Meu na Vuli Vakacava ena Noqu Vakasama vata kei Na Yaloqu?

E kaya o Elder Robert D. Hales ena Kuoramu ni iApositolo Le Tinikarua ni gauna eda cakava kina na “veivakatulewa lelevu ni noda bula … , sa namaka vei keda na Tamada Vakalomalagi meda vakayagataka na noda bula galala meda vakasamataka vakavinaka me vaka na ivakavuvuli ni kosipeli, ka kauta mai Vua na nomu vakatulewa ena masumasu” (“Na Yalo Tabu,” Liaona, Me 2016, 105).

Sa isaunitaro vata kecega oqo. Ni ko vuli, masu ena yalodina me baleta na kena isau o na kunea ena nomu ilakolako. Ena vakauqeti iko sara na Yalo Tabu—ena vakasama, vosa ki na nomu vakanananu, se veivakavotui ni tamata yadua—me dusimaki iko ki na ikuri ni isaunitaro o na gadreva.

Vakasaqara na ivolanikalou, oka kina na iDusidusi ki na iVolanikalou kei na veivuke eso ni vuli. Sa rawa talega mo vakasaqara na ivurevure tale eso ni YDE me vakataka na vosa ni koniferedi raraba, Gospel Topics ena LDS.org, na mekasini ni Lotu, na Joseph Smith Papers Project, kei na so tale. (Raica na tabana 54 me baleta na veivuke ni lisi ni ivurevure ni Lotu.)

Kakua ni rerevaka mo kere veivuke. E vakayaloqaqataka o Elder Ronald A. Rasband ena Kuoramu ni iApositolo Le Tinikarua, “Au na solia vei iko e dua na bolebole. … E gadrevi mo vakasamataka mada e dua [e rawa ni vukei iko mo kunea na isaunitaro]—e dua na itokani nuitaki, se itubutubu, tukanigone, qasenivuli, matabisopi, [se] daunivakasala … —ka sa gadrevi me ra saumi mai na taro oqo” (kakaburaki ni Face to Face, Jan. 20, 2016). Vakatovolea mada! Vosa vua e dua o nuitaka baleta na nomu taro vata kei na kena isau.

Oqo na veikalawa bibi ni kena tugani ena nomu vakasama kei na lomamu. E kaya kina o Peresitedi Dieter F. Uchtdorf, iKarua ni Daunivakasala ena Mataveiliutaki Taumada, “Kevaka o vinakata mo kila na veidina vakayalo, sa dodonu mo na vakayagataka na kena iyaya dodonu. Ena sega ni rawa ni o kila na veidina vakayalo ena vakayagataki ni veiyaya ka ra sega ni rawa ni kidava” (“Na Kena Ciqomi e Dua na iVakadinadina ni Rarama kei na Dina,” Liaona, Nove. 2014, 22). Na Yalo Tabu sa ikoya eda na vulica mai kina na veika vakayalo. Na gauna o na masu ka vakarorogo ki na Yalotabu, ena yaco na gauna mo na kunea kina na isaunitaro.

E vakamacalataka o Peresitedi Uchtdorf, “Na levu ni noda dolava na yaloda kei na noda vakasama vua na Kalou, na levu ni kena vakasavasavataki na yaloda ena rarama mai lomalagi. … Vakamalua, na veika e dau buwawa, buto, ka yawa e liu era na matata, rarama, ka matau mai veikeda.” (“Na Kena Ciqomi e Dua na iVakadinadina ni Rarama kei na Dina,” 22). Na vakasaqarai ni isaunitaro ena rawa me cakacaka balavu toka. Ia kevaka o gadreva mo vakarogoca na isaunitaro, ena gauna mada ga ena dede kina, o na kunei ira.

Na levu ga ni nomu kila na veivakauqeti vakayalo ka sa lomamu mo cakava na veika sa tukuna na Yalotabu e yalomu, na kena rawarawa cake na nomu kila na ikuri ni veivakauqeti vakayalo ena veisiga ni mataka. O na “qai kila sara ni sa dodonu” se “guilecava ga na nomu gagadre” kevaka e cala (raica na V&V 9:8–9). O na rawa ni vakila e dua na veivakavotui vinaka, e dua na yalo ni vakacegu, se dua tale na yalo e matata vei iko. E kilai iko tiko na Turaga, ka kila tu o Koya na sala o na kila vinaka kina na Yalotabu. Ena dusimaki iko ena Nona loloma sa ka uasivi vei iko. Ia mo dau vakarorogo ka tovolea tikoga.