Vosa ena Vosa
Nai Vakatekivu 1:26–27
Na cava na kena ibalebale me buli mei tovo vata kei na Kalou?
26 A sa kaya na Kalou, Me datou bulia na tamata mei tovo vata kei kedatou, ka me ucui kedatou; ka me ra lewa na ika ni veiwasawasa, kei na manumanu vuka, kei na manumanu e yavai va, kei vuravura taucoko, kei na ka kecega sa qasi voli e delai vuravura.
27 A sa bulia na tamata na Kalou mei tovo vata kei koya, e nai tovo ni Kalou sa buli koya ko koya; na tagane kei na yalewa sa buli rau ko koya.
Nai tovo ni Kalou
“Na vakilai ni dua na kaukauwa cecere cake mai na tamata vakaikoya e sega sara ni veivakayalolailaitaki; ia, e veivakacerecerei. Kevaka ga meda na vakila ni da sa buli tu me itovo vata kei na Kalou, eda na sega ni kune dredre ni torovi Koya. … Na kila oqo, rawati mai na vakabauta, ena kauta mai na maravu ni loma kei na vakacegu vakasakiti.”
Peresitedi Thomas S. Monson, “Na Valenicina ni Turaga,” Ensign, Nove. 1990, 95–96.
Me datou
Na ibiubiu ni vosa tomani sa rogoci me vaka e vosa tiko na Kalou kivua tale e dua—baleta sa vakakina o Koya. A vakatavulica o Josefa Simici, “Ena ivakatekivu, a kaciva e dua na matabose ni Kalou taucoko na ulu ni vei-Kalou; ka ra sa lako vata mai ka [vakarautaka] e dua na ituvatuva me buli kina na vuravura ka vakatamatataka” (iTukutuku Makawa ni Lotu, 6:308). Na matabose oqo a oka kina o Jisu Karisito kei na so tale (raica na Mosese 2:26–27; Eparama 4:26–27).
Me ucui kedatou
“Na Kalou vakai-Koya a vakataki keda tu ena dua na gauna, ka sa laki bula vakalou, ka sa laki tiko sara mai lomalagi e cake! Oqori e dua na itukutuku vuni bibi. Kevaka me tadola edaidai na ilati, ka … mo raici Koya edaidai, ko na raici Koya ni vaka ga na ibulibuli ni tamata—e vaka ga na kemu ibulibuli vakatamata, na itovo, kei na vatuka ni tamata.”
Nodra iVakavuvuli na Peresitedi ni Lotu: Josefa Simici (2007), 44.
“Na tamata sa luve ni Kalou, a buli ena itovo vakalou ka cauraki ena ivakarau ni bula vakalou, ka dina ni sa luve tagane dramidrami ni dua na tama kei na tina e vuravura e sa ganita ena kena gauna me na yaco me dua na turaga, ka sa rawa kina ki na luve tawabucini ni itubutubu vakasilesitieli, mai na veika e sotavi ena veitabayabaki kei na veitabagauna, me veisau voli ki na dua na Kalou.”
Na Mataveiliutaki Taumada, “The Origin of Man,” Improvement Era, Nove. 1909, 81; Ensign, Fepe. 2002, 30.
Vakatulewa
“Na vuravura kei na veika kece e tu kina sa dodonu me vakayagataki vakavuku me tokona na matavuvale vakatamata. Ia, taucoko sa dauniveiqaravi—sega ni taukei—ena vuravura oqo kei na kena isolisoli ka na saumi taro kivua na Kalou ena vuku ni ka era cakava me baleta na Nona veibuli.”
“Environmental Stewardship and Conservation,” mormonnewsroom.org; raica talega na Vunau kei na Veiyalayalati 104:13–15.
Tagane kei na yalewa
“Na turaga kei na marama taucoko sa ucuya na Tamada kei na Tinada tawayalani ka ra sa luvena tagane ka luvena yalewa na Kalou.”
Na Mataveiliutaki Taumada, “The Origin of Man,” Improvement Era, Nove. 1909, 78; Ensign, Fepe. 2002, 29.
“Na yalewa se tagane e sa dua na ituvaki veiganiti ni ivakatakilakila kei na inaki vakayadua ena bula taumada, bula oqo kei na kena e tawamudu.”
“Na Matavuvale: Ai Vakaro ki Vuravura Raraba,” Liaona, Nove. 2010, 129.