Nodra Vakavulici na iTabagone Mera Veiliutaki ena iVakarau ni iVakabula
Mai vei Carol F. McConkie
iMatai ni Daunivakasala ena Mataveiliutaki Raraba ni Goneyalewa
O ira na noda itabagone era sega walega ni iliuliu ni mataka. Era sa iliuliu nikua. Sa rawa meda vukei ira mera veiliutaki vaka na iVakabula.
Ena nona vosa vei ira na itubutubu kei na iliuliu, a kaya kina o Elder David A. Bednar ena Kuoramu ni iApositolo Le Tinikarua na bibi ni veivakatautauvatataki yaga sara meda na kunea: “Sureti ira na itabagone mera na cakacakataka. Mo na tiko kina, ia mo kakua ni veivakataotaki. Mo na vakasalataki ira ka kakua ga ni lewai ira.”1
Sa rawa vei ira na itubutubu ke na iliuliu mera vukei ira na cauravou kei na goneyalewa mera vulica na ivakavuvuli ka na vakarautaki ira mera veiliutaki ena dodonu ka tara e vuravura na matanitu ni Kalou.
Niu se qai yabaki 14, au a sotava eso na goneyalewa era dauveiliutaki totoka sara. Ena gauna o ya, keitou a toki takoso e Amerika ka lewena sara e dua na tabanalevu vou. Au sa guilecavi iratou na mataveiliutaki ni kalasi ni Mia Maid, ia au nanuma tikoga vakavinaka na nodra lomani au na goneyalewa e kea. Era karona vakavinaka e dua na goneyalewa rerere ka lila me vaka niu a yali tu ka ra vakaitaukeitaki au. Niu tadu tiko mai Delaware, kau goneyalewa Momani duadua ga ena noqu koronivuli torocake ka tiko talega kina e dua na goneyalewa Momani au kila ka dua na auwa ni da draiva ki nona vale, kau vakasamataka,“Oqo sara ga o lomalagi!”
Ena imatai ni gauna ena noqu bula, era a sureti au eso na itokani era bula ena ivakatagedegede e tiko ena Me iSakisaki ni iTabagone, meu laki tiko ena itaviqaravi, ka mera wasea vei au na nodra ivakadinadina ni kosipeli. Au sa uabaleti sara vakalevu cake ena nodra ivakaraitaki ni loloma veikaroni meu tudei rawa ena Lotu i Jisu Karisito ni Yalododonu Edaidai ena gauna o ya ni vakatauvatani kei ka e cakava rawa na vunau se lesoni. Na nodra loloma kei na rarama i Karisito, era sa itukutuku ni kosipeli i Karisito, ka sai ira era na liutaka ka dusimaki au ki na Nona ivavakoso.
Na cava beka a yaco vei ira na noqu itokani mera iliuliu qaqa kina?
E tukuna vakaoqo e dua na daukaulotu tabagone na ibalebale ni veiliutaki? A kaya: “Meda na tiko ena vanua donu kei na gauna donu ni da cakava tiko na lewa ni Turaga ka vukea na tamata e gadreva dina na noda veivuke. Oqo na ka e buli keda meda iliuliu kina.”2 Ena dodonu sa tu vei ira kei na Rarama i Karisito era sa rarama tu kina, sa tiko vei ira na cauravou kei na goneyalewa ena loma ni Lotu taucoko na gugumatua mera veiliutaki ena ivakarau ni iVakabula ka “vukei ira na tamata mera tisaipeli yalodina i … Jisu Karisito.”3
Oi keda na iliuliu eda na veiliutaki, veidusimaki, ka salavata kei ira na noda cauravou kei na goneyalewa. Ia sai ira na mataveiliutaki ni kalasi kei na kuoramu era na veiliutaki ka veidusimaki tiko ena cakacaka ni nodra kalasi kei na kuoramu, oka kina na kena digitaki na lesoni ni Sigatabu ka tuvana na itaviqaravi ena loma ni macawa. Era sa kacivi na iliuliu ni kalasi kei na kuoramu ka tabaki mai na nodra veidusimaki na matabete era vakaidola; ni sa tiko vei ira na lewa ni veiliutaki ka vaqaqacotaki ira na itabagone. Era na muria na ivakaraitaki ni iVakabula ka vulica mera veiqaravi me vakataki Koya ka veivakalotutaki vakataki Koya.
