E Ramase o Star
O dauvolaivola e vakaitikotiko e Colorado, Amerika.
“Sa ka totoka na tiko oqo kei kemuni na Lalai” (Nodra Sere na Lalai, 254).
A vakadreta o Star na nona isulu. E ka vou tikoga me daramaki e dua na vinivo ki lotu. Ena nona lotu makawa era dau dara tarausese balavu se lekaleka na goneyalewa ena Siga Tabu. Ia e sega ena nona lotu vou. O koya kei tinana rau se qai papitaiso walega ki na Lotu i Jisu Karisito ni Yalododonu Edaidai.
E cegulevu o Star ni raici koya ena iloilo. A maqusa sara me gole ki lotu ena imatai ni gauna ni sa lewenilotu vakaivolataki, ia a rere tale tikoga. E liu, a dau toka vata ga kei Na ena gauna taucoko ni lotu. Ia ena gauna oqo sa lako tiko o koya ki na Lalai.
A sauriva o Star ena kena iyaloyalo. Vakacava ke sega ni okati e loma? Vakacava kera sega ni vinakati koya na vo ni gone?
“Star? O sa vakarau?” A kaci o Na.
Sa siro sobu ena ikabakaba o Star. “Au rairai vinaka beka?” a taroga.
A dredre o Na. “E totoka na kemu irairai.”
A vakavuki mata o Star. “E dodonu mo kaya o ya. O iko o noqu na.”
“O dina. E dodonu meu na kaya o ya. Baleta ni dina.”
A dredre vakalailai o Star. Sa dau ivakarau nei Na me vakamarautaki au. Ia se vakariseyalo tikoga na lomana. Vakacava ke sega ni dua na gone e via vosa vua? E vakaitokani tu o koya mai koronivuli, ia era sega ni lewe ni nona lotu vou. E diva me dua mada ga na nona itokani me rau gole vata ki lotu.
“Au sa qai nanuma rawa e dua na ka meu cakava,” a kaya vei Na.
A kaba cake tale ka laki tekiduru e yasani nona loga. “Tamaqu Vakalomalagi, yalovinaka ni vukea meu vakaitokani. Au vakabauta ni veika rau vakavulica na daukaulotu e ka dina, ia au rere.”
A tekiduru tikoga o Star ka vakarorogo. Ni oti vakalailai a vakila e dua na yalo kamica, ka veivakacegui, ka sa sega tale ni rere vakalevu.
Ena lotu a dabe tikiva toka o Star kei Na e dua na matavuvale ni tolu na goneyalewa lalai. A vakatakilaitaki iratou mai na itubutubu ka tekivu veivosaki kei Na ni bera ni tekivu na soqoni. A vukei iratou na goneyalewa lalai o Star me rokataki e dua na iyaloyalo kei Jisu.
Sa gole sara mai vei iratou o Bisopi Andrews. “Sisita Cunningham! Star? Totoka ni drau yaco mai nikua.” A matadredredre vei rau yadua ka lululu. Sa guilecava o Star na nodra yalovinaka na tamata kece ena lotu. Sa na rairai dua dina beka na nona itokani.
Ni oti na sakaramede a gole sara o Star ki na Lalai. Ena rere a vakaraici ira na vo ni gone ni sa dabe sobu. Era a veivosaki tiko vakai ira ka sega ni vaka mera raici koya. A lutu na icegu i Star. Sa na tu ga vakataki koya.
A curu sara mai na rumu e dua na goneyalewa lailai rau yabaki vata. “A rere talega o koya,” a vakasamataka o Star. “Meu na laki vosa vua.”
A cegu levu o Star, ka gole yani vei goneyalewa lailai. “Bula, na yacaqu o Star. Au ka vou eke. O via dabe vata kei au?” Sa vakatabuicegu tu o Star. Ena vinakata beka o goneyalewa lailai me nona itokani?
A dredre ga vakalekaleka o goneyalewa lailai. “O au o Sarah. Au ka vou talega. Se qai toki ga mai ke noqu matavuvale mai Ontario.”
“Au se qai papitaiso ga kei tinaqu ena macawa rua sa oti,” a kaya o Star. “Au sega ni kila vinaka na cava meu cakava.”
Sa matadredredre sara vakalevu o Sarah. “Daru na qai raica mada.”
Rau sa dabe sara ena kalasi o Star kei Sarah. So na gauna e dau coba yani na matai Star vei Sarah ka dredre. A dredre lesu mai o Sarah. E yalo vakacegu o Star ka marau. Sa kila sara ni sa sauma mai na nona masu na Tamada Vakalomalagi ka vukea me kunea e dua na itokani.
Ena kalasi sa kerea sara o qasenivuli me rau vakatakilaitaki rau o Star kei Sarah.
Sa tucake sara o Star. “Na yacaqu o Star Cunningham. Au se qai papitaiso ga kei tinaqu ena macawa rua sa oti. A cegu vakalailai, ka matadredredre sara ni sa rai yani vei nona itokani vou. “Ka noqu itokani oqo o Sarah.”