Mga Sister diha sa Ebanghelyo

Gihigugma nako akong higala nga si Lupita sama sa igsoong babaye. Nagkaila mi sa sixth grade ug kaming duha apil sa school marching band. Pagkasunod tuig kami mas nagkasuod ug nagtinabangay sa usag usa. Iya kong gisultian sa mga hagit niya sa panimalay kay ang iyang papa wala didto ug ang iyang mama dili makahatag sa atensyon nga iyang gikinahanglan. Nasayud ko nga siya nagguol nga ang iyang ginikinan walay dakong bahin sa iyang kinabuhi. Siya nag-inusara, apan anaa ko kanunay para niya.

Mibati ko nga napanalanginan nga matawo sa panimalay kon asa anaa ang ebanghelyo ni Jesukristo. Kini nakahatag sa akong kinabuhi og kalinaw nga wala kasagaran sa akong mga higala. Tungod akong makita ang mga panalangin sa ebanghelyo sa akong kinabuhi, gusto nako nga ipakigbahin kini kang Lupita.

Gisultian nako siya kabahin sa Simbahan ug midapit kaniya nga mouban nako sa Mutual. Miuyon siya ug misugod sa pagtambong sa Simbahan ug sa mga kalihokan sa ward uban nako ug sa akong pamilya. Gipaila-ila nako siya sa mga misyonaryo, kinsa mitudlo kaniya sa ebanghelyo ug midapit kaniya nga magpabunyag. Siya nakabaton og pagpamatuod, ug sa dihang mihangyo siya sa iyang mama nga magpabunyag siya, mitando ang iyang mama.

Ang adlaw sa iyang bunyag espesyal kaayo tungod kay mihimo siya og mga pakigsaad sa atong Langitnong Amahan nga mohinumdom Kaniya ug mosunod sa Iyang mga kasugoan. Mipamatuod ko nianang adlawa ug miingon kaniya nga siya anaa sa hustong dapit ug ang Langitnong Amahan mapasigarbuhon kaayo niya. Gihigugma nako si Lupita ug malipayon kaayo ko nga siya akong higala ug karon akong igsoong babaye sa ebanghelyo. Nasayud ko nga ang iyang kinabuhi mas malipayon tugod kay siya ug ang iyang pamilya sa umaabut makatagamtam sa mga panalangin sa ebanghelyo.

Si Lupita miingon nako nga siya mapasalamaton nga mihukom ko sa pagpakigbahin sa ebanghelyo ngadto kaniya. Siya miingon nga sukad misimba siya, ang iyang kinabuhi milambo ug mibati siya og kalinaw. Nasayud ko nga kini ang Espiritu nagpamatuod sa kamatuoran ngadto kaniya. Miingon usab siya nga sa umaabut siya maminyo diha sa templo. Mapasalamaton ko sa akong Langitnong Amahan tungod kay nakakaplag ko og higala ug sa kalipay nga akong nabati sa dihang mipakigbahin ko sa butang nga bililhon kaayo ngari kanako.