Gunit og Maayo sa Gunitanan
Ni Elder Daniel L. Johnson
Sa Seventy
Gikan sa usa ka debosyonal nga pakigpulong, “Sa Kanunay Naggunit sa Gunitanan nga Puthaw,” nga gihatag sa Brigham Young University–Idaho niadtong Mayo 12, 2015. Alang sa kompleto nga teksto sa Iningles, bisitaha ang web.byui.edu/devotionalsandspeeches.
Ang kanunay nga pagtuon sa mga kasulatan nagtabang kanato nga mapatutok ang atong mga mata, mga hunahuna, ug kasingkasing ngadto sa Manluluwas, ug samtang atong gamiton ug sundon ang mga pagtulun-an nga anaa sa mga kasulatan, kita mas mahimong sama Kaniya.
Panahon sa ilang panaw diha sa kamingawan, si Lehi ug ang iyang pamilya nakakaplag og “usa ka malingin nga bola nga katingalahan ang pagkahimo” diha sa yuta usa ka buntag sa ilang pagmata. Kini adunay duha ka mga buburan, ang usa nagtudlo “sa agianan diin [sila] kinahanglan moagi” (1 Nephi 16:10).
Ang Liahona, o bola, nagpakita usab og “usa ka bag-o nga sinulat” nga mihatag kanila “sa panabut mahitungod sa mga pamaagi sa Ginoo.” Kini nga sinulat “giusab matag karon ug unya, sumala ngadto sa hugot nga pagtuo ug kakugi diin [sila] mihatag ngadto niini” (tan-awa sa 1 Nephi 16:28–29).
Si Lehi ug ang iyang pamilya nakaangkon na sa mga palid nga tumbaga, nga naglangkob sa mga sinulat ug mga panagna sa daghang mga propeta sa Daang Tugon. Ang mga palid nga tumbaga ug ang Liahona naglangkob sa ilang mga kasulatan, ug ang mga tawo ni Lehi gilauman nga magtuon ug magsunod niini sa kanunay. Kon sila mibuhat sa ingon, sila miuswag sa ilang panaw; kon dili nila buhaton, sila nalangay diha sa kamingawan ug gisakit uban sa kagutom ug kauhaw.
Unsa man ang gusto nga itudlo sa Ginoo—ug kanato—pinaagi sa mga kalihokan sa Liahona?
Usa sa nag-unang katuyoan sa mga kasulatan mao ang pagtabang kanato nga makahibalo, makasabut, ug mahisama sa Manluluwas (tan-awa sa 3 Nephi 27: 27). Ang kanunay nga pagtuon sa mga kasulatan nagtabang kanato nga mapatutok ang atong mga mata, mga hunahuna, ug kasingkasing ngadto Kaniya. Samtang atong gamiton ug sundon ang mga pagtulun-an nga anaa sa mga kasulatan, kita mas mahimong sama Kaniya. Samtang kita mas mahimong sama Kaniya, kita mahimong mga kandidato alang sa kinabuhing dayon (tan-awa sa Juan 5:39).
Ang Damgo ni Lehi
Paghulagway pinaagi ni J. Kirk Richards
Sa damgo, o panan-awon, ni Lehi upat ka grupo sa mga katawhan ang girepresentar. Ang unang tulo ka mga grupo misulod sa dalan paingon sa kahoy sa kinabuhi. Ang ganghaan sa dalan mao ang bunyag (tan-awa sa 2 Nephi 31:17–18), busa mga miyembro sa Simbahan ang gipasabut diha sa unang tulo ka mga grupo.
Dili ko maghisgut sa ikaupat nga grupo—kadtong mideretso ngadto sa dako ug lapad nga gambalay. Samtang kita maghunahuna sa ubang tulo ka mga grupo, hinoon, tingali mahimo kamong motimbang-timbang sa kaugalingon sa pagtino kon asa kamo nga grupo nahisakop ug pangutan-a ang inyong kaugalingon kon asa nga grupo ninyo gustong mahisakop.
Grupo 1
“Ug ako nakakita og dili maihap nga mga pundok sa mga katawhan, kadaghanan kanila mipadayon paingon ngadto sa unahan, nga unta sila makaabut sa dalan paingon ngadto sa kahoy diin ako nagbarug.
“Ug nahinabo nga sila miduol, ug misugod sa pagsubay sa dalan paingon sa kahoy.
“Ug nahinabo nga dihay mitungha nga usa ka gabon sa kangitngit; oo, gani hilabihan ka dako sa gabon sa kangitngit, hangtud nga sila kinsa misugod sa pagsubay sa agianan, nangawala sa ilang agianan, nga sila nangasaag ug nangawala” (1 Nephi 8:21–23).
Ang mga sakop niini nga grupo tataw nga wala mobasa o magtuon sa kasulatan, maminaw o motan-aw sa kinatibuk-ang komperensya, mobasa sa Liahona, o motambong sa mga miting sa Dominggo, diin ang tanan nagtanyag sa pulong sa Dios. Agi og sangputanan, sila nahisalaag.
Grupo 2
“Ug nahinabo nga ako nakakita nga ang uban mipadayon paingon sa unahan, ug sila miduol ug migunit sa tumoy sa gunitanan nga puthaw; ug sila mipadayon paingon sa unahan lahus sa gabon sa kangitngit, nanggunit sa gunitanan nga puthaw, hangtud nga sila miabut ug mikaon sa bunga sa kahoy. …
“Ug human sila makatilaw sa bunga sila nangaulaw, tungod niadto nga nagbugal-bugal kanila; ug sila nangahulog ngadto sa gidili nga mga dalan ug nangawala” (1 Nephi 8:24, 28).
Timan-i nga kini nga grupo nakahupot ug migunit sa gunitanan nga puthaw. Sila migunit hangtud sila miabut sa kahoy sa kinabuhi ug mikaon sa bunga niini. Apan ilang gikaulaw ang ebanghelyo ni Jesukristo, mihunong sa pag-focus sa Manluluwas, ug nabalda sa mga kalingawan, mga tintasyon, ug mga katigayunan sa kalibutan. Dayon sila usab nangawala.
Ang yawe sa pagsabut niini nga mga bersikulo mao ang mga pulong nga “nanggunit sa gunitanan nga puthaw.” Matandi nako ang pulong nga nanggunit ngadto sa usa ka “namuti ang buko sa mga tudlo” nga kasinatian. Kon nakasulay na kamo og white-water rafting, makahinumdom kamo nga namuti ang mga buko sa inyong mga tudlo sa inyong pagpanggunit og maayo sa balsa. Dayon, sa dihang miabut na kamo sa kalma nga mga tubig, unsa ang inyong gibuhat? Namuhi kamo!
Sa ebanghelyo nga kahulugan, kini mahitabo kon kamo hangyoon sa pag-andam og pakigpulong o kon kamo nag-atubang og kalisdanan, sama sa usa ka kamatayon diha sa pamilya o sa panagbulag sa usa ka relasyon. Mangita kamo og mga pakigpulong sa kinatibuk-ang komperensya nga panagsa ra ninyong paminawon o mokonsulta sa mga kasulatan nga kasagaran inyong gibaliwala. Nagtinguha kamo og espirituhanong giya ug suporta tungod sa inyong espirituhanon nga kahuyang. Dayon, kon ang krisis mahuman na, mamuhi kamo! Imong ibutang og balik diha sa estante ang mga kasulatan, mobalik sa karaang mga binuhatan nga panagsa ra nga motambong sa Simbahan, ug mobiya sa inadlaw nga pag-ampo—hangtud nga ang sunod nga krisis, o makaputi sa buko sa mga tudlo nga kasination, moabut. Sa laing pagkasulti, modangup lang kamo sa Manluluwas alang sa tabang kon moabut ang dakong panginahanglan imbis nga kanunay.
Ang mga sakop niini nga grupo nabunyagan, ug daghan tingali ang na-orden sa priesthood, nakadawat og mga ordinansa sa templo, nakaserbisyo og full-time nga misyon ug naminyo sa templo. Apan sila namuhi! Mihunong sila sa kanunay nga pagbasa sa kasulatan, nahulog ngadto sa gidili nga mga dalan, ug nangawala.
Maayo na lang, kadaghanan sa mga young adult ug mga returned missionary nagpabilin nga matinud-anon ngadto sa mga kamatuoran sa ebanghelyo nga ilang nakat-unan ug gipakigbahin. Ila usab nga gi-focus ang ilang mga kinabuhi ngadto sa Manluluwas pinaagi sa inadlaw nga pagtuon sa kasulatan ug pag-ampo. Mapasalamaton kami alang kanila ug sa ilang pagkamatinud-anon. Sila mao ang kaugmaon sa Simbahan ug umaabut nga mga ginikanan niadtong kinsa modala sa Simbahan sa unahan.
Grupo 3
“Tan-awa, [si Lehi] nakakita sa uban nga pundok sa mga katawhan nga mipadayon paingon sa unahan; ug sila miabut ug migunit sa tumoy sa gunitanan nga puthaw; ug sila mipadayon sa ilang agianan paingon sa unahan, nga sa kanunay naggunit sa gunitanan nga puthaw, hangtud nga sila miabut ug natumba [miyukbo] ug mikaon sa bunga sa kahoy” (1 Nephi 8:30).
Timan-i ang mga pulong nga “kanunay naggunit sa gunitanan nga puthaw.” Kini nga grupo nagbasa sa mga kasulatan kanunay. Sila nagpadayon sa ilang pag-focus sa Manluluwas kanunay.
Ang mga kasulatan mao ang labing importante nga butang nga atong matun-an. Kini kinahanglan labaw pa sa chemistry, physics, accounting, sayaw, musika, sports, o bisan unsang ubang sekular nga pagtuon o kalihokan.
Sugdi ang matag adlaw uban sa mga kasulatan. Ang pag-ampo ug pagtuon sa kasulatan mag-uban. Sila manag-uban nga dili mahimong bulagon. Ang kanunay nga pag-ampo mogiya kaninyo ngadto sa mga kasulatan, ug ang padayon nga pagtuon sa kasulatan mogiya kaninyo sa pag-ampo. Ang duha magpabilin kaninyong naka-focus sa Manluluwas ug mohatag kaninyo og access ngadto sa mga pagpadayag ug sa kalinaw nga moabut lamang kon “kanunay naggunit sa gunitanan nga puthaw.” Ang pag-ampo ug pagtuon sa kasulatan mogiya kaninyo ngadto sa templo. Kini makahimo kaninyo nga gustong ibalaan ang adlawng Igpapahulay. Kini motabang kaninyo sa paglikay ug pagbuntog sa mga tintasyon sa kaaway.
Karon akong dad-on ang inyong pagtagad ngadto sa mga pulong nga “sila miabut ug natumba ug mikaon sa bunga sa kahoy.” Ang yawe aron sa pagsabut niini nga mga pulong makita sa 1 Nephi kapitulo 11:
“Ug nahinabo human ako makakita sa kahoy, ako miingon ngadto sa Espiritu: Ako nakakita sa imong gipakita ngari kanako nga kahoy nga bililhon labaw sa tanan.
“Ug siya miingon ngari kanako: Unsa ang imong gitinguha?
“Ug ako miingon ngadto kaniya: Aron masayud sa kahulugan niina.”
Ang anghel mitubag, “Tan-awa!” Dayon si Nephi nakakita sa panan-awon sa Birhen nga si Maria, kinsa giila sa anghel isip “ang inahan sa Anak sa Dios.” Sunod, si Nephi nakakita ni Maria nga nagkugos og bata—“ang Kordero sa Dios”—sa iyang mga bukton.
Karon tan-awa ang bersikulo 24: “Ug ako mitan-aw, ug ako nakakita sa Anak sa Dios nga miadto taliwala sa mga katawhan; ug ako nakakita sa daghan nga miyukbo sa iyang tiilan ug misimba kaniya” (tan-awa sa 1 Nephi 11:9–24; emphasis gidugang).
Ang kahoy nagrepresentar sa gugma sa Dios, sama sa gipakita pinaagi sa Iyang Anak, Si Jesukristo (tan-awa sa 1 Nephi 11:21–22). Kadtong anaa sa Grupo 2 kinsa miabut sa kahoy wala miyukbo, ingon man kadtong anaa sa Grupo 3. Posible ba nga maanaa sa presensya sa Anak sa Dios ug dili masayud niini? Kinahanglan lang ninyong basahon ang Bag-ong Tugon aron makakita sa tubag. Ang Manluluwas nangalagad sulod sa tulo ka tuig, nagtudlo ug naghimo og mga milagro, apan pipila lang ang nakaila Kaniya kon si kinsa gayud Siya.
Siksika ang mga Kasulatan
Pangutan-a ang inyong kaugalingon niini:
-
Unsay akong mahimo aron sa pagsiguro nga ako kanunay mogunit sa gunitanan nga puthaw aron nga kon ako moabut sa kahoy sa kinabuhi, ako makaila sa Manluluwas ug moyukbo ug mosimba kaniya?
-
Unsay akong mabuhat aron ang akong mga mata, hunahuna, ug kasingkasing nakatutok sa Manluluwas?
-
Unsay akong mahimo aron mas mahimong sama sa Manluluwas?
Ang tubag sa tulo ka mga pangutana makita diha sa mga kasulatan. “Kamo nagasusi sa mga kasulatan,” ang Manluluwas miingon, “kay nagahunahuna man kamo nga pinaagi niini makakaplag kamo sa kinabuhing dayon: ngani kini mao ang nagapanghimatuod mahitungod kanako” (Juan 5:39). Kon magtuon kamo sa mga kasulatan matag adlaw sa inyong kinabuhi, kamo adunay kalig-on sa batok sa grabe nga kalapasan; mas importante, mas makaila kamo sa Manluluwas. Makahimo kamo sa pagtutok sa inyong mga mata, hunahuna, ug kasingkasing ngadto Kaniya.
Samtang makaila kamo ni Jesukristo, mogamit sa Iyang mga pagtulun-an, ug mosunod sa Iyang ehemplo, kamo mahimong sama Kaniya. Samtang kamo mahimong sama Kaniya, kamo mahimong kandidato nga makapuyo sa kahangturan diha sa Iyang presensya.