Vakananumi Jisu
O dauvolaivola e vakaitikotiko e Kalifonia, Amerika.
A marau vakalevu sara o Mia. Ni oya na imatai ni gauna me laki lotu. Rau a tukuna na daukaulotu ki na nona matavuvale na veika me baleta na lotu oqo. Sa lomadratou me ratou gole mai.
Sa veiraiyaki sara o Mia. A raica sara e dua na isulu vulavula ena teveli. E dua na ka a tiko e rukuna.
“Na cava e tiko e ruku ni sulu o ya?” A taroga o Mia e dua vei rau na daukaulotu.
A dredre sara o Sister Hanson. “Na sakaramede.”
Sakaramede. O ya e dua na vosa cecere. A rogoca o Mia ni rau tukuna tiko na daukaulotu na ka oqo vei Ta kei Na. Ia a sega ni vakadeitaka na cava o ya.
Era sa qai lagasere kece. E rua na tagane sa qai cega na isulu vulavula. A tiko e rukuna e vica na tere madrai! Sa raici rau o Mia ni rau sa dovia vakalalai na madrai.
Ni oti na sere sa qai masu e dua na tagane. Ratou sa qai vota yani na vo ni tagane na madrai kivei ira kece na tamata.
“Na madrai e vukea meda vakananuma kina na yago i Jisu,” a kaya lo o Sister García.
A taura o Mia e dua na tiki ni madrai. A raitayalotaki Jisu ni tucake tu e matana.
Oti o ya a dua tale na masu. Era a veisoliyaka yani na tagane na tere ni bilo wai lalai.
“Na madrai e vukea meda vakananuma kina na yago i Jisu,” a kaya lo o Sister García. “A mate ena vukuda baleta ni lomani keda.”
A taura o Mia e dua na bilo wai. A vakasamataka na levu ni nona lomani koya o Jisu. A vakila ni vaka me mokoti koya vakavinaka sara o Koya.
E muri a qai solia o Sisita Hanson vei Mia e dua na iyaloyalo lailai i Jisu. “Eda kania na madrai ka gunuva na wai meda vakananumi Jisu kina ka yalataka meda muri Koya.” A dredre o koya. “Na cava o nanuma baleta na sakaramede?”
A raica sara o Mia na iyaloyalo i Jisu. E nanuma lesu na yalo vinaka a vakila vei koya. A dredre sara. “A totoka vakaidina! Au taleitaki Jisu.”