Vakavakarau ki na Valetabu e Veisiga
Niu se qai yabaki ciwa, a dua na noqu qasenivuli vakasakiti ena Lalai ka yacana o Sisita Kohler. Au mamadua, ka ivakarau malua o koya kau taleitaka kina na tiko vata kei koya. Ena dua na siga a solia vei keimami e yadua na tiki ni pepa. Keimami vola na veika keimami via cakava ni keimami sa qase mai. Au vola vakaoqo: “Lako ki na vuli torocake ka vakamau ena valetabu.” Au vakabira na noqu pepa ena katuba ni noqu drowa. Ena bogi, dau cilabasikata mai noqu katubaleka na rarama ni cina ni gaunisala. Au raica cake noqu tikinipepa. E dau vakananuma vei au niu vinakata meu lako ki na valetabu.
Ena gauna oya, e 12 walega na valetabu e vuravura. Au vinakata meu lako vei ira yadua.
Ena veigauna rau dau tuva kina o tinaqu kei tamaqu e dua na vakacagicagi, erau dau kauta na neitou matavuvale ki na valetabu. Keitou a vakaitikotiko mai Oregon, Amerika. Na valetabu voleka duadua e rauta ni 600 maile (965 km) na kena yawa mai Cardston, Alberta, Canada. E sega ni dua na ivakabatabata ena neitou motoka. Keitou dabe ena idabedabe e muri kei taciqu kei na ganequ. Keitou na vakaliliga ena katubaleka ni motoka e dua na isulu suasua. Keitou dau qai biuta e domoi keitou me ivakabatabata.
Sa dua na ka marautaki ni keitou sa raica na valetabu. Au sega soti ni dau kila vinaka na veika e dau yaco kina, ia erau dau marau na noqu itubutubu ni rau sa curu mai tuba. Au kila ni sa rui bibi na valetabu. Au kila ni nona vale na Turaga. (Ena itaba, au vaka siqeleti vulavula tiko.)
Niu sa yabaki 12 oti, au dau caka papitaiso ni valetabu ena vica vata na valetabu. Ena gauna au sota kina kei koya me na watiqu e muri, au qai kila ni dau taleitaka talega na valetabu o koya! Keirau a vakamau ena Valetabu e Manti Utah.
E rawa ni o vakarau ki na valetabu e veisiga. Lako ki na valetabu ena gauna e rawa kina. Tara na kena lalaga. Na makubuqu tagane o Jarret e yabaki 11, erau dau tuvakawa vata kei tamana e vei-Sigatabu ka rau sa kunea rawa e vuqa na yaca ni tubuna. Ni sa yabaki 12, e rawa ni veivuke ena caka papitaiso ena valetabu me baleti ira na tubuna oqo!
Ni o tiko ena valetabu, e rawa ni o lako ena vanua a lakova o Jisu. Oqo na Nona vale. Au nuitaka ni o na masu e veisiga me vukei iko na Tamada Vakalomalagi mo vakarau mo curu ki na valetabu ka vakila na Nona loloma.