Hangtud sa Sunod Natong Panagkita
Tinuod nga Kahalangdon
Dili kita kinahanglang motan-aw og layo aron makita ang wala matagad ug nakalimtan nga mga bayani sa inadlaw-adlaw nga kinabuhi.
Kay kita padayon man nga gipakita sa kalibutan sa kahulugan sa kalampusan ug kahalangdon, masabtan ra nga makakumpara kita kon unsa kita ug unsa ang uban, o unsa sila sa atong tan-aw, ug usab kon unsay naa nato ug unsay naa sa uban. … Kita sa kasagaran motugot sa dili makiangayon ug dili angay nga mga pagkumpara sa pagguba sa atong kalipay kon kini mopabati kanato nga kita wala matagbaw o wala makahimo sa angayng buhaton o dili malampuson. Usahay, tungod niini nga mga pagbati, masayop na hinuon kita, ug kanunay kitang maghunahuna sa atong mga kapakyasan samtang atong mabaliwala ang mga aspeto sa atong kinabuhi nga naglangkob sa mga elemento sa tinuod nga kahalangdon. …
… Sa pagkatinuod kini naglakip sa mga butang nga kinahanglan gayud nga buhaton aron mahimong usa ka maayo nga amahan o usa ka maayo nga inahan, apan, sa kinatibuk-an, kini mao usab ang liboan ka gagmay nga mga binuhatan ug mga buluhaton sa pagserbisyo ug pagsakripisyo nga naglangkob sa pagtugyan o dili paghunahuna sa kinabuhi sa usa ka tawo alang sa uban ug alang sa Ginoo. Naglakip kini sa pag-angkon og kahibalo bahin sa atong Amahan sa Langit ug sa Iyang ebanghelyo. Naglakip kini sa pagdala sa uban nga makabaton og pagtuo ug pakigdait sa Iyang gingharian. Kining mga butanga sa kasagaran wala makakuha sa pagtagad o pasidungog sa kalibutan. …
Sigurado dili kita kinahanglang motan-aw og layo aron makita ang wala matagad ug nakalimtan nga mga bayani sa inadlaw-adlaw nga kinabuhi. Namulong ko kabahin niadtong inyong kaila ug akong kaila kinsa hilum ug padayong mihimo sa mga butang nga angay nilang buhaton. Naghisgot ko mahitungod niadtong kanunay nga anaa ug kanunay nga andam. Ang akong gipasabut mao ang dili komon nga kaisug sa inahan kinsa—kada oras, sa adlaw ug gabii—magpabilin ug mag-atiman sa usa ka anak nga dunay sakit, o ang dunay kakulangan nga nanlimbasug ug nag-antus nga wala magbagulbol. Akong gilakip kadtong kinsa kanunay nga moboluntaryo sa paghatag og dugo. … Naghunahuna ko niadtong kinsa dili mga inahan apan kinsa bisan pa niana nahimong “inahan” sa mga bata sa kalibutan. Namulong ko kabahin niadtong kinsa anaa kanunay aron sa paghigugma ug pag-amuma.
Naghisgot usab ako mahitungod sa mga magtutudlo ug mga nurse ug mga mag-uuma ug sa uban nga naghimo sa maayo nga buhat sa kalibutan, kinsa nagtudlo ug nagpakaon ug nagsul-ob, apan kinsa usab, agi og dugang, naghimo sa buhat sa Ginoo—kadtong nagbayaw ug naghigugma. Ang akong gipasabut mao kadtong mga matinuoron ug mabination ug makugihon sa ilang inadlawng buluhaton, apan mga sulugoon usab sa Agalon ug magbalantay sa Iyang mga karnero. …
Niadtong kinsa naghimo sa ordinaryo nga buhat sa kalibutan apan naghunahuna mahitungod sa bili sa ilang mga kalampusan; niadtong mga nagkugi og trabaho niini nga Simbahan, kinsa nagpadayon sa buhat sa Ginoo sa daghang mga paagi sa hilum apan mahinungdanong mga paagi; niadtong mga asin sa yuta ug kalig-on sa kalibutan ug sa mahinungdanong mga tigsuporta sa matag nasud—kaninyo among ipahayag ang among pagdayeg. Kon molahutay kamo sa katapusan, ug kon kamo magmaisugon diha sa pagpamatuod kang Jesus, inyong makab-ot ang tinuod nga kahalangdon ug magpuyo didto sa presensya sa atong Amahan sa Langit.