Madigi ni Veiliutaki ni iTabagone
Na veiliutaki e tekivu e vale. “Na noda qarava na noda itavi vua na Kalou me vaka ni da itubutubu ka iliuliu me tekivu ena noda ivakaraitaki mai na noda veiliutaki—bulataki tikoga ena yalodina na ivakavuvuli ni kosipeli mai vale,” e vakavulica o Elder Robert D. Hales ena Kuoramu ni iApositolo Le Tinikarua. “E taura oqo na igu kei na gugumatua e veisiga.”4 Era vakavulica na itubutubu na ivakavuvuli i Karisito. Era na vukei ira na itabagone mera tuvanaka ka rawata na takete. Na Torocake Yadudua kei na iTavi Vua na Kalou ena vukei ira na itabagone me qaqaco nodra ivakadinadina baleti Jisu Karisito, ka vakavakarau ka cakava na veiyalayalati tabu, ka vakayacora na nodra itavi vakalou kei na ilesilesi ena matavuvale, e vale, kei na Lotu.
Ena lotu, sa rawa vei ira na iliuliu ni Matabete i Eroni kei Goneyalewa mera vukei ira na itabagone era mataveiliutaki ni kuoramu kei na kalasi mera kila vinaka nodra itavi tabu ka vakarabailevutaka nodra veikacivi ka qarava ka vaqaqacotaka na veikuoramu kece kei ira na lewe ni kalasi.
Oi keda na qase veiliutaki, meda na vakarautaki ira na itabagone mera liutaka na nodra soqoni ni kuoramu kei na kalasi kei na itaviqaravi ni Muavata. Eda na veivosaki kei ira na itabagone ena bose ni mataveiliutaki ka ra vakadeitaka kina na sala eso mera qaravi ira kina era tiko vakaleqai, mera tiko kece na itabagone ena lesoni ni Sigatabu, ka tuvai na itaviqaravi, cakacaka ni veivuke, keba, kei na koniferedi ni itabagone.
Eda na vakayaloqaqataki ira na mataveiliutaki ni itabagone mera vukei na lewe taucoko ni kalasi kei na kuoramu mera vakaitavi ena cakacaka kece ni veivakabulai, oka kina mera lewenilotu daukaulotu, maroroi na saumaki mai, vakalesui mai na luluqa vakalotu, cakacaka ni valetabu kei na tuvakawa, kei na vakavulica na kosipeli.5 Era na veivuke na mataveiliutaki ni itabagone vei ira kece na cauravou kei na goneyalewa mera kila na marau kei na veivakalougatataki ni nodra veiqaravi ena yaca ni iVakabula ka vakani ira na Nona sipi.
Na itavi ni iliuliu e sega ni, na matau ga ena veisoliyaki tikidua ni Pinterest se na vunautaki ni veika sa vakadeitaki. Na itavi nei iliuliu sai ikoya me vukei ira na cauravou kei na goneyalewa mera vulica ka vakayacora na veiivakavuvuli ka na vukei ira mera veiliutaki ena ivakarau ni iVakabula. Oqo e va vei ira na ivakavuvuli oqori.6
Vakavakarau Vakayalo
Vukei ira na itabagone mera kila vinaka na kaukauwa ni nodra dui vakarautaki ira vakayalo. Vakavulica vei ira mera vakabauta na nodra veiyalayalati era cakava ena cakacaka vakalotu ni sakaramede. Ni sa yalodra dina mera taura me nodra na yaca i Karisito, mera daunanumi Koya, ka muria na Nona ivakaro sa na qai yaco kina me nodra itokani tiko na Yalo Tabu. Era na sega ni tiko duadua ena veiqaravi ena gauna era na rawa ni ciqoma, kila vinaka, ka cakacaka ena veivakauqeti ni Yalo Tabu.
Era na vakavakarau vakayalo ena nodra vakasaqara na veidusimaki ni ra masu yalodina ka vakasaqaqara ena ivolanikalou mera kune isau kina. Era na saga mera muria na ivakaro me na vosa kina vei ira na Yalo Tabu ki yalodra kei na nodra vakasama ka mera na vakila ka kila o cei e gadreva na nodra veivuke kei na cava mera na cakava kina. Era na vakila na loloma savasava i Karisito kivei ira yadua na lewe ni kalasi se kuoramu.
Mai na nodra vakavakarau vakayalo na itabagone era na yalonuidei kina ni ra sa matataka tiko na Turaga ka ra sa Nona italai (raica na V&V 64:29).
Vakaitavi ena Matabose
Vakavulica vei ira na itabagone na ituvatuva tudei bibi kei na kaukauwa vakatakila ni matabose ni ra vakaitavi ena cakacaka sa vakalou oqo ena liutaki tiko kina na Lotu ni Turaga mera na vakalougatataki kina na tamata yadua kei na matavuvale.7 Era sa oka me matabose na komiti ni itabagone nei bisopi kei na bose ni mataveiliutaki ni kalasi kei na kuoramu ka ra na vulica kina na itabagone na nodra itavi ka ciqoma kina na ilesilesi mera qaravi ira na tamata.
O ira na lewe ni matabose:
-
Era sa duavata ka muria na nodra ivakasala na iliuliu ni matabete, ni sa tiko vei ira na idola ni matabete.
-
Wasea na nodra nanuma kei na vakasama ena yalo savasava, vakalou, vakabauta, dodonu, vosota, dina, loloma, kei na veilomani vakaveitacini.
-
Cakacaka vata, ni ra dusimaki mai vua na Yalo Tabu, ka tuvanaka na ka mera cakava mera vukei ira kina era tiko vakaleqai.
Veiqaravi vei Ira Tale Eso
Mera veiliutaki na itabagone ena ivakarau ni iVakabula ni ra veiqaravi ena loloma kei na yalololoma. E vakavulica o Josefa Simici: “E sega ni dua na ka e okati vata kei na noda tuberi ira na tamata, ka da vakatawai ira ena yalo e malumu, mera biuta na nodra ivalavala ca. Ni ra dau yalovinaka ka lomani au eso na tamata, e dau curuma sara ga na noqu vakasama.”8
E vakavulica na iVakabula ni sa ka talei ka iyau levu duadua na tamata (raica na V&V 18:10–15). Vukei ira na noda itabagone mera kila vinaka na dina lagilagi ni sa mai solia o Jisu Karisito na Nona bula ka sa dolava kina na sala mera lako kece Vua na tamata kecega. Ni vakavinavinakataki na ka sa cakava o Koya, era na dodoliga yani na italai ni Turaga ka veiqaravi ena yalololoma kivei ira yadua na cauravou kei na goneyalewa, a solibula kina na iVakabula.
Vakavulica na Kosipeli i Jisu Karisito
Vukei ira na cauravou kei na goneyalewa mera kila na veimadigi mera vakavulica kina na kosipeli ka kila vinaka ni nodra veivakavulici bibi duadua o ya na nodra ivakaraitaki. Ni ra sa bulataka tiko na itabagone na nodra vosa na parofita ka tudei tiko ena ivakatagedegede e tiko ena Me iSakisaki ni iTabagone, era na veiliutaki ena ivakarau ni iVakabula. Mai na dodonu ni nodra vosa kei na ivalavala, era sa vakaraitaka tiko na ibalebale ni tisaipeli dina i Jisu Karisito. Era sa tu mera Nona ivakadinadina sa sega kina na veivakaisini. Ia ni ra sa soli ivakadinadina, veivuke ena soli lesoni ena Sigatabu, se wasea na dina ni kosipeli ki na nodra itokani, era na vakasinaiti ena yalotabu ka yaco na nodra vosa me kaukauwa e veisautaki.
Veivakavulici ena iVakarau ni iVakabula
Na veiliutaki ena ivakarau ni iVakabula sa dua na madigi tabu era na gadrevi kina na itabagone mera solia na nodra vinaka duadua ni ra qarava na Turaga ena nodra vale, ena loma ni Lotu, kei na itikotiko raraba. O ira na cauravou kei na goneyalewa era veiliutaki ena ivakarau ni iVakabula era sa tukuna tiko na kosipeli i Karisito, era sa isau ni nodra masu eso, sa agilosi veiqaravi vei ira era tiko vakaleqai, ka ra sa rarama i Karisito ki na vuravura oqo.