mga duha pa ka tinulo, mikapakapa ang mga pako niini, mikapa-kapa pa og pila sa segundo, ug dayon milupad. Nagduha-duha pa kini ibabaw namo, ug dayon mipalayo.

Nagbarug kami didto, nahingangha. Ug dayon, sama sa kakalit sa paglupad sa langgam, ang espirituhanong mga leksyon miabut:

• Sa kasagaran, sa atong pagtabang sa dili kaayo aktibo, ang atong mga paningkamot ingon og wala makahimo og kalainan. Apan ang gugma nga atong gihalad modailos ngadto sa mga liki—sama sa tubig nga sinagulan og asukar ngadto sa wala maglihok nga sungo sa hummingbird—naghatag og espirituhanong nutrisyon nga makahatag og resulta sa umaabut nga adlaw.

• Usahay dili kita makapadayon sa atong kaugalingon; nagkinahanglan kita og mabination, mahigugmaong tinubdan sa tabang.

• Usahay ang mga tawo mabitik sa mga lawa-lawa sa sala o adiksyon ug nagkinahanglan og tabang sa usa ka higala o lider sa priesthood ug tabang sa Manluluwas aron makalingkawas.

• Nagkinahanglan kita og regular nga espirituhanong nutrisyon aron makalahutay, o kita mahutdan sa espirituhanong kalig-on ug mabiktima sa dautan nga mga impluwensya.

• Ang hummingbird milahutay. Sa literal nga paagi. Ang paglahutay makahimo sa tanang kalainan. Usahay, kinahanglan lang nga molahutay kita pinaagi sa hugot nga pagtuo samtang moatubang kita sa masakit ug usahay grabe nga mga hagit sa kinabuhi.

Ang Bag-ong Tugon miingon nga ang Magtutudlo nakahibalo bisan sa pagkatagak sa langgam (tan-awa sa Mateo 10:29–31). Nasayud ako karon nga Siya nakahibalo sa pagkatagak sa hummingbird. Ug Siya nakahibalo kaninyo.