Andrei kei na Vosaca
E vakaitikotiko mai Utah, Amerika, o koya e vola.
“Au na tovolea meu veivutuni, meu vinaka cake, meu dau masu” (Children’s Songbook, 98).
“O nanuma beka ni o uasivi cake mai vei ira kece tale baleta ni o sega ni dau vosa ca,” e kaya o Nikolai ena gauna ni vakacagicagi.
“E sega ni dina oqori,” e kaya o Andrei.
“Ia a cava o sega ni rawa ni cavuta kina e dua na vosaca? E dua mada ga? O na sega ni rawa ni mate kina. Na tamata kecega e dau vosaca.”
Vakaribataba ga o Andrei. “Au sega ga ni vinakata.”
E kila o Andrei ni cala na vosaca ka na vakavuna me lako tani na Yalo Tabu. E vinakata o Andrei me tiko vata kei koya na Yalo Tabu. Sa mani sega kina ni vosaca.
Se qai vou yani ki koronivuli o Andrei, o Nikolai duadua ga ena nona kalasi ono e vinakata me rau veitokani. Ia o Nikolai duadua ga e dau vakasosataki koya ena vosaca e veisiga kece. Ia ena veisiga yadua sa dau oca o Andrei ena vaka sega. E rerevaka o Andrei de na oti nona via veitokani vata kei koya o Nikolai, oti sa na qai galili dina.
“Tukuna mada ga e dua na vosaca,” e kaya o Nikolai ni suka na vuli. “Oti au sa na sega tale ni vakasosataki iko.”
Sa oca o Andrei na vakasosataki tiko ka mani vosaca—e dua e sega soti ni ca sara.
A deguvacu o Nikolai. “Vinaka, oqo o sa dua vei keimami.”
Ni oti oya, era sa vosa talega vei Andrei na itokani tale eso nei Nikolai. Era vakasigalevu vata kei koya ka qito veicaqe vata kei koya ena vakacagicagi. Ia na tiko ena ilawalawa itokani nei Nikolai e vaka na lako yani ki na tobunuku yavala. Na levu ga ni nona tiko vata kei ira o Andrei, na levu ni nona vosa ka ivalavala vakataki ira. Ka ra dau vosaca kece. Vakalevu sara. Era dau dredre ka veirulaki. Era tukuna na veika ca baleta nodra qasenivuli. Era dau cudru ka ivalavala kaukauwa vakalevu. Vakamalua sa tekivu dau cudrucudru mai o Andrei ka levu nona iulubale ni vosaca.
Ena dua na bogi ni rau yali tu o Ta kei Na, rau qai veiba o Andrei kei ganena qase o Katya baleta na iyaloyalo me saravi. Ni bera ni vakasamataka o Andrei sa rika mai gusuna e dua na vosaca,
A kurabui vakalevu o Katya. “Au na tukuna vei Na.”
A cici o Andrei ki na nona rumu ka sogota mai vakaukauwa. Na cava beka e leqa vei ira kecega na tamata? Na cava beka era vakacudrui koya tiko kina e veigauna? Ni rau lesu mai nona itubutubu, a vakalaqa vakalailai o Andrei na nona katuba ka rogoci Katya ni kaya, “Na, a vosacataki au o Andrei.”
“Na Cava?” E kurabui na domoi Na. “E sega ni rawa vakadua ni vosaca o Andrei.”
A sogota na katuba o Andrei ka davoraki koya yani ena nona idavodavo. E vakasamataka na nona sa duatani mai ena gauna sa tekivu dau vosaca kina. Sa dua na gauna balavu mai na gauna a tekivu vakila kina na Yalo Tabu.
A tekiduru ena yasa ni nona idavodavo o Andrei ka masu. “Tamaqu mai Lomalagi lomani, ni vosoti au, au sa rui dau ivalavala kaukauwa ka cudrucudru. Ni vosoti au niu sa tekivu vosaca. Au na vinaka cake.”
Ni masu o Andrei, a vakila na raragi ni yalona. Qai vakadua mai na gauna e tekivu vosaca kina me vakila na marau. E kila ni lomani koya na Kalou, ka rawa ni vakila na Yalo Tabu. A vakila ni vosoti ka kila ni rawa ni veisau ka yaco me vinaka cake.
Ni oti nona masu, a tukuna vei Na na ka dina ka kere veivosoti vei Katya. A vinaka cake na yaloi Andrei ni oti oya. E vinaka na yalo ni da veivutuni.
Ena siga ka tarava mai koronivuli, a sega ni vakasigalevu vata kei na ilawalawa nei Nikolai o Andrei. Ia a dabe vata kei ira eso na gone e sega ni kila. Ena taura toka na gauna, ia e kila o Andrei ni na kunea eso na itokani era gone vinaka dau mamarau ka sega ni dau vosaca. Me vakataki koya.