Duha lang Ka Bunyag?
Thomas R. Coleman, Kansas, USA
Paghulagway pinaagi ni Allen Garns
Samtang nagserbisyo ko isip presidente sa Misyon sa Siyudad sa Guatemala Guatemala, nakadawat mi og pipila ka bag-ong full-time nga mga misyonaryo. Samtang ako mipaila-ila sa akong kaugalingon niini nga mga misyonaryo, ako silang gisuginlan sa akong pagkakabig ug pagbunyag.
Ako misugilon nga sila si Elder Tree ug Wayne Matthews mitudlo nako sa ebanghelyo sa dihang nuybe anyos pa ko ug nagpuyo sa Glendive, Montana, USA. Ang duha ka mga misyonaryo ug usa ka miyembro sa Glendive Branch mihatud nako sa Williston, North Dakota, USA, nianang mabugnawng adlaw sa tingtugnaw niadtong 1957 aron ko mabunyagan didto sa bunyagan sa usa ka balay tigumanan.
Paghuman nako og istorya sa akong sugilanon ug nakighinabi sa bag-ong mga misyonaryo, usa nila, si Elder Benjamin Pixton, miingon nako nga iyang lolo si David Tree. Pagkaanindot nga surprisa! Si Elder Tree adunay gibunyagan nga sa usa ka nuybe anyos nga batang lalaki sa Glendive, Montana, ug dul-an sa 50 ka tuig ang milabay kanang batang lalaki gitawag isip presidente sa misyon sa iyang apo nga lalaki.
Sa dihang ang mga ginikanan ug mga apohan ni Elder Pixton miabut aron sa pagkuha kaniya sa pagkahuman sa iyang misyon, nalipay ko nga nahimamat pag-usab si David Tree. Atol sa among panag-istoryahanay, Akong gipakita niya ang Basahon ni Mormon—uban sa mensahe ug mga saad nga iyang nasulat—nga iyang gihatag kanako sa adlaw nga ako nabunyagan.
Ang inahan ni Elder Pixton miingon niya nga ang iyang amahan wala maghisgut kaayo mahitungod sa iyang misyon. Siya mibati nga wala kaayo siya magmalampuson tungod kay duha lang ka tawo ang iyang nabunyagan: usa ka single nga babaye ug usa ka nuybe anyos nga batang lalaki.
Agig pasalamat miingon ko niya nga tungod sa iyang mga paningkamot, ang tanan sa akong pamilya sa katapusan mipasakop sa Simbahan ug ang akong igsoong lalaki ug ako, uban sa among siyam ka mga anak nga lalaki, nagserbisyo og full-time nga misyon. Tungod sa iyang misyonaryo nga pagserbisyo, miingon ko, dili na maihap ang natudloan sa ebanghelyo ug mipasakop sa Simbahan.
Daghang maayo, takus, mahalaron nga mga tighupot sa priesthood miamuma nako sa panahon sa akong pagkabata ug pagka-ulitawo, sugod ni Elder Tree ug sa iyang kauban nga si Elder Mathews. Ako kanunay nga mapasalamaton nga sila mitudlo kanako sa ebanghelyo ni Jesukristo ug midala kanako ngadto sa gingharian sa Ginoo, diin Siya mipanalangin kanako nga dili masukod.