Pag-ampo uban sa Tinuod nga Katuyoan

Niadtong 1960 nakahimamat ko og batan-ong lalaki sa usa ka party nga misulti nako nga si Jesukristo mibisita sa Amerika human sa Iyang Pagkabanhaw. Akong nakita nga madanihon kini nga ideya ug gusto kong masayud pa og dugang, busa gisugdan nako ang pagsiksik sa mga library ug nangutana sa lain-laing mga relihiyusong pundok sa akong lungsod sa San Miguel, El Salvador.

Nagsiksik ko hapit sa tulo ka tuig apan walay makita. Sa dihang akong gisulti ngadto sa mga lider sa relihiyon nga nakadungog ko nga si Kristo miadto sa Amerika, miingon sila nga nalingla ko. Tungod kay ang akong pagsiksik walay gidulngan, sa katapusan nakatuo ko nga husto sila.

Usa ka adlaw, duha ka misyonaryo gikan sa Simbahan ni Jesukristo sa mga Santos sa Ulahing mga Adlaw miabut sa akong balay ug miingon nga sila dunay importante nga mensahe alang sa akong pamilya. Diha-diha dayon nangutana ko nila, “Nahibalo ba mo nga si Jesukristo miadto sa Amerika?”

Usa kanila miingon, “Kami mopamatuod niana.”

Nianang higayona akong gibati ang tumang kahinam sulod sa akong hunahuna ug kasingkasing ug nangutana, “Giunsa ninyo pagkahibalo niana?”

Gikuha niya ang usa ka basahon sa iyang bag ug miingon, “Kami nasayud nga si Kristo mianhi dinhi tungod niini nga basahon, ang Basahon ni Mormon.”

Ang gitudlo sa mga misyonaryo nako sa unang diskusyon nakalibug nako, ug nagduha-duha ko sa istorya bahin sa unang panan-awon ni Propetang Joseph mahitungod sa Amahan ug sa Anak.

Hinoon, naintriga ko sa Basahon ni Mormon, ug ang mga misyonaryo nagpadayon sa pagtudlo nako. Usa ka hapon nangutana sila nako, “Ikaw ba nag-ampo na aron mahibalo kon ang among gitudlo nimo tinuod?”

Giingnan nako sila nga nag-ampo ko apan walay tubag.

“Kinahanglang mag-ampo ka uban sa tinuod nga katuyoan,” miingon sila.

Akong gibasa ang Basahon ni Mormon sulod sa pipila ka gabii. Akong nabasa ug mituo ko nga mipakita si Jesukristo sa mga Nephite. Apan dili gihapon ko makadawat sa panan-awon ni Joseph Smith. Ang akong pakigbisog hilabihan.

Usa ka gabii miluhod kong nag-inusara ug giablihan ang akong kasingkasing ngadto sa Dios. Giingnan nako Siya nga kinahanglan kong masayud kon Siya Mismo mipakita ba gyud ni Joseph Smith. Kon tinuod man, misaad ko Kaniya nga magpabunyag ko sa Simbahan ug moserbisyo Kaniya sa tibuok nakong kinabuhi.

Dihang mibangon ko sa sayo sa buntag, ang tubag miabut kanako pinaagi sa Espiritu Santo. Gihawanan ang akong hunahuna ug napuno sa kalinaw ang akong kasingkasing. Sukad niadtong higayuna hangtud karon, wala na koy pagduha-duha nga si Joseph Smith tinuod nga propeta sa Dios, nga ang Basahon ni Mormon lain nga tugon ni Jesukristo, ug nga si Jesukristo ang atong Manluluwas ug Manunubos. Ako nasayud nga si Kristo miadto sa Amerika human sa Iyang Pagkabanhaw. Ang akong kalag nahimuot diha niining talagsaon nga kahibalo nga gitudlo ngari nako pinaagi sa gahum sa Espiritu Santo